سەرۆک مەسعوود بارزانی چالاکرنا پارلامەنتۆیا کوردستانێ ل گەلێ کوردستانێ، دەستەیا سەرۆکاتیێ و ئالیێن سیاسی پیرۆز کر و دەستنیشان کر کو ئەڤ پێنگاڤ د خزمەتا بەرژەوەندیێن بلندێن گەلێ کوردستانێ دەیە.
سەرۆک بارزانی ب بۆنەیا چالاکرنا پارلامەنتۆیا کوردستانێ پەیامەک بەلاڤ کر و پیرۆزباھی ل گەلێ کوردستانێ و دەستەیا سەرۆکاتیا پارلامەنتۆیێ کر. د پەیامێ دە بال ھات کشاندن سەر وێ یەکێ کو پشتی دەرباسبوونا نێزیکی دو سالان پارلامەنتۆیا کوردستانێ ژ نوو ڤە دەست ب کارێن خوە کریە و سپاسیا وان پارلامەنتەران ھات کرن کو ب ئەرکێ خوەیێ قانوونی و نیشتمانی رابوونە.
“ل دژی تو کەس و ئالیەکی نینە”
سەرۆک بارزانی د پەیاما خوە دە تەکەز کر: “چالاکرنا پارلامەنتۆیێ پێنگاڤەکە بەر ب پاراستن و بھێزکرنا ھەرێما کوردستانێ ڤە و ل دژی تو کەس و ئالیەکی نینە و ب پشتراستی ڤە دێ د خزمەتا بەرژەوەندیێن بلندێن گەلێ کوردستانێ و پرۆسەیا سیاسی دە بە.”
ھەر وھا بارزانی بانگا تەڤلێبوونێ ل ئالیێن دن ژی کر و گۆت: “نھا کو پارلامەنتۆیێ دەست ب کارێن خوە کریە، ئەز داخوازێ ژ ھەمی وان ئالیێن رێزدار دکم یێن کو تەڤلی وێ پرۆسەیێ نەبوونە، ئەو ژی تەڤلی وێ ببن و ب ھەڤ رە پێخەمەتی خزمەتکرنا گەلێ کوردستانێ و پێنگاڤێن دن ھەڤکار و ئالیکارێن پرۆسەیا سیاسی بن.”
روونشتنا دویێ ھات لدارخستن
ئیرۆ چارشەمێ، 4ێ مژدارا 2026ێ، ب ئامادەبوونا 52 پارلامەنتەران روونشتنا دویێ یا پارلامەنتۆیێ ھاتە لدارخستن و د ئەنجامێ دە سەرۆک، جیگرێ سەرۆک و سکێرتێرێ پارلامەنتۆیێ ھاتن ھلبژارتن. پشتی ھلبژارتنێ، سەرۆکا پارلامەنتۆیا ھەرێما کوردستانێ ڤالا فەرید بانگ ل تەڤاھیا فراکسیۆنان کر کو تەڤلی جڤینێن بهێت ببن و داخواز کر کو ھەتا رۆژا دوشەمبا بهێت ناڤێن کاندیدێن خوە ژ بۆ ئاڤاکرنا لیژنەیێن پارلامەنتۆیێ، ب تایبەتی لیژنەیا قانوونی، پێشکێش بکن.
