ل حەسەکێ ئێرشی خوەندەکارێن کو داخوازا پەروەردەیا ب زمانێ کوردی دکرن ھاتە کرن

ل باژارێ حەسەکێ خوەندەکارێن کو ژ بۆ داخوازکرنا مافێ پەروەردەیا ب زمانێ دایکێ ل بەر ئاڤاھیا پارێزگەھێ جڤیا بوون، راستی ئێرشا ب دار و کەڤران ھاتن.

کۆمەک خوەندەکار ژ بۆ رەدکرنا سینۆردارکرنێن ل سەر زمانێ کوردی و داخوازکرنا پەروەردەیا ب زمانێ زکماکی ل بەر ئاڤاھیا پارێزگەھا حەسەکێ چالاکیا نەرازیبوونێ پێک ئانین. لێ بەلێ ئەڤ چالاکی راستی دەستوەردان و ئێرشێ ھات.

بەشدارێن چالاکیێ دیار کرن کو کۆمەک کەس ژ تاخا خوێرانێ بەر ب وان ڤە ھاتنە و کەڤر ئاڤێتنە سەر خوەندەکاران.

بریارا شامێ تێ رەدکرن

ئەڤ چالاکیا خوەندەکاران پارچەیەک ژ پێلا نەرازیبوونانە کو ل ھەرێمێن جودایێن پارێزگەھا حەسەکێ بەلاڤ بوویە. خەلکێ ھەرێمێ و چالاکڤان سینۆردارکرنێن ل سەر زمانێ کوردی رەد دکن.

بەریا نھا حکوومەتا شامێ زمانێ کوردی وەکی “زمانەکی نشتمانی” پێناسە کربوو و ل ھەرێمێن کوردی ھەفتانە تەنێ 3 دەمژمێر دەرس (تەڤی دەمژمێرەک چالاکیا چاندی) ژ بۆ کوردی ڤەقەتاندبوو.

لێ بەلێ خوەندەکار، مامۆستە و سازیێن جڤاکی ڤێ گاڤێ وەکی ھەولدانەکا ژ بۆ تەنگکرنا قادا زمانێ کوردی دبینن و داخواز دکن کو زمانێ کوردی د پەروەردەیێ دە ببە زمانەکی فەرمی.