یه‌كێتی وێ ل 21 ڤێ مه‌هێ كۆنگره‌یا خوه ل داربخه
یه‌كێتی یا نشتیمانی یا كوردستانێ، ئیرۆ ژڤانێ ل دارخستنا كۆنگره‌یا خوه یا 4مین ده‌ست نیشان كر و راگهاند، كۆنگره وێ ل 21 ڤێ مه‌هێ وه‌ره ل دارخستن.
یه‌كیتی یا نشتیمانی یا كوردستانێ د جڤینا خوه یا ئه‌نجوومه‌نا سه‌ركرداتیێ ده، بریار دا كۆنگره‌یا 4مین یا حزبێ كو د پلانێ ده بوو ل 7 ڤێ مه‌هێ وه‌ره ل دارخستن، ژ بۆ 21/12/2019ان وه‌ره پاشخستن.
هه‌موه‌خت ئه‌نجوومه‌نا ناڤه‌ندی یا یه‌نكێ بریار دا، كۆنفه‌ره‌نسێن مه‌لبه‌ند و ئۆرگانێن حزبێ ل رۆژا 9/12/2019ان وه‌ره ل دارخستن.
ئه‌نجوومه‌نا ناڤه‌ندی یا یه‌نكێ دوهـ رۆژا چارشه‌می 4/12/2019ان هشداری ژ پاشخستنا ژڤانێ به‌ستنا كۆنگره‌یا 4مین یا یه‌نكێ دابوو.
ئه‌ڤ پاشخستن ژی ب به‌لگه‌یه‌كه زه‌لال ژ بۆ هه‌بوونا ناكۆكی و ئالۆزیێ ل ناڤبه‌را بال و جه‌مسه‌رێن سه‌ركرداتیا یه‌كێتیێ ده كو دگه‌ل نێزیبوونا ژڤانا به‌ستنا كۆنگره‌ی، كارینا ده‌رباس كرنا وان ناكۆكیان نینه.
یه‌نه‌كه ژ وه‌ختا نه‌خوه‌شكه‌تنا جه‌لال تاله‌بانی سكرتێرێ حزبێ و هه‌یا نها، ل سه‌ر هنه‌ك بالێن جودا ل گۆر به‌رژه‌وه‌ندیا هنه‌ك ژ سه‌ركرده و كادرێن وێ یێن پێشكه‌تی پارڤه‌بوویه، ئه‌ڤ یه‌ك ژی بوویه سه‌ده‌ما لاوازبوونا پێگه‌ها یه‌نكێ، هه‌ر چه‌ند كو سه‌ركرده‌یێن وێ ب تایبه‌ت یێن گه‌نج وه‌كه پاڤێل تاله‌بانی و لاهۆرێ شێخ جه‌نگی ئینكارا هه‌بوونا چ باله‌كی د ناڤا حزبێ ده دكن، لێ به‌لێ ئه‌ڤ یه‌ك نه‌مایه پرسه‌كه نخافتی به‌لكو نیقاشا سه‌ر زمانێ هه‌موو قادرۆیێن وێ یه.
