ھەڤسەرۆکێ گشتی یێ پارتیا وەکھەڤی و دەمۆکراسیێ یا گەلان (دەم پارتی) تونجەر باکرھان د جڤینا مەجلسا پارتیا خوە دە بال کشاند سەر گەشەدانێن سیاسی و پێڤاژۆیا چارەسەریێ. باکرھان دەستنیشان کر کو ئاشتی مەسەلەیەکا ھەڤپار یا تەڤاھیا ترکیەیێیە و بانگ ل دەستھلات و ئۆپۆزیسیۆنێ کر کو بەرپرسیاریان بگرن سەر ملێ خوە.
باکرھان د دەستپێکا ئاخافتنا خوە دە سەرساخی ژ بۆ گرتیێ نەخوەشێ گران تونجەر ساگلامێ کو د دەمێن داوی دە ل نەخوەشخانەیێ ژیانا خوە ژ دەست دا و ھەر وھا ژ بۆ ئەنداما مەجلسا پارتیا وان نەسرین ئاسلان ئانی زمان. باکرھان بال کشاند سەر شەرت و مەرجێن گرتیێن نەخوەش یێن ل گرتیگەھان و گۆت: “ئەز بانگ ل رایەداران دکم؛ بلا ئەڤ ببە مرنا داوی. چما گرتیێن نەخوەش هێژ ژی ل گرتیگەھان تێن ھشتن؟ ئەڤ رەوش باوەریا ب پێڤاژۆیێ لاواز دکە.”
“دڤێت بارێ پێڤاژۆیێ نە تەنێ ل سەر ملێ کوردان بە”
باکرھان د ئاخافتنا خوە دە بال کشاند سەر گرینگیا پشتگریا ژ بۆ پێڤاژۆیا ئاشتیێ و بانگ ل پارتیێن ئۆپۆزیسیۆنێ کر:
“ئەڤە پێڤاژۆیا مە ھەموویانە. ئەگەر سەرکەفتنا وێ دێ ژیانا مە ھەموویان باشتر بکە، دڤێت ئەم د ڤێ مەسەلێ دە بەرپرسیاریەکا ھەڤپار بگرین سەر ملێ خوە. د دەمەکێ دە کو پێڤاژۆ د قۆناغەکا ئەوقاس گرینگ دەیە، هێژ ھەلوەستەکا لایقی گرینگیا وێ نەھاتیە نیشاندان. بارێ ڤێ پێڤاژۆیێ تەنێ ل سەر ملێ کوردان یان تەنێ ل سەر دەستھلاتێ نایێ ھشتن.”
ھەر وھا باکرھان دا زانین کو شەر و پەڤچوونان بەردێلێن گران ل سەر ئابۆری و سیستەما حقووقی یا ترکیەیێ بار کرنە و دڤێت چاڤکانیێن وەلاتی نە ژ بۆ شەری، لێ ژ بۆ خۆشگوزەرانییا جڤاکێ بێنە خەرجکرن.
“نێرینا ئەولەھیێ دڤێت بهێت گوھەرتن”
ھەڤسەرۆکێ دەم پارتیێ ھشیاری دا کو ئەگەر گاڤێن شێنبەر نەیێن ئاڤێتن، دێ ھێڤیێن جڤاکێ بگوھەرن و ببن فکار و گۆت: “دڤێت دەولەت دەست ژ نێرینا تەنگ یا ئەولەھیێ بەردە. پرسا کورد و پێڤاژۆیا دەمۆکراتیکبوونێ نایێ واتەیا دۆسیەیەکا ئاسایش و ئەولەھیێ تەنێ. ئەڤ پێڤاژۆ ژ بۆ ترکیەیێ دەرفەتەکا دیرۆکییە و دڤێت ئەڤ فرسەندە نەیێ ونداکرن.”
