باله‌فرێن تركیێ باره‌گه‌ها په‌كه‌كێ ل خانه‌سۆرێ بۆردۆمان كر
باله‌فرێن جه‌نگی ئێن تركیێ ئێڤارا ئیرۆ باره‌گه‌هه‌كێ پارتیا كاركه‌رێن كوردستانێ ل ناڤچه‌یا خانه‌سۆرێ بۆردۆمان كر، زرارێن جانی ئێن مه‌زن پێره خستن.
باله‌فرێن جه‌نگی ئێن تركیێ ئیرۆ رۆژا دوشه‌می 4/11/2019ان ل ده‌مژمێر 1:30ێ نیڤ رۆژێ، باره‌گه‌هه‌كه په‌كه‌كێ ل خانه‌سۆرێ بۆردۆمان كر كو د ناڤا مالا ولاتی (به‌ده‌ل عه‌لۆ شه‌مۆ) ده بوو.
چاڤكانیێن داركا مازیێ ئه‌شكه‌ره كرن، ئێریشا باله‌فرێن تركیێ ل سه‌ر باره‌گه‌ها په‌كه‌كێ ئا ل خانه‌سۆرێ وه‌كه به‌رسڤه‌كێ بوو، ژ بۆ خوه‌پێشاندانه‌كا بەرییا 2 رۆژان د شەمییێ دە كو په‌كه‌كێ ل شه‌نگالێ رێخستبوو و تێده وێنه‌یێن عه‌بدوللا ئۆجالان رێبه‌رێ زیندان كری یێ په‌كه‌كێ بلند كربوون.
چاڤكانیان ئه‌شكه‌ره كرنه كو د ئێریشا سه‌ر باره‌گه‌ها په‌كه‌كێ ده ل خانه‌سۆرێ زرارێن جانی هه‌نه.
هه‌ر یه‌ك ژ مه‌زلووم رۆس كو به‌رپرسیار و فه‌رماندارێ گشتی یێ یه‌كینه‌یێن پاراستنا شه‌نگالێ یه‌په‌شێ و ئه‌لی شێر فه‌رماندارێ هێزێن تایبه‌ت یێن شه‌نگالێ بریندار بوونه.
