رۆژهلاتا كوردستانێ دێ شه‌هیدێن خوه‌پێشاندانان ل بیرئینیت

رۆژهلاتا كوردستانێ دێ شه‌هیدێن خوه‌پێشاندانان ل بیرئینیت

ل رۆژهلاتا كوردستانێ قوربانی و شه‌هیدێن خوه‌پێشاندانێن ڤێ داویێ دێ هێن ل بیرئانین و ناڤەندا ئالیکاریێ یا پارتیێن رۆژھلات بانگ ل گه‌ل کرییه‌، ژ بۆ رێزگرتن ل قوربانییان سەردانا مالباتێن وان بکن.

ناڤەندا ئالیکاریێ یا پارتیێن رۆژهلاتا کوردستانێ ل دەربارێ ببیرئانینا قوربانیێن خوەپێشاندانێن مه‌ها رابووری یێن ئیرانێ و رۆژهلاتا كوردستانێ به‌یانه‌ك وه‌شاند و تێده‌ بانگ ل خه‌لكێ رۆژهلاتا كوردستانێ كرییه‌، رۆژا پێنجشه‌مبێ 26/12/2019ێ قوربانی و شه‌هیدێن خوه‌پێشاندانان بهێن ل بیرئانین.

د ڤێ به‌یانێ دە ھاتیە: ژ بۆ رێزگرتن ل قوربانیێن خوەپێشاندانێن ڤێ داویێ، بلا خەلک رۆژا پێنجشەمبێ ٢٦ێ ڤێ مەھێ سەردانا مالباتێن قوربانییان و گرتییان بکن.

ھەروھا د بانگەوازێ دە داخواز ھاتییە کرن، کو ھەر ھەمان رۆژێ ل ده‌مژمێر3ێ پشتی نیڤرۆ ل جھێن گشتی و ل سەر کار بۆ دەما 5 خۆلەکان ژ بۆ رێزگرتن و بیرئانینا وان قوربانییان ب بێدەنگی راوەستن.

ناڤەندا ئالیکاریا پارتیێن رۆژهلاتا کوردستانێ د بانگەوازا خوە دە دبێژە: «کۆمارا ئیسلامی یا ئیرانێ ل ھەمبەر خواستێن ئاشتییانە یێن خەلکێ توندوتیژی و تەپەسەر کرنێ بکار تینە، وه‌ختا کو خوەپێشاندانێن ئارامێن خەلکێ د مەھا دەرباسبوویی دە تەپەسەر کرن.«

ناڤەندا ئالیکاریێ دبێژە: «رۆژھلاتا کوردستانێ وەکە ناڤچەیەکە پشتگوھکری د ڤان خوەپێشاندانێن داویێ دە ژی قوربانیێن ھەری زێدە دان.«

د خوەپێشاندانێن ڤێ داویێ یێن ل رۆژھلاتێ کوردستانێ و ئیرانێ دە، کو رۆژا ١٥ێ مژدارێ پشتی  گرانبوونا نرخا پانزینێ، گەلەک کەس ژ ئالیێ ھێزێن حکوومەتا ئیرانێ ڤە ھاتن کوشتن.

 رێخستنا لێبۆرینا ناڤدەولەتی ده‌ست نیشان كریه‌ د خوەپێشاندانان دە ل رۆژھلاتێ کوردستانێ و ئیرانێ زێدەتر ژ 360 کەسان ھاتنە کوشتن.