هه‌سه‌ده دخوازه پێشمه‌رگێ رۆژ ل بن فه‌رماندارێتیا وێ به
هێزێن سووریایا ده‌مۆكراتیك و ئه‌نجوومەنا نشتیمانی یا كوردی ل سووریێ ئه‌نه‌كه‌سی لهه‌ڤهاتنه‌كه ده‌ستپێكی كرنه، وه‌ختا كو ل هه‌رێما باشووری فه‌رماندارێ هه‌سه‌دێ مه‌زلووم كۆبانی ب راسپاردا مه‌سعوود بارزانی رێبه‌رێ ملله‌تێ كورد ل گه‌ل شاندا ئه‌نه‌كه‌سێ جڤیان.
مه‌زلووم كۆبانی فه‌رماندارێ گشتی یێ هێزێن سووریایا ده‌مۆكراتیك ل رۆژێن بۆری ب نهێنی سه‌ردانا هه‌رێما باشوور كر و ل گه‌ل رایه‌دارێن وێ و ئه‌نجوومه‌نا كوردی یا سووریێ ئه‌نه‌كه‌سێ جڤیا.
ئه‌ڤ جڤین ب راسپارده‌یا مه‌سعوود بارزانی سه‌رۆكێ پارتا ده‌مۆكراتا كوردستانێ هات پێكانین و تێده هه‌سه‌ده و ئه‌نه‌كه‌سه هنه‌ك پرسێن هه‌ری گرینگ یێن گرێدای رۆژئاڤا و دۆزا كوردی نیقاش كرن.
مه‌زلووم كۆبانی ل ده‌ربارا وێ جڤینێ و ل هه‌ڤهاتنا ده‌ستپێكی ئاخڤی و وها گۆت: ئه‌و دخوازن نوونەراتییەکا سیاسی یا ئێکگرتی یا کوردێن رۆژئاڤایێ کوردستانێ ئاڤا بکن، نیقاشا وێ یه‌كێ ب ئه‌نه‌كه‌سێ كرنه لێ ته‌نێ ژ روویێ سیاسی.
كۆبانی ده‌ست نیشان كر، پێویسته کورد یه‌كگرتی بن و ژ بۆ ڤێ مه‌به‌ستێ وان په‌یوه‌ندی ب هێزێن كوردی و ئه‌نجوومه‌نا نشتیمانی كرنه.
فه‌رماندارێ هه‌سه‌دێ دبێژه: هنه‌ك پێشنیازێن ئەنەکەسێ هه‌نه، لێ به‌لێ ل ده‌ستپێكێ پێویسته كۆنگره‌یه‌كێ نشتیمانی ل ناڤبه‌را ئالیێن كوردی ده وه‌ره چێكرن ژ بۆ كو یه‌كده‌نگی ئاڤا ببه، پشتره ته‌كۆشین ژ بۆ ئاڤاكرنا هه‌یئه‌تا بلند یا سیاسی وێ وه‌ره مه‌شاندن.
نه‌كه‌سه لهه‌ڤهاتنێن هه‌ولێر و دهۆكێ ب بنگه‌ها چاره‌سه‌ریێ دبینه
مه‌زلووم كۆبانی هه‌موه‌ختا ڤان گۆتنێن خوه ته‌سبیت كر كو لهه‌ڤهاتنا وان و ئه‌نه‌كه‌سێ ته‌نێ ئالیێ سیاسی ل خوه دگره.
چاڤكانییان ئه‌شكه‌ره كرنه كو ل ده‌ربارا پێشمه‌رگێ رۆژ، مه‌زلووم كۆبانی ب ئه‌نه‌كه‌سێ گۆتییه كو گه‌ره‌كه پێشمه‌رگێ رۆژ ڤه‌گه‌ر رۆژئاڤا، پێویسته ل بن فه‌رماندارێتیا هێزێن سووریایا ده‌مۆكراتیك خه‌بات و ته‌كۆشینا خوه بكه، كۆبانی سه‌ده‌ما وێ یه‌كێ وها ده‌ست نیشان كر كو هه‌سه‌ده هێزه‌كه یه‌كگرتی یه و دڤێ هه‌ر هێزه‌كه رۆژئاڤا ل ژێر فه‌رماندارێتیا وی به.
ژ ئالیێ خوه ئه‌نه‌كه‌سێ ب هه‌سه‌دێ ره گۆتییه دڤێ كو لهه‌ڤهاتنێن هه‌ولێر و دهۆك بنگه‌ها چاره‌سه‌رییێ به.
