د دەمێن کریز و پێڤاژۆیێن دیارکرنا چارەنووسێ دە، کەس دکارن ببن دیارکەرێن چارەنووسا گەل. ل لۆزانێ، تەلگرافێن حەسەن خەیری و هنارتیێن کورد، چارەنووسا کوردان بەر ب ھلوەشینێ ڤە بر. ئیرۆ، کورد د دوریانەکا دیرۆکی دە نە. و رۆلا کەسان، رێبەر و سیاسەتمەداران پر گرینگە. و نھا، مەزلووم عەبدی ژی، ل رۆژئاڤا رۆلەکێ وسا دلیزە.
جەنەرال مەزلووم، یان مەزلووم عەبدی، کەسایەتەکە کو بوو ماوەکێ د ناڤا پەکەکێ دە رێڤەبەری کربوو. و پەکەکێ قەت ئەو وەکی مەزلووم عەبدی نەدیت؛ وان ئەو وەکی یەک ژ کادرۆیێن خوە یێن پەکەکێ دیت و ئەو برێڤە بر. سالا 2021ێ دە، پەکەکێ خوەست وی ژ پۆستا وی دوور بخن، لێ ئەمەریکا قەبوول نەکر، ژ بەر ڤێ یەکێ وان ئەو وەکی پێشانگە د ئەرکا وی دە ھشت. وان ئەو ب کادرۆیێن پەکەکێ دۆرپێچ کر.
ھەر چەند مەزلووم عەبدی د 14 سالێن بۆری دە کەسایەتەک سەرەکی ل رۆژئاڤا بوو ژی، لێ وی نەکاریە ژ رۆژەڤا رۆژئاڤا یا پەکەکێ دەرباس ببە. وی ژ بۆ یەکیتییا د ناڤبەرا ھێزێن سیاسی یێن ل رۆژئاڤا دە تشتەک نەکر؛ د بن کۆنترۆلا وی دە، سیاسەتمەدار ھاتن رەڤاندن، کوشتن و گرتن. رۆژئاڤا ل دژی باشوور ھاتە بکارئانین. رۆژئاڤا بوو ئاموورەک کو ژ ھێلا پەکەکێ ڤە ژ بۆ رەواکرنا خوە و سوودمەندییا ژ دەستھلاتا رۆژئاڤا ھات بکارئانین.
و 14 سالان، مەزلووم عەبدی نە ل گۆری بەرژەوەندیێن راستین یێن کوردان، ل گۆری ئەجیندایا پەکەکێ تەڤگەریا.
گەلێ کورد بەدەلا بکارئانینا رۆژئاڤا ژ ھێلا پەکەکێ ڤە ژ بۆ حەسابێن ھەرێمی دا. رۆژئاڤا فلتی-فلتی ژ کارەساتەکا مەزن خلاس بوو، و مەترسی ھین ژی بەردەوام دکە.
ل گەل ڤێ راستیێ، پەکەکێ ھین ژی دەست ژ رۆژئاڤا بەرنەدایە. ئەو ھین ژی دخوازە ب رێیا رۆژئاڤا خوە رەوا بکە. ئەو ھین ژی دخوازە باندۆرا خوە ل رۆژئاڤا ئاڤا بکە.
نە پەکەکە بوو کو رۆژئاڤا ژ ڤێ مەترسییێ رزگارکری، لێ ھەلوەستا نەتەوەیی یا گەلێ کورد و پشتگریا ستراتەژیک یا کو سەرۆک بارزانی ل باشوورێ کوردستانێ رابەرکری بوو. کورد ڤێ راستیێ پر زەلال دبینن. لێ گەلۆ مەزلووم عەبدی دبینە؟
کورد شاشیێن بەرێ یێن مەزلووم عەبدی دبینن. لێ تەڤی ڤێ یەکێ ژی، ئەو ناکەڤن ناڤ رابردوویێ، ئەو وی وەکە بەرپرسیارێ وێرانکرنێ ناگرن.
سیاسیێن بارزانی ژی دزانن کو مەزلووم عەبدی بەرپرسیارێ ئێریشا یەپەگێ یا سالا 2020ێ یا ل سەر پێشمەرگەیان ل پێشخابوورێ بوو، دزانن کو ئەو ل پشت ئێریشێن ل سەر نرخێن پەدەکێ ل رۆژئاڤا بوو، و ھەر وھا دزانن کا چاوا وی پشتگری دا جوانێن شۆرەشگەر، کو فەرمانا شەوتاندنا وێنەیێن نەمر مەلا مستەفا بارزانی دابوو. لێ ئەو ڤان ھەموویان پاشگوھ دکن و وی ڤەدخوینن دوھۆکێ دا کو وی بکن کەسایەتەک دیپلۆماتیک. وان ھەول دا کو وی ببن مونشنێ. وان د دەما وی یا ھەری دژوار دە دەستێ براتییێ درێژی وی کرن.
ژ بەر کو کورد دخوازن مەزلووم عەبدی ببە کەسایەتەک کو چارەنووسا رۆژئاڤا دیار دکە، نە تەنێ ئەندامەک پەکەکێ بە، ببە خوەدی ھەلوەستەک ناڤەندی یا کوردستانی.
و ل ھەمبەری ڤان راستیان، مەزلووم عەبدی ب دوریانەکا دیرۆکی رە روو ب روو دمینە:
یان ئەو دێ ببە بەشەک ژ ئەجیندایا پەکەکێ، مینا ئەندامەکی پەکەکێ یێ ڤەشارتی،
یان ئەو دێ رابردوویا خوە پاش خوە بھێلە و رێیەک ل سەر خەتا کورد و کوردستانێ بپەژرینە.
یان ئەو دێ ل گۆری ئەجیندایا دەولەتا ترک لگەل ئۆجالان ل رۆژئاڤا تەڤبگەرە،
یان ئەو دێ ل رۆژئاڤا سیستەما داگیرکەرییێ تێکببە و دیسا رۆژئاڤا بکە بەشەک ژ وەلات.
یان ئەو دێ د سیا رابردوویێ دە بمینە.
یان ئەو دێ رووپەلەک نوو ڤەکە.
ئیرۆ، دیرۆک پرسەک زەلال پێشکێشی مەزلووم عەبدی دکە:
دپرسە تو کییی؟
ئەندامێ رێخستنەکێیی؟
یان سیاسەتمەدارەکی رۆژئاڤا و گەلێ کوردی؟
نھا دەم ھاتیە کو لایەنێ خوە ھلبژێرە.
گەلۆ مەزلووم عەبدی دێ چ ھلبژێرە؟
