ده‌وله‌تا ترك بەرپرس و رێڤەبەرێن ھەڤبەندیيا نەتەوەیی یا کوردستانێ ده‌سته‌سه‌ركرن

Hevbendi-girtin--net

ب فەرمانا سەردۆزگەرییا کۆماری یا دیاربەکرێ، ل دژی ئەندامێن مەجلیسا ھەڤبەندییا نەتەوەیی یا کوردستانێ (ھەڤبەندی) ئۆپەراسیۆنەکە بنچاڤکرنێ ھات دەستپێکرن و ھەتا نھا 7 کەس ھاتنە بنچاڤکرن.

ل دیاربەکرێ ئۆپەراسیۆن ڤێ سبەھێ 17ێ مژدارا 2026ان، 8 رۆژان پشتی راگھاندنا ھەڤبەندیا نەتەوەیی، ژ ئالیێ رێڤەبەریا ئەولەھیێ یا دیاربەکرێ ڤە ھاتییە دەستپێکرن.

د ئۆپەراسیۆنێ دە سەرۆکێ گشتییێ پارتیا سۆسیالیستا کوردستانێ (په‌سه‌كێ) بایرام بۆزیەل و ئالیکارێ سەرۆکێ گشتی یێ په‌سه‌كێ حه‌سه‌ن داگتەکن ل ئەنقەرەیێ، سیاسەتمەدار فوئاد ئۆنەن ژی ل ناڤچەیا دێرکێ یا مێردینێ ھاتن بنچاڤکرن. ھەروھا جیگرێ سەرۆکێ گشتییێ پوکێ جانۆ ئامەدی ژی د ناڤ کەسێن بنچاڤکری دەیە.

 داخویانیا پوکێ و ناڤێن کەسێن بنچاڤکری

پارتییا وه‌لاتپارێزێن كوردستانێ دەربارێ ئۆپەراسیۆنێ دە داخویانیەک بەلاڤ کر و تێ دە ئەڤ ئۆپەراسیۆن شەرمەزار کر. ھەر وھا گۆت: “ژ ئالیێ رێڤەبەریا ئەولەھیێ یا دیاربەکرێ ڤە ل دژی ھەڤبەندییا نەتەوەیی یا کوردستانێ، ئۆپەراسیۆنەکە بنچاڤکرنێ ھاتیە دەستپێکرن. ل گۆری زانیاریێن کو ھاتنە وەرگرتن، کەسێن کو ھەتا نھا ھاتنە بنچاڤکرن ئەڤن: بایرام بۆزیەل، فوئاد ئۆنەن، مەھمەت جان ئازبای، رۆژبن بوکون، عه‌لی ئۆنجو، حەسەن داگتەکن، عه‌لی چەڤەن.

 ھەڤبەندیا نەتەوەیییا کوردستانێ چیە؟

ھەڤبەندیا نەتەوەیییا کوردستانێ (ھەڤبەندی) ھەڤگرتنا پارتی، تەڤگەر و رێخستنێن باکورێ کوردستانێ یە کو ب ئارمانجا ئاڤاکرنا یەکیتیا نەتەوەیی، پرەنسیبێن ھەڤبەش و مەکانیزمایەکە ماییندە د ناڤبەرا ئالیێن سیاسی یێن کورد دە ھاتیە دامەزراندن.

کۆنفەرانسا ھەڤبەندیێ رۆژا 7ێ مژدارا 2026ان ل دیاربەکرێ ھاتبوو لدارخستن و د 9ێ مژدارێ دە ژی ئەنجامنامەیا وێ ھات وەشاندن و ھەڤبەندی ب ئاوایەکی فەرمی ھات راگھاندن. د ئەنجاما کۆنفەرانسێ دە، مەجلیسەکە 51 کەسی یا ژ نوونەرێن پارتی و تەڤگەران ھات ھلبژارتن و د ئەنجامنامەیێ دە داخوازا مافێن رەوایێن کوردان ھات کرن.