ئاكه‌په‌ ژ بۆ خوه‌ ده‌مۆكراسی یه‌ و ژ بۆ گه‌لێ كورد دیكتاتۆره‌

ئاكه‌په‌ ژ بۆ خوه‌ ده‌مۆكراسی یه‌ و ژ بۆ گه‌لێ كورد دیكتاتۆره‌

ده‌وله‌تا تركیێ هه‌یا نها 38 شاره‌دارێن هه‌ده‌پێ زیندان كرنه‌

پارتییا داد و گه‌شه‌پێدان ب سه‌رۆكتیا ره‌جه‌ب ته‌یب ئه‌ردۆگان، ژ ده‌ست ب كار بوونا شاره‌دارێن كورد یێن پارتییا ده‌مۆكراتیا گه‌لان هه‌ده‌پێ، ل باژار و باژاركێن باكورێ كوردستانێ، هه‌یا نها 38 شاره‌دار دوورخستنه‌ و زیندان كرنه‌ و قه‌یووم ل شوونا وان وه‌زیفه‌دار كرنه‌، ئه‌ڤ یه‌ك ژی ب بنپێكرنه‌كه‌ هه‌ری زه‌لال ژ بۆ وێ ده‌مۆكراسیێ تێ كو پارتییا ئه‌ردۆگان ئیدیعایێ دكه‌ كو خه‌باتێ ژ بۆ دكه‌.

دژاتیكرنا هه‌ده‌پێ

د هلبژارتنا ئادارا ئيسال 2019ان ده‌، پارتییا ده‌مۆكراتیك یا گه‌لان هه‌ده‌پێ، 63 شاره‌داری ب ده‌ست خست بوون، كو یێن باژارێن (مێردینێ، باتمانێ، ئامه‌دێ، سێرتێ و هه‌كاریێ، وانێ، ئیدرێ و كارسێ) بوون، لێ به‌لێ هه‌ر زوو و ب ده‌ست ب كار بوونا وان، پارتییا ئه‌ردۆگان سیاسه‌تا ته‌كئالی و دژاتیكرنا گه‌لێ كورد ل كار كر و ده‌ست ب دووركرنا شاره‌دارێن سه‌ركه‌فتی یێن هه‌ده‌پێ كر.

ب ده‌رباسبوونا 7 مه‌هان ل سه‌ر هلبژارتنێ و ده‌ست ب كار بوونا شاره‌داران، ئاكه‌پێ هه‌یا نها 38 شاره‌دارێن هه‌ده‌پێ ب سووچێن جودا دوورخستن و زیندان كرنه‌، پرانییا وان ب سووچا په‌یوه‌ندی و تێكلییا وان یا ب پارتییا كاركه‌رێن كوردستانێ په‌كه‌كێ، هاتنه‌ زیندان كرن.

پارتیا ئه‌ردۆگان كو 778 شاره‌داری ل تركیێ د ده‌ست دانه‌، ئیدیعایا وێ یه‌كێ دكه‌ كو ئه‌و خه‌باتێ ل سه‌ر ئه‌ساسا ده‌مۆكراسیێ دكه‌، لێ به‌لێ ترسا وێ یا هه‌ری زێده‌ ژ پارتیێن ئۆپۆزسیۆن هه‌یه‌، ب تایبه‌ت پارتیێن كوردی وه‌كه‌ پارتییا ده‌مۆكراتییا گه‌لان و هه‌ر كو دچه‌، ب هێجه‌تێن جودا شاره‌دار و پارلمه‌نته‌رێن هه‌ده‌پێ تێخه‌ بن له‌كۆلینان و ب سووچێن سیاسی ژ پۆستێن وان دوور تێخه‌.

ده‌مۆكراسییا كو‌ ئاكه‌په‌ ل تركیێ د مه‌شینه‌، مینا وێ سه‌رهاتیێ یه‌، وه‌ختا كو (یه‌كێ ئه‌مه‌ریكی ب یه‌كێ ئیراقی ره‌ گۆتی: ئه‌م ل وێ ئاستێ ده‌مۆكراسیێ نه‌ كو دكارن خه‌به‌ران بدن سه‌رۆك بۆش، د به‌رسڤێ ده‌ كه‌سێ ئیراقی ب یێ ئه‌مه‌ریكی دبێژه‌: گه‌لو ئه‌م ژی وه‌كه‌ هه‌وه‌ ل وێ ئاستا ده‌مۆكراسیێ نه‌ ژ به‌ر كو ئه‌م ژی دكارن خه‌به‌ران بدن سه‌رۆك بۆش).

پارتییا داد و گه‌شه‌پێدان یا ره‌جه‌ب ته‌یب ئه‌ردۆگان، پشتی هلبژارتنا داویێ ده‌وله‌تا تركیێ خستیه‌ د خه‌ته‌رێ ده‌، ژ به‌ر كو سیاسه‌تا دژاتیا گه‌ل و دژبه‌ران كرییه‌ نه‌خشه‌ رێ، ئه‌ڤ یه‌ك ژی ژ ئالیێ پارتیێن ئۆپۆزسیۆنێ ڤه‌ ب تایبه‌ت پارتیێن كوردی ب ده‌ستپێكا داوییا ئاكه‌پێ هاتییه‌ ناڤكرن، ئه‌ڤ ره‌خنه‌دایینا ل په‌كه‌كێ ژی تێ گرتن، نه‌ ته‌نێ ل ناڤا تركیێ یه‌، به‌لكو جڤاكا ناڤنه‌ته‌وه‌یی ژی ره‌خنه‌یه‌كا هه‌ری دژوار ل تركیێ و ئاكه‌پێ گرتیه‌ كو هه‌موو بنه‌مایێن ده‌مۆكراسیێ بن پێ كرنه‌ و ئازادی سینۆردار كرنه‌.

پارتییا هه‌ده‌پێ ژ ده‌ستپێكا ئاڤابوونا خوه‌ زراره‌كه‌ مه‌زن ژ ده‌ست ئاكه‌پێ دیتییه‌، ژ ده‌سته‌سه‌ركرنا رێبه‌رێ وێ، سه‌لاحه‌ددین ده‌میرتاش و ب ده‌هان شاره‌دار و پارلمه‌نته‌رێن وێ، هه‌موه‌خت ده‌رخستنا وان شاره‌دار و نوونه‌رێن هه‌ده‌پێ یێن كو ب ده‌نگێن گه‌ل چوونه‌ د ده‌ستهلاتێ ده‌.

ده‌میرتاش: تا مرنێ د زیندانێ ده‌ بم ئازادیێ ژ ئه‌ردۆگان ناخوازم

رێبه‌ر ئاپۆ: ئازادییا ئۆجالان ئازادییا كوردستانێ یه‌

په‌كه‌كه‌:‌ بێ سه‌رۆك ژیان نابه‌

ئه‌ڤ گۆتنێن ئاپۆ و په‌كه‌كێ ب وێ واتایێ تێن هه‌ر وه‌ك هه‌گه‌ر رێبه‌ر ئازاد نه‌به‌ كوردستان دێ بمرت

هه‌ر چه‌ند تركیا هه‌ده‌پێ ب سیبه‌را په‌كه‌كێ مێزه‌ دكه‌، پشتی ده‌سته‌سه‌ر كرنا ده‌میرتاش، ئه‌ردۆگان گۆت كو (ئه‌وێن پشتا خوه‌ ب چیا گه‌رم دكرن، نها د زیندانێ ده‌نه‌ و تشته‌كێ وان نینه‌ پشتا خوه‌ پێ گه‌رم بكن)، مه‌به‌ستا ئه‌ردۆگان ژ ڤێ گۆتنێ قه‌ندیل بوو.

لێ به‌لێ ده‌میرتاش كو ده‌ما 3 سالانه‌ د زیندانێ ده‌یه‌، ئیرۆ رۆژا چارشه‌می 25/12/2019ان ب رێیا پارێزه‌رێن خوه‌ به‌رسڤا رۆژنامه‌یه‌كێ دایه‌ ئایا كانێ ئه‌وێ ژ ئه‌ردۆگان ره‌ ته‌له‌با عه‌فوێ بكه‌، ده‌میرتاش گۆتییه‌: «ئه‌گه‌ر ئه‌و هه‌یا مرنێ د زیندانێ ده‌ به‌، ئه‌و داخوازا ئازادكرنێ ژ ئه‌ردۆگان ناكه»‌.

ئه‌ڤ هه‌لوه‌ستا ده‌میرتاش هه‌لوه‌ستا رێبه‌ر ئاپۆ ل بیر تینه‌ وه‌ختا كو ده‌سته‌سه‌ر كری یه‌كه‌م گۆتنا وی: «ئه‌ز ژ بۆ خزمه‌تا تركیێ ئاماده‌مه‌».

هه‌ر وها وه‌ختا كو ب ئاوایه‌كه‌ نه‌راسته‌ راست داخوازا ئازادیێ ژ ده‌وله‌تا تركیێ كری و گۆتی: «ئازادییا ئۆجالان ئازادیا كوردستانێ یه‌، وه‌كه‌ چاوا په‌كه‌كه‌ دبێژه‌ بێ سه‌رۆك ژیان نابه»‌.

گه‌ر ئه‌ڤان گۆتنێن رێبه‌ر ئاپۆ و په‌كه‌كێ هنه‌كێ شیرۆڤه‌ بكن، ته‌نێ یه‌ك واته‌ ژ بۆ هه‌یه،‌ ئه‌وژی گه‌ر ئۆجالان ئازاد نه‌به‌، كوردستان وێ قه‌ت ئازاد نه‌به‌، هه‌ر وها گۆتنا په‌كه‌كێ كو دبێژه‌ بێ سه‌رۆك ژیان نابه‌، واته‌ گه‌ر سه‌رۆك ئازاد نه‌به‌، كوردستانێ دێ مرت و ژیان لێ تونه‌ بت.

هه‌ر چ قاس پارتییا ئه‌ردۆگان سیاسه‌ته‌كه‌ ته‌كئالی، پشتگوهخستن و دژاتیكرنا گه‌لێ كورد ب كار ئانی، لێ به‌لێ په‌كه‌كه‌ ل هه‌موو ده‌مان ئه‌و هێجه‌ته‌ بوو كو تركیێ ئه‌ڤ سیاسه‌ت ل دژی كوردان پێ دایه‌ مه‌شاندن، ده‌مۆكراسییه‌تا ئاكه‌په‌ ژی خه‌باتێ ژ بۆ دكه‌، ب وێ واتایێ تێ «ئه‌ز ژ بۆ خوه‌ ده‌مۆكراسی مه‌ و ژ بۆ ته‌ دیكتاتۆرم».