په‌كه‌كه ب زۆری دكه‌ڤه ناڤا مالێن ئێزدیان ده ل خانه‌سۆرێ
5 چه‌كدارێن یه‌به‌شێ د ئێریشێ ده هاتنه هنگافتن و چاره‌نڤیسا وان نه‌زه‌لاله
د ئێریشه‌كه ئاسیمانی ده كو ئیرۆ باله‌فرێن تركیێ ل باژارۆكێ خانه‌سۆرێ ئێ گرێدای شه‌نگالێ كربوو، 5 چه‌كدارێن یه‌كینه‌یێن به‌رخوه‌دانا شه‌نگالێ ئا گرێدای پارتیا كاركه‌رێن كوردستانێ هاتنه كوشتن و بریندار كرن یه‌ك ژ وان ژن بوو.
ئیرۆ رۆژا سێشه‌می 19/11/2019ان ل باژارۆكێ خانه‌سۆرێ ئا باشوورێ شه‌نگالێ، باله‌فرێن جه‌نگی ئێن تركیێ مالا ولاتیه‌كێ ناڤچه‌یێ ب ناڤێ «ئیلیاس دێرۆ» كو دكه‌ڤه ئالێ باكۆرێ رۆژهلاتا باژار بۆردۆمان كر كو چه‌كدارێن یه‌كینه‌یێن به‌رخوه‌دانا شه‌نگالێ «یه‌به‌شێ» ئا گرێدای په‌كه‌كێ تێده جی گرتبوون و وه‌كه بنگه‌هه‌كێ بكارئانی.
د ئێریشێ ده 5 چه‌كدارێن «یه‌به‌شێ» كو د هوندرێ وێ مالێ ده بوون، هاتن كوشتن، یه‌ك ژ وان چه‌كداران ژنه.
د ڤێ ده‌ربارێ ده، چاڤكانیێن داركا مازیێ ل ناڤچه‌یێ ئه‌شكه‌ره كرن، په‌كه‌كه و چه‌كدارێن یه‌به‌شێ ب زۆری دكه‌ڤه ناڤ مالێن ولاتیێن خانه‌سۆرێ و جڤینێن خوه تێده پێك تینه، ژ بۆ كو خوه ژ ئێریشێن تركیێ ب پارێزن.
هه‌موه‌خت خوه‌دانێن مالێ ژی ئه‌شكه‌ره كرن كو په‌كه‌كه و یه‌به‌شه ب زۆری هاتنه د ناڤا مالا وان ده و گه‌لێ ناڤچه‌یێ ژی هایا وان ژ ڤێ زۆریا په‌كه‌كێ هه‌یه، لێ نكارن ده‌نگێ خوه بكن.
باله‌فرێن تركیێ ل 4/11/2019ان باره‌گه‌هه‌كێ په‌كه‌كێ ل خانه‌سۆرێ بۆردۆمان كربوو هه‌ر یه‌ك ژ «مه‌زلووم رۆس» كو به‌رپرسیار و فه‌رماندارێ گشتی یه‌به‌شێ و «ئه‌لی شێر» فه‌رماندارێ هێزێن تایبه‌ت یێن شه‌نگالێ تێده بریندار كربوون.
