نوونەرێ تایبەتێ ئامەریکایێ بۆ کاروبارێن ئیراقێ پەسنێ دانوستاندنێن راستەراست یێن ناڤبەرا ھەولێر و بەغدایێ یێن بۆ چارەسەرکرنا کێشەیێن ھلاوێستی دا و رۆلا سەرۆکوەزیرێ ھەرێما کوردستانێ مەسروور بارزانی و سەرۆکوەزیرێ ئیراقێ عه‌لی زەیدی د برێڤەبرنا ڤێ ھەڤتێگھشتنێ دە بلند نرخاند.
نوونەرێ تایبەتێ ئامەریکایێ بۆ کاروبارێن ئیراقێ تۆم باراك ئیرۆ 9ێ مژدارا 2026ان ل سەر حەسابێ خوە یێ فەرمی یێ تۆرا جڤاکی یا “X” پەیامەک بەلاڤ کر و تێ دە راگھاند، دانوستاندنا راستەراستا د ناڤبەرا بەغدا و ھەولێرێ دە رێیا ھەری دروستە بۆ چارەسەرکرنا پرسێن ئالۆزێن وەکی ھناردەکرنا پەترۆلێ، مووچە و داھاتان.
شاندەیێ ئامەریکایێ بال کشاند سەر ھەولێن سەرۆکێن ھەر دو حکوومەتان و نڤیسی کو سەرۆکوەزیرێ ھەرێما کوردستانێ مەسروور بارزانی و سەرۆکوەزیرێ ئیراقێ عه‌لی زەیدی ئیرۆ ئەو سەرکردایەتیا پێویست نیشان دانە.
تۆم باراك ھەر وھا تەکەز کر کو واشنگتۆن دێ د پشتگریا ھەر دو ئالیان دە بەردەوام بە و گۆت: “دەولەتێن یەکبوویی یێن ئامەریکایێ ل کێلەکا ھەر دو ئالیان رادوەستە، د دەمەکێ دە کو ئەو ب ھەڤ رە کار دکن ژ بۆ ئاڤاکرنا ئیراقەکە خوەدی سەروەری و گەشبوویی.”
ئەڤ ھەلوەستا پشتەڤانیێیا ئامەریکایێ د دەمەکێ دە ھات کو ئیرۆ سەرۆکوەزیرێ ھەرێما کوردستانێ سەردانا بەغدایێ کر و ل گەل سەرۆکوەزیرێ فەدەرال جڤیا. د جڤینێ دە ھەر دو ئالیان ئێریشا ل سەر کێلگەھا گازا کۆرمۆرێ ب توندی شەرمەزار کرن و پێداگری ل سەر مسۆگەرکرنا بەردەوامیا شاندنا مووچەیان، لەزکرنا د دەرخستنا یاسایا پەترۆل و گازێ دە و مسۆگەرکرنا پارا دادپەروەرانەیا ھەرێما کوردستانێ د بوودجەیا گشتییا سالا 2027ان دە کرن.
