سەرۆکوەزیرێ ھەرێما کوردستانێ و سەرۆکوەزیرێ ئیراقێ ل به‌غدایێ جڤیان؛ ھەر دو ئالیان تەکەزی ل سەر میسۆگەرکرنا مووچەیێن کارمەندان، پەژراندنا یاسایا پەترۆل و گازێ و بلندکرنا ئاستا بەرھەمانینا پەترۆلێ کرن، ھەر وھا ئێریشا ل سەر کێلگەھا گازا کۆرمۆرێ ژی ب توندی شەرمەزار کرن.
سەرۆکوەزیرێ ئیراقێ عه‌لی فالح زەیدی ئیرۆ 9ێ مژدارا 2026ان، ل به‌غدایێ پێشوازی ل سەرۆکوەزیرێ ھەرێما کوردستانێ مەسروور بارزانی و شاندا پێ رە کر.
ل گۆری داخویانیا ئۆفیسا راگھاندنێ یا سەرۆکوەزیرێ ئیراقێ، د ھەڤدیتنێ دە عه‌لی زەیدی تەکەزی ل سەر خوەستەکا حكوومه‌تا فەدەرالا ژ بۆ پێکانینا دادوەریێ و مسۆگەرکرنا مافێن دەستوورییێن وەلاتی و سازیێن ھەرێما کوردستانێ کریە. ھەر وھا ئاماژە ب پلانێن حكوومه‌تێ یێن ژ بۆ بلندکرنا بەرھەمانینا پەترۆلێ کریە، کو تێ ئارمانجکرن د سالا 2030ان دە بگهێژە 7 ملیۆن بەرمیل و د سالا 2032ان دە ژی بگهێژە 10 ملیۆن بەرمیل د رۆژێ دە. ئەڤ پلان بەرھەما کێلگەھێن ھەرێما کوردستانێ ژی ل خوە دگرە و دێ ببە سەدەما گەشبوونا ئابۆریا تەڤاھیا وەلات.
د داخویانیێ دە ھات دەستنیشانکرن کو ھەر دو ئالی ل سەر دانینا مەکانیزمایەکە گونجاو ژ بۆ چارەسەرکرنا کێشەیان ل گۆری دەستوور و یاسایان ل ھەڤ کرنە. د ھەمان دەمێ دە، ھەر دو سەرۆکوەزیران ئێریشا ل سەر کێلگەھا گازا کۆرمۆرێ ب توندی شەرمەزار کرن و داخواز کرن کو بنەسازی و دەزگەھێن ئەنەرژیێ بێن پاراستن و رێ ل بەر ڤان جورە ئێریشان بێ گرتن.
ئۆفیسا زەیدی دیار کر کو د جڤینێ دە چەند پرسێن گرینگ ھاتنە گۆتووبێژکرن، ژ وان ئاوایێ برێڤەبرنا کێلگەھێن پەترۆلێ ل گۆری دەستوورێ و برێخستنکرنا داھاتێن پەترۆلێ ویێن نەپەترۆلی د ناڤبەرا وەزارەتێن دارایی یێن ھەر دو حكوومه‌تان دە.
د بەشەکە دن یا ھەڤدیتنێ دە، ھەر دو ئالیان تەکەزی ل سەر بەردەوامیا خەرجکرنا مووچەیێن کارمەندێن ھەرێما کوردستانێ کرن، ھەڤسەنگ لگەل کارمەندێن ئیراقێ. ھەر وھا بەحسا پارا ھەرێما کوردستانێ د بوودجەیا سالا 2027ان دە و لەزکرنا د پەژراندنا یاسایا پەترۆل و گازێ دە ھات کرن، ژ بۆ چارەسەرکرنا کێشەیێن ھناردەکرنێ و برێڤەبرنا سامانا ئەنەرژیێ.
د داویێ دە، مەسروور بارزانی و عه‌لی فالح زەیدی ھەڤنێرین بوون کو ھەڤاھەنگیێن دوئالی بدۆمن و دیالۆگ ببە بنگەھا چارەسەرکرنا ھەموو دۆسیایێن مایی، دا کو خزمەتا بەرژەوەندیێن گشتی یێن ھەموو پێکھاتەیێن ئیراقێ بێ کرن.
