سەرۆکوەزیرێ ھەرێما کوردستانێ مەسروور بارزانی د داخویانیەکە رۆژنامەڤانی دە بال کشاند سەر مژارێن گرینگ یێن ناڤخوەیی و پێوەندیێن د ناڤبەرا ھەولێر و بەغدایێ دە، و راگھاند کو چالاککرنا پارلامەنتۆیا کوردستانێ ل دژی چ ئالیەکی نەبوویە، بەلکی ژ بۆ پاراستنا رەواتیا پارلامەنتۆیێ و قەوارەیا ھەرێمێ ھاتیە کرن.
بارزانی دەربارێ پێکانینا حکوومەتا نوو و تێکلیێن د ناڤبەرا پەدەکێ و یەنەکێ دە دەستنیشان کر کو ئەو ژ دل دخوازن ب ھەڤ رە حکوومەتەکێ پێک بینن کو د بەرژەوەندیا ھەموو خەلکێ کوردستانێ دە بە، لێ دڤێت ھەر تشت ل گۆری قەبارەیا خوە بە و رێز ل دەنگێ خەلکێ و ئەنجامێن ھلبژارتنان بێ گرتن. ھەروھا داخواز کر کو بانگا سەرۆک بارزانی ببە بنگەھەک ژ بۆ ھەموو ئالیێن سیاسی دا کو بەرژەوەندیێن شەخسی و حزبی بدن ئالیەکی و ژ بۆ ئاڤاکرنا حکوومەتێ بهێن سەر مێزا گۆتوبێژێ.
“ھەولا ھلوەشاندنا پارلامەنتۆیێ خیانەت بوو”
دەربارێ رەدکرنا سکالایا ھلوەشاندنا پارلامەنتۆیێ ژ ئالیێ دادگەھا فەدەرالی یا ئیراقێ ڤە، مەسروور بارزانی سپاسیا دادگەھێ کر و ھەولا سکالایێ یا ژ بۆ ھلوەشاندنا پارلامەنتۆیێ و قەوارەیا ھەرێمێ وەکی “خیانەتا ل دەستکەفتا شەھیدان و کەدا پێشمەرگە” ب ناڤ کر. وی ھەروھا دەستخوەشی ل خەلکێ ھەلەبجەیێ و تەڤاھیا باژارێن کوردستانێ کر کو ل دژی وێ ھەلمەتێ راوەستیانە و تەکەز کر کو “ھەرێما کوردستانێ بێگومان دێ یەکگرتی بمینە.”
ئێریشا ل سەر کۆرمۆرێ و پێدڤیا سیستەما بەرەڤانیا ئاسمانی
سەرۆکوەزیرێ ھەرێما کوردستانێ ئێریشا ل سەر کێلگەھا گازێ یا کۆرمۆرێ وەکی زیانەکا مەزن ژ بۆ تەڤاھیا خەلکێ کوردستانێ و ئیراقێ بناڤ کر و راگھاند کو لژنەیەکا لێکۆلینێ ھاتیە ئاڤاکرن دا کو ئەنجامدەرێن ڤێ تاوانێ د زووترین دەم دە بهێن ناسکرن و سزادان. بارزانی داخواز ژ حکوومەتا فەدەرالی، ھەڤپەیمان و دۆستێن خوە کر کو ئالیکاریا ھەرێمێ بکن ژ بۆ دابینکرنا سیستەما بەرەڤانیا ئاسمانی و شیانێن دژی مووشەک و درۆنان، ژ بەر کو نە تەنێ بنەسازیێن ئابۆری، بەلکی پێگەھێن ئەولەھیێ و وەلاتیێن سڤیل ژی تێن ئارمانجکرن.
دانوستاندنێن بوودجەیا 2027ێ و مووچەیێن خەباتکاران
دەربارێ بەهرا ھەرێمێ د پرۆژەیاسایا بوودجەیا سالا 2027ێ دە، بارزانی دیار کر کو رەشنڤیسا بەرێ “ستەم و نەدادپەروەریەکا زێدە” ل دژی مافێ خەلکێ کوردستانێ تێ دە ھەبوو، ژ بەر کو ژ 216 تریلیۆن دیناران تەنێ 13 تریلیۆن دینار ژ بۆ ھەرێمێ ھاتبوون دیارکرن، د دەمەکێ دە کو پارا ھەرێمێ %14.14یە و دڤێت نێزیکی 30 تریلیۆن دیناران با.
وی دا خویاکرن کو د سەردانا خوەیا بۆ بەغدایێ دە ل سەر چەند خالان ل ھەڤ کریە؛ د سەری دە دابینکرنا مووچەیێن ھەرێمێ مینا مووچەیێن ھەموو خەلکێ ئیراقێ بێیی گرێدانا ب پرسێن دن ڤە. ھەروھا ژ بۆ بوودجەیا وەبەرھێنانێ، ھەرێمێ دو پێشنیار پێشکێش کرنە: ڤەگەراندنا نیڤا داھاتێ فەدەرالی ل ھەمبەر دابینکرنا بەشا وەبەرھێنانێ، یان ژی مانا تەڤاھیا داھاتا نە-پەترۆلی ژ بۆ ھەرێمێ ل گەل ڤەگەراندنا تەڤاھیا داھاتا پەترۆلێ بۆ حکوومەتا فەدەرالی ب رێیا سۆمۆیێ. لێبەلێ، وی دا خویاکرن کو پشتی ڤەگەرا وی ھندەک دەستکاری د خالان دە ھاتنە کرن و گۆتوبێژ هێژ ژی بەردەوامن.
گەشتیاری، تێکلیێن ناڤنەتەوەیی و دابینکرنا پەترۆلا سپی
د داویا داخویانیا خوە دە، بارزانی ھاتنا گرووپا ھۆتێلێن ناڤنەتەوەیی یێن مینا “Accor” و “Movenpick” بۆ ھەرێما کوردستانێ وەکی نیشانەکا زەلالا ئارامیا ھەرێمێ و گەشبوونا کەرتا گەشتیاریێ بناڤ کر. ھەروھا سەردانا وەزیرێ ھەڤاھەنگی و گەشەپێدانێ یێ ئالمانیایێ گرینگ وەسف کر و بەحسا پێوەندیێن دوئالی کر.
دەربارێ دابینکرنا پەترۆلا سپی یا زڤستانێ دە ژی، سەرۆکوەزیر راگھاند کو حکوومەتا فەدەرالی سۆزا شاندنا 50 ملیۆن لیترەیان وەکی کاروانێ یەکەم دایە، لێ ژ بەر سەرمایا ناڤچەیێن چیایی ئەڤ رێژە تێرا ھەموو پێدڤیان ناکە و ئەو ھێڤیدارن کاروانێن دن ژی ل پەی وەرن.