ل ڤر دیار دبە کو هەرتم پەکەکێ حەساسیەتا دەولەتێن داگیرکه‌ر ل به‌ر چاڤان دگره، لێ بەلی تو دەمەکێ حەساسیەتا ته‌ڤگه‌رێن رزگاریخواز یێن کوردستانی ل به‌ر چاڤان ناگره، ب ئەڤا مە باس کری خوەیا دبە کو ل جەم پەکەکێ پەیڤا دژمنێن کوردستانێ «ترکیه، ئیران، ئیراق، سووریا» تو واتایه‌كا خوە نینە، بەلکو دژمنێن کوردستانێ ب تەنێ پارت و رێخستنێن کوردی نە، ژ بەر کو پەکەکە یا ئیرانێ هەیە و ل دژی پارتیێن کوردی یێن رۆژهلات دخەبتە، پەکەکە یا ترکیێ هەیە و وه‌لاتپارێزێن راستەقینە ل باكورێ کوردستانێ ته‌سفییه دكه، پەکەکەیەکە رووسی و یه‌كا دن یا ئیراقی ژی هەیە.
ئۆجالان باكورێ كوردستانێ د وی ئاگری ده هشت و بازدا سووریێ
په‌كه‌كه هەرتم په‌ده‌كێ سووچدار دکە کو گه‌لێ باشوور ناپارێزە، ئه‌ڤ رێخستن وه‌ها دفكره كو گه‌ل ژ هێلا وێ ڤه تێ پاراستن، یا راست ئەڤ سیاسه‌تا كو پەکەکە بکارتینه دبە سه‌ده‌م کو دەولەتێن دژمن ئێریشی کوردان بکن، میناک رێخستنا په‌كه‌كێ د ناڤبەرا سالا 1977 تا 1978ان دە باژارێ کوردان یێ ژ هەموویان مەزنتر کر سەنتەرێ نەئارامیێ ل ترکیێ، ئەڤ یەک بوو سەدەم کو ببە رێخوشکەر ژ بۆ ده‌ربه‌یا 12 ئیلۆنێ.
ل وێ دەمێ ترکیه ب خوە د چەندین گرفتان ده بوو و ل دەرفەتەکێ د گەرییا ژ بۆ كو دەڤەرێن کوردان ژ هەر ته‌ڤگه‌ر و چالاکییەکە کوردی راماله و پەکەکێ ئەڤ دەرفەت لسەر سێنییەکە زێری ب ترکان رە بەخشی، یێن کو دکارین ل هەمبەر ترکان ل بەر خوە بدن ب ڤێ ده‌ربه‌یێ هاتن لاواز کرن کو ئەڤ یەک ژ ئامانجێن سەرەکە یێن پەکەکێ بوو، ژ بەر ڤێ یەکێ ب هه‌زاران خوه‌ندکارین کورد ژ زانینگه‌هان هاتن ده‌رخستن و ب سەدان وه‌لاتپارێز هاتن کوشتن و ب هەزاران کەس ژ هێلا دەولەتا ترک ڤە هاتنه ده‌سته‌سه‌ر كرن، ل ڤێ دەمێ ئۆجالان بێی هایدار کرنا کادرۆیێن خوه، هەتا بێی هایدار كرنا هەڤژینا خوە، دەرباسی سووریێ دبە، باكور د وی ئاگری ده هشت و باز دا، هه‌ر وه‌كه تو ئالۆزی و پرسگرێك ل وێ په‌رچه‌یا وه‌لات نه‌به!.
مه‌زنترین رێژه‌یا ئاسمیله‌بوونا كوردان ل وان ناڤچه‌یان چێبوویه كو په‌كه‌كه تێده بهێز بوو
خوەیا یە کو پێش سالێن هەشتییان ژ چاخا رابووری، ناڤچەیێن کو پەکەکە تێدە هەری ب هێز ئەڤ بوون «دیلۆك، روها، سه‌مسوور، خارپتێ، ماراش و مالاتیا» لێ بەلێ گەر نها ل ڤان ناڤچه‌یان بنه‌رین وێ ببینین کو تا ئاسته‌كی هەری مەزن کوردایەتی ل ڤان ناڤچه‌یان هاتییە ژبیر کرن و کوردێن ڤان ناڤچەیان د ناڤ ترکان دە ئاسمیلە بوونە، ل ڤر پرسەک گەوهەری سەرهلددە، گەلو چما پەکەکە ل ڤان ناڤچەیان ب هیز بوو لێ بەلێ شێنیێن وان یێن کورد د ناڤا ترکان ده ئاسمیلە بوونه؟!.
پەکەکە د تو دەمەکێ دە وەکە ته‌ڤگه‌ره‌كه کوردی یا رزگاریخوازا کوردستانی تەڤ نەگەریایە، بەلکو هەری زێدە وەکە تەڤگەرەکە چەپ یا ترک تەڤ گەریایە، میناكا هەری بهێز ل سەر ڤێ ئاخافتنێ دبە ئەو ئاسمیلەبوونا کوردان یا د ناڤ ترکیێ دە به.
په‌كه‌كێ دیرۆكا خوه یا قرێژ ب ڤی ئاوای نڤیساند
پەکەکه باوەرییەکە وه‌ها ژ بۆ گەلێ کورد ئاڤا دکە کو ناسیۆنالیست بوون زراره‌كه هەری مەزنە و ب ڤێ یەکێ گەلێ کورد ژ کوردایەتیێ دوور دکە، پەکەکێ ئیرۆ ل هەر چار په‌رچەیێن کوردستانێ زمانێ ترکی وەکە زمانەکە خوەش و پر بها ب گەلێ کورد رە دایە ناساندن و هەول ددە کوردان بێخە هەمبێزا ترکان دە، بۆ میناک پرانییا وان کوردێن پاش 30 سالان كۆچ كرینه ئەورۆپایی، نها ب زمانێ ترکی دپەیڤن و کوردی ژ بیر کرنە، پاش سالێن نۆتان ژی رێژه‌یا هەری زۆر یا ئاسمیلەبوونا کوردان ل باکورێ کوردستانێ چێبوویه، ب تایبەتی د وان ناڤچەیێن پەکەکە تێدا ب هێز، پەکەکێ ل شوونا ل ڤێ سیاسەتا خوە یا شاش ڤەگەرە تێ و په‌ده‌كێ ب وێ یەکێ سووچدار دكه کو تێکلییا وێ دگەل تركیێ بوویە سه‌ده‌ما سەرەکە یا ڤێ ئاسمیلەبوونا کوردان د هوندرێ ترکیێ دە.
ب کورتی ئەم دکارن ببێژین کو باكورێ کوردستانێ رۆپه‌له‌كه سپی بوو و دیرۆکەکە هەری پاقژ هەبوو، لێ بەلێ پەکەکێ ب ته‌سفییه كرنا رێخستن، پارت و ته‌ڤگه‌رێن کوردی یێن وه‌لاتپارێز، دیرۆکا خوە یا قرێژ ل سەر ڤێ رۆپه‌لا سپی نڤیساند.
