مه‌سروور بارزانی په‌یامه‌كه‌ گرینگ پێشكێشی گه‌لێ باشوور دكه‌

سه‌رۆك وه‌زیرێ هكوومه‌تا باشوورێ كوردستانێ ئیرۆ وێ په‌یامه‌كه‌ گرینگ پێشكێش بكه‌ و تێده‌ به‌هسا به‌رهه‌ما 100 رۆژێن كابینه‌یا نه‌هه‌ما هكوومه‌تێ بێ كرن، كانێ سینۆردار كرنا گه‌نده‌لیێ تێده‌ ب ت ئاوایی بوویه‌.

ب هه‌لكه‌فتا بوورینا 100 رۆژان ل سه‌ر كاركرنا كابینه‌یا نه‌هه‌ما هكوومه‌تا هه‌رێما باشوورێ كوردستانێ، ئێڤارا ئیرۆ رۆژا شه‌می 7/12/2019ان، مه‌سروور بارزانی سه‌رۆك وه‌زیرێ هه‌رێما باشوورێ كوردستانێ، دێ گۆتاره‌كه‌ تێله‌فزیوونی ژ گه‌لێ باشوور ره‌ پێش كێش بكه‌.

مەسروور بارزانی د گۆتارا خوە دە کو بریارە ئیرۆ دەمژمێر 20:00 ل کەنالێن راگھاندنێ بێ وەشاندن، وێ رۆناھیێ بخه‌ سەر دەستکەفتێن 100 رۆژێن کارێن کابینەیا نەھەما ھکوومەتا ھەرێما باشوورێ کوردستانێ.

چاڤكانییان ئه‌شكه‌ره‌ كرنه‌، مه‌سروور بارزانی وێ هنه‌ك ته‌وه‌رێن گرینگ د گۆتارا خوه‌ ده‌ زه‌لال بكه‌، وه‌كه‌ پرۆسەیا چاکسازیا ئیداری و دارایی، شه‌رێ گه‌نده‌لی و پێشده‌برنا وه‌به‌رهێنان و سێكته‌را ئابووری ئا هه‌رێما باشوور، هه‌ر وها پێشده‌برنا تێكلیێن ب هكوومه‌تا فه‌ده‌رال ئا ئیراقێ ره‌.

كابینه‌یا نه‌هه‌ما هكوومه‌تا هه‌رێما باشوورێ كوردستانێ، ل رۆژا 10 تیرمه‌ها ئیسال 2019ان سووندا قانوونی خواربوو، مه‌سروور بارزانی ب ده‌نگێن 88 پارلمه‌نته‌رێن كوردستانێ باوه‌ری ژ بۆ پۆستا سه‌رۆك وه‌زیریێ وه‌رگرتبوو.

سه‌رۆك وه‌زیر د روونشتنا پارله‌مه‌نا كوردستانێ ئا سووند خوارنا كابینه‌یا نه‌هه‌ما هكوومه‌تێ ده‌، سۆز ب گه‌لێ باشوورێ كوردستانێ ره‌ دابوو، شه‌ره‌كێ بێ وێنه‌ ل دژی گه‌نده‌لیێ ئیلان بكه‌ و ئیرۆ وێ ئه‌نجام و به‌رهه‌ما كارێ كابینه‌یا خوه‌ د وه‌ختا 100 رۆژێن رابووری ده‌ ئه‌شكه‌ره‌ بكه‌.