ھەڤکێشەیا کورد یا ل ترکیەیێ: ئۆپەراسیۆنا ل دژی ھەڤبەندیێ و ڤیلایەکا ب حەوزەکا ئاڤژەنیێ ژ بۆ ئۆجالان…

ھەڤکێشەیا کورد یا ل ترکیەیێ: ئۆپەراسیۆنا ل دژی ھەڤبەندیێ و ڤیلایەکا ب حەوزەکا ئاڤژەنیێ ژ بۆ ئۆجالان…

د 17ێ مژدارێ دە، ل باکورێ کوردستانێ ئۆپەراسیۆنەک ل دژی سیاسەتمەداران ھاتە کرن و 13 سیاسەتمەدارێن کورد ھاتن بنچاڤکرن. پارێزەران دیار کرن کو ئەو ل بەندێ نە ئەڤ ھەژمارە زێدە ببە.

یێن کو ھاتنە بنچاڤکرن ئەندامێن تەڤگەرا ھەڤبەندی نە، کو د 9ی مژدارێ دە دامەزراندنا خوە راگھاند.

گرتنا وان، پشتی کێمتر ژ مەھەکێ ژ راگھاندنا ھەڤبەندیێ، نە کارەکی ئاسایی یە. ھەموو کەسێن کو ھاتنە گرتن ئەون یێن کو ناڤنیشان وان دیارن، و ب گشتی دکارن ب خوە بچن قەرەقۆلا پۆلیسان گەر بهێنە گازیکرن. لێبەلێ، دەولەت ڤان کەسان د سەرداگرتنێن نیڤا شەڤێ دە ژ مالێن وان دگرە، مینا کو ئەو ئەندامێن رێخستنەکا تەرۆریستی یا چەکدار بن. و ل سەر ڤێ یەکێ، دۆز تێ ڤەشارتن. و کەس ب راستی نزانە چما ئەو ھاتنە گرتن…

ژ بەر ڤێ یەکێ ئەڤ دەنگ و باسە چیە؟ ژ بەر کو، د راستیێ دە، ئۆپەراسیۆنا ھەڤبەندیێ پەیامەکێ ژ بۆ کوردان دشینە. ئەڤ پەیام ژ بۆ پێکھاتەیێن سیاسی یێن کورد یێن ل دەرڤەیی چارەسەریا ئەنتەگراسیۆنیستا کو ژ ھێلا سێگۆشەیا باخچەلی-ئۆجالان-ئەردۆگان ڤە ھاتیە دەستنیشان کرن، تێ رێ کرن. تشتێ کو ب زەلالی و بێ گومان دهێتە گۆتن ئەڤەیە: ژ بلی یێن ئەنتەگراسیۆنیست جیھ ژ بۆ سیاسەتمەدارێن کورد تونەیە…

رەخنەیێن ل سەر ھەڤبەندیێ و ئەرکا وێ

ب ئەشکەرەیی، ژ بلی رەخنەیێن مە یێن ل سەر بەرنامەیا سیاسی یا ھەڤبەندیێ، رەخنەیێن مەیێن ل سەر ھەلوەستا ھندەک دەردۆر و کەسان د ناڤ وێ دە ژی ھەنە. کا ھەموو دەردۆر د ناڤ تەڤگەرێ دە دێ چقاس ل سەر ئەرک، ھێز و روحا شەرێ تەڤگەرێ ھەڤگرتی بن، ئەڤە مژارەکا دنە. لێ ئەم ڤان ژ بۆ نھا ل ئالیەکی دھێلین. ژ بەر کو تەڤی ھەمی رەخنەیان، ھەڤبەندی د داخویانیا خوەیا دامەزراندنێ دە پێناسەیێن پر راست و زەلال کرنە. ئەو تەڤگەرەکا پچووکە، لێ ب ئارمانجێن مەزن و گرینگ دەرکەتیە ھۆلێ. و ب ئەشکەرەیی، ھەڤبەندیێ دارەک کرییە د بەر چەرخا ماکینەیا ئەنتەگراسیۆنیستا کورد یا ل ئیمرالیێ ھاتیە دامەزراندن.

ھەڤبەندییێ ئەڤ یەک ب رێیا داخویانیێن د دانەزانا دامەزراندنا خوە دە کر. دانەزانێ سێ خالێن سەرەکی دەستنیشان کرن:

1- بکارئانینا مافێ چارەنووسی یێ کوردان

2- رەخنەکرنا نێزیکاتیێن ئەنتەگراسیۆنیست

3- بکارئانینا تێگەهێن “نەتەوەیا کورد” و “ئازادیا کوردستانێ” د وێژەیێ دە

ڤان ھەرسێ خالان سینۆرێن “ئەنتەگراسیۆنێ”یێن کو ل ئیمرالیێ ل سەر کوردان ھاتنە فەرزکرن، رەد کرن.

ئەڤەیە یا کو ل پشت ئارمانجکرنا ھەڤبەندیێ یە.

“پێڤاژۆیا ترکیەیا بێ تەرۆر” و ئیمتیازێن پەکەکێ…

ب راستی، ئۆپەراسیۆنا ل سەر ھەڤبەندیێ د ئەشکەرەکرنا راستیا پێڤاژۆیا “ترکیەیا بێ تەرۆر” یا کو ل ئیمرالیێ دهێتە مەشاندن دە پر گرینگە. ژ بەر کو ئەو نیشان ددە کو مەسەلە، وەکی کو مە ھەر گاڤ گۆتیە، نە چارەسەرکرنا پرسا کوردە، لێ “مسۆگەرکرنا ئەنتەگرەکرنا پەکەکێ د ناڤ دەولەتێ دەیە.” و ب راستی، ئەم دکارین نھا پر ب ھێسانی ببێژین کو ب ڤێ پێڤاژۆیێ رە، “پەکەکە بوویە کوردەکی گرێدایی دەولەتێ، لێ کوردێن دن تەرۆریستن.”

بۆ نموونە، دوران کالکان، بەسێ ھۆزات، جەمیل بایک و سەبری ئۆک، کو دەولەتا ترک ب سالانە وان وەکی تەرۆریست پێناسە دکە، ب بالەفرێ چوونە ئیمرالیێ. عەبدوللاھ ئۆجالان چوویە ڤیلایەکا ب حەوزەکا ئاڤژەنیێ، سەکرەتەریا وی ھاتیە بەرفرەھکرن و ل گۆری ئیدیعایان، 8 ئەندامێن پەکەکێ تەڤلی وی بوونە و سەکرەتەریا وی هێژ زێدەتر بوویە.

رۆژا ژدایکبوونا ئۆجالان ل گەلەک دەڤەرێن باکورێ کوردستانێ مینا فەستیڤالەکێ ھاتیە پیرۆزکرن. وەیسی ئاکتاش، کو ل ئیمرالیێ لگەل ئۆجالان بوو و نھا ئەندامێ سەکرەتەریا ئیمرالیێ یە، پاسەپۆرتەک وەرگرتیە و ل ئەورۆپایێ وەلات ب وەلات دگەرە و جڤینێن گشتی ل دار دخە.

ئەڤ ئەنجامە نە ئەنجامەکێ سادەیە. د دو سالێن داوی دە، کادرۆیێن پەکەکێ ل باکورێ کوردستانێ گەلەک ئیمتیاز ب دەست خستنە.

ب کورتاسی، پێڤاژۆیا ئەنتەگراسیۆنێ یا کو ژ ھێلا ئۆجالان ڤە ھاتیە دەستپێکرن ژ بۆ کوردان چ دەستکەفتیەک لگەل خوە نەئانیە. لێبەلێ، پەکەکێ گەلەک ئێمتیاز ب دەست خستینە. ئەو ڤان ئیمتیازان بکار تینە دا کو کوردان ل دۆرا تێگەھا ئەنتەگراسیۆنێ بکە یەک.

ھەڤکێشە پر ھێسانە: ئۆجالان ڤیلایەکا ب حەوزەکا ئاڤژەنیێ وەردگریت، لێ کوردێن کو نە ئالیگرێ ئەنتەگراسیۆنێ نە، د گرتیگەھێ دە دمینن…

ئەڤ نە ھەڤکێشەیەکە کو تەنێ ژ ھێلا دەولەتێ ڤە ھاتیە ئافراندن. بێ گومان نە تەسادوفە کو ئۆجالان، کو ب سالان دگۆت، “وەرن ئەم بارزانی کۆنترۆل بکین، ئەز دێ تالابانی بدم تە، ئیسرایل دخوازە ل باشوور دەولەتەکا کوردی ئاڤا بکە، وەرن ئەم ب ھەڤ رە پێشی لێ بگرن، ئەز بەلێندەرم، من بکار بینن،” ھەلبەت ژ بەر ڤان ئاخافتن و کاران ئۆجالان گەلەک ئیمتیاز وەرگرتن. لۆما ئۆجالان یەک ژ لیستکڤانێن سەرەکی یێن ڤێ ھەڤکێشەیێ یە.

و ژ نھا و پێ ڤە، ئۆجالان دێ لگەل دەولەتێ، ب ھەردو دەستێن خوە و ب دلوجان شەری بکە دا کو ھەمی کوردان بینتە سەر رێیا ئەنتەگراسیۆنێ.