زه‌وجینا ئه‌مه‌ر كۆچه‌ر ئا دویه‌مین ئه‌ردهه‌ژه‌ك ب پێگه‌ها وی خست
بانگخوازێ ده‌لال ب خۆرتان ره دگۆت گه‌ر وه دراڤ ژبۆ زه‌وجینێ نه‌به، رۆژی و نمێژان بكن
بانگخوازه‌كێ هه‌ری دیار ئێ هه‌رێما باشوورێ كوردستانێ كو ب ئه‌مه‌رێ كۆچه‌ر تێ ناسكرن و ناڤوده‌نگیه‌كه هه‌ری مه‌زن ل پارێزگه‌هیا دهۆكێ و ناڤچه‌یا بادینان هه‌یه، بۆ جارا دویه‌مین زه‌وجی، لێ به‌لێ ئه‌ڤ زه‌وجین هنه‌كی شك و گۆمان ل سه‌ر چێبوونه، داركا مازی هنه‌كی ئه‌ڤ بابه‌ت شۆپاند و زانیاری ئێن تایبه‌ت ب ده‌ستخستن.
ئه‌مه‌ر كۆچه‌ر وه‌كه بانگخواز و پێشنمێژه‌كێ كوردێ نه‌رمرێ، پشتی سالا 2005ان ناڤوده‌نگی و ناسیاریا وی د قادا گه‌ل ده ده‌ستپێكر، گۆتنه‌كه رهه‌ت، شیره‌تكرن و پاشده‌برنا خۆرت و كه‌چكان ژ شاشێتیێ ب ئه‌ركا خوه یا سه‌ره‌كه دزانی، ژبه‌ر كو ئه‌ڤ یه‌ك د گۆتارا وی ده، پرسه‌كه هه‌ری دیار بوو.
ئه‌مه‌ر كۆچه‌ر وه‌كه بانگخواز نكاری دووری هه‌ڤركیا پارتێن باشوور بمینه، پشتی به‌رنیاسی ژبۆ چێبووی، هه‌ده‌ف و خه‌ونێن وی ژی مه‌زنبوون و ب سه‌ده‌ما كو وی نكاری وه‌كه كه‌سه‌كه سه‌ربخوه ئامانجێن خوه بده‌ست بخه، ته‌ڤلی پارتا یه‌كگرتوو ئا ئیسلامی ئا كوردستانێ بوو كو (پارته‌كه ل سه‌ر ئیسلاما سیاسی تێ هه‌سابكرن)، هه‌ر چه‌نده ره‌خنه‌یێن وی ژبۆ سیاسه‌تا پارتێن كوردستانی هه‌بوو، لێ پشتی كو ته‌كۆشینا خوه دگه‌ل پارتا یه‌كگرتوو مه‌شاندی، وی هنه‌كی ژ ئاستا ره‌خنه‌یێن خوه كێم كرن.
پشتره و ب بوورینا هنه‌ك سالێن كێم و ب تایبه‌ت ل سالا 2014ان، یه‌كگرتوو ئا ئیسلامی ب ده‌رفه‌ت دبینه كو بانگخوازێ خوه ئێ ده‌لال ژبۆ هلبژارتنێن پارله‌مه‌نا كوردستانێ نامزه‌د بكه، هه‌ده‌فا یه‌كگرتوو نه به‌رزكرنا پێگه‌ها زاتێ ئه‌مه‌ر كۆچه‌ر بوو، لێ به‌لێ یه‌كگرتوو ده‌نگ و پێگه‌ها ئه‌مه‌ر كۆچه‌ر د خوه‌ست، وێ فام دكر ده‌نگێن ئه‌مه‌ر وێ پڕ بن.
ته‌خمینا یه‌كگرتوو راست ده‌ركه‌ت، ئه‌مه‌ر كۆچه‌ر نێزی ده‌هان هه‌زار ده‌نگان د هلبژارتنێ ده ب ده‌ستخستن، لێ به‌لێ د چوونا وی ئا ناڤا پارله‌مه‌نێ ده، ئێدی په‌یاما ئه‌مه‌ر هنه‌كی هات گوهه‌رین، هنه‌كی سست و هنه‌كی لاواز بوو، خۆرتان ل وێ ده‌مێ فام دكر كو بانگخوازێ وان ئێ فاڤۆری ئه‌و پشتگوهـ خستنه، پشتی كو ژیانا پارلمه‌نته‌ریێ تام كری.
ده‌نگێ ئه‌مه‌ر كۆچه‌ر د پارله‌مه‌نێ ده تونه بوو، ئه‌و هێڤیا خۆرتان وه‌كه بانگخواز ب ئه‌مه‌ر ره هه‌یی به‌روڤاژی ده‌ركه‌ت، ئه‌و د فكرین گه‌ر ئه‌مه‌رێ وان بچه پارله‌مه‌نێ، وێ هۆلا پارله‌مه‌نێ ب داخوازكرنا مافێن گه‌ل ب شه‌وتینه، لێ به‌لێ وان نه شه‌وات ته‌ماشه‌كر نه چریسك، له‌وما ل وێ ده‌مێ ئه‌مه‌ر كۆچه‌ر فكر ل ده‌ستبه‌ردانێ ژ كارێ پارله‌مه‌نته‌ریێ كر ژ بۆ كۆ ئاڤا روویێ خوه ب پارێزه، ل وێ ده‌مێ ئه‌مه‌ر كۆچه‌ر د پرێسكۆنفه‌ره‌نسه‌كێ ده، ده‌ستێ خوه ژ پارله‌منته‌ریێ كشاند، لێ پشتره ئه‌شكه‌ره بوو كو ته‌نێ وی ژبۆ مه‌دیایێ ئه‌ڤ هه‌نگاڤ ئاڤێت، وه‌ختا كو وی ده‌ست ژ كار كشاندی، وی باش فام دكر كو پارله‌مه‌نا باشوورێ كوردستانێ د قه‌یرانێ ده بوو، پارله‌مه‌نه‌كه بێ سه‌رۆك نكاره وه‌ره‌قه‌یا ده‌ستبه‌ردانا وی ژ كار ب په‌ژرینه.
دگه‌ل ب داوی بوونا گه‌را چاره‌مین ئا پارله‌مه‌نا كوردستانێ، ئه‌مه‌ر كۆچه‌ر وه‌كه ته‌ڤ هه‌ڤالێن خوه ئێن پارله‌مه‌نته، خه‌لاتا خانه‌نشینیێ سته‌ند كو دراڤه‌كه مه‌زن بوو ب 40.000 دۆلارێن ئه‌مه‌ریكی تێ ته‌خمین كرن.
به‌لێ ئێدی ئه‌مه‌ر كۆچه‌ر پشتی پارله‌مه‌نێ، ڤه‌گه‌ری بانگخوازیێ، لێ به‌لێ نه بانگخوازێ جاران بوو، بانگخواز و پارله‌منته‌رێ خانه‌نشین ئێ خوه‌دی دراڤ و مووچه‌یه‌كا پر مه‌زن.
گۆتنه‌كه گه‌لێ باشوور هه‌یه دبێژه: “گه‌ر هه‌ژار تێر به، یان وێ ژنه‌كێ ب ره‌ڤه یان وێ مێره‌كی بكوژه”، ئه‌مه‌ر كۆچه‌رێ بانگخواز نه ژن ره‌ڤا و نه مێر كوشت، وی چاره‌سه‌ریه‌كه دن هه‌بوو، ئه‌و بۆ جارا دویه‌مین زه‌وجی و به‌شا سێیه‌مین ل سه‌ر وێ گۆتنا مه‌زنان زیده‌كر.
دادگه‌هێن باشوور زه‌وجینا دویه‌مین ئا ئه‌مه‌ر كۆچه‌ر نه‌په‌ژراندنه
ل رۆژێن بووری هنه‌ك دیمه‌نێن فۆتۆ و ڤیدۆیێ ئێن ئه‌مه‌ر كۆچه‌ر ل سۆشیال مه‌دیایێ هاتن وه‌شاندن، ئه‌و دیمه‌ن ئێن ئاهه‌نگا زه‌وجینا وی ئا دویه‌مین بوون، چالاكێن سۆشیال مه‌دیایێ و هه‌ر وها خۆرتێن باشوور ئه‌و دیمه‌ن ل ناڤبه‌را خوه ده پارڤه‌كرنه و كۆمێنت و لایك كرنه، هنه‌ك تووریی و بێ باوه‌ری ژی ل په‌ی خوه ئانی.
