ب سه‌ده‌ما ده‌نگدانێ ل سه‌ر پرۆژه‌یاسایا ریفۆرمێ، ئیرۆ كوالسیۆنا نه‌وه‌ی نوێ ل پارلمه‌نا كوردستانێ، پارلمه‌نته‌را خوه‌ یا ب «ناڤێ شاد نه‌وزاد» ژ ناڤ رێزێن خوه‌ ده‌رخست، لێ به‌لێ پارلمه‌نته‌ر شادی نه‌وزاد ئه‌شكه‌ره‌ دكه‌، وێ كوالیسیۆن ب جی هشت و ئێدی ناخوازه‌ ل گه‌ل وان به‌.

كوالسیۆنا نه‌وی نوێ ئیرۆ د داخۆیانیه‌كێ ده‌، ئه‌شكه‌ره‌ كر كو وان بریار دا پارلمه‌نته‌را خوه‌ یا ب ناڤێ «شادی نه‌وزاد» ژ ناڤ رێزێن كوالسیۆنێ ده‌ربخن، ب سه‌ده‌ما كو وێ د جڤینا ئیرۆ یا پارلمه‌نێ ده‌، ده‌نگ ب ئه‌رێ ل سه‌ر پرۆژه‌یاسایا ریفۆرمێ دایه‌.

كوالسیۆنا نه‌وه‌ی نوێ ده‌ست نیشان كریه‌ كو پارلمه‌نته‌را وان «شادی نه‌وزاد» ب سۆزا خوه‌ پابه‌ند نه‌بوویه‌ و به‌روه‌خت وێ ئیمزه‌ كربوو كو ئه‌و مووچه‌یا خانه‌نشینیێ قه‌بوول نه‌كه‌، لێ به‌لێ ئیرۆ وێ سۆزا خوه‌ شكاند، له‌و بریارا ده‌رخستنا وێ هات دایین.

د ڤێ ده‌ربارێ ده‌، پارلمه‌نته‌ر «شادی نه‌وزاد» د داخۆیانیه‌كه‌ نڤیسكی ده‌ كو ژ بۆ رایا گشتی نڤیساندیه‌ دبێژه‌: «من ب خوه‌ رێزێن كوالسیۆنا نه‌وه‌ی نوێ ب جی هشتنه‌ و ئه‌ڤ داخوازییا خوه‌ دایه‌ سه‌رۆكتیا پارلمه‌نا كوردستانێ».

«شادی نه‌وزاد» ده‌ست نیشان كر كو وێ ژ بۆ پاراستنا یه‌كرێزیا به‌ره‌یا ئۆپۆزسیۆنێ ئه‌ڤ هه‌نگاڤ ئاڤێتیه‌ و ب دژواری ژی ئێریش كریه‌ سه‌ر «شاسوار عه‌بدولواحد» یێ سه‌رۆكێ ته‌ڤگه‌را نه‌وه‌ی نوێ.

شادی نه‌وزاد دبێژه‌: «شاسوار عه‌بدولواحد 52 ملیۆن دۆلارێن هكوومه‌تا هه‌رێما كوردستانێ ل جه‌م وی نه‌ و ب لهه‌ڤهاتنێن نهێنی ئه‌و ناخوازه‌ وی په‌ره‌ی ژ بۆ هكوومه‌تێ ڤه‌گه‌رینه‌».

«شادی نه‌وزاد» د به‌شه‌كا داخۆیانیا خوه‌ ده‌ وها نڤیساندیه‌: «شاسوار عه‌بدولواحد شێت و هار بوویه»‌.

پارلمه‌نته‌ر «شاد نه‌وزاد» ل سه‌ر كوالیسیۆنا نه‌وه‌ی نوێ پارلمه‌نته‌ره‌‌، ل سالا رابووری ئه‌و راستی گه‌ف و ته‌هدیدێن راسته‌ راست یێن «شاسوار عه‌بدولواحد» سه‌رۆكێ ته‌ڤگه‌را نه‌وه‌ی نوێ بوو كو ل سه‌ر هنه‌ك پرسێن ئه‌خلاقی گه‌ف لێ كربوون.

پشتره‌ و ژ بۆ كو ڤان گه‌فێن سه‌رۆكێ ته‌ڤگه‌را خوه‌ ب رایا گشتی ره‌ ئیعلان بكه‌، پارلمه‌نته‌ر «شادی نه‌وزاد» د كۆنفه‌ره‌نسه‌كه‌ چاپه‌مه‌نیێ ده‌ ب دۆكیۆمه‌نت گه‌فێن سه‌رۆكێ ته‌ڤگه‌رێ به‌هس كرن و گۆتبوو كو «شاسوار عه‌بدولواحد» ئه‌و ته‌هدید كریه‌ ڤیدیۆیێن وێ پارڤه‌ بكه‌.

كوالیسیۆنا نه‌وه‌ی نوێ ل گه‌ل كوالیسیۆنێن كۆمه‌له‌یا ئیسلامی و یه‌كگرتوو یا ئیسلامی، جڤینا ئیرۆ یا پارلمه‌نێ ته‌رك كرن و ده‌نگ بۆ پرۆژه‌یا ریفۆرمێ نه‌دا، ل همبه‌ر ڤێ كوالیسیۆنێن كو ده‌نگ ب ئه‌رێ ژ بۆ پرۆژه‌ی دانه‌، بایكۆتا وان هه‌رسێ كوالیسیۆنان ب موزایه‌ده‌یه‌كه‌ سیاسی ب ناڤ كرن.