ئه‌نجوومه‌نا سه‌ركرداتیا پارتیا ده‌مۆكرات یا كوردستانێ، ئیرۆ جڤیا و بریار دا، د ئیسالێ ده، كۆنگره‌یا خوه یا گشتی ل دار بخه.
ئه‌نجوومه‌نا سه‌ركرداتیا پارتی، ئیرۆ ب سه‌رۆكتیا مه‌سعوود بارزانی سه‌رۆكێ په‌ده‌كێ جڤینا خوه ل دارخست، 4 مژارێن سه‌ره‌كه نیقاش كرن، ژ وان بریار و راسپارده‌یێن جڤینێن ڤێ داویێ یێن پارلمه‌نا ئیراقێ.
ئه‌نجوومه‌نا سه‌ركرداتیا پارتی د وێ ده‌ربارێ ده نرخاندن ژ بۆ وان بریاران كر و ئه‌شكه‌ره كر كو ئه‌ڤ بریار دوور ژ بنه‌مایێن سه‌ره‌كه یێن پشتی ژناڤبرنا ره‌ژیما به‌عس ل سالا 2003ان و ئاڤاكرنا ئیراقا ل سه‌ر ئه‌ساسێ شه‌راكه‌ت و حكومرانیا هه‌مه ئالی و ئۆلی هاتنه دایین.
ئه‌نجوومه‌نا سه‌ركرداتیا په‌ده‌كێ د به‌یانه‌كه نڤیسكی ده مژارێن جڤینێ زه‌لال كرن و ل گۆر وێ، د خالا دویه‌مین ده نیقاش ل سه‌ر ره‌وشا ئیراقێ هاتیه كرن و ئه‌نجوومه‌نا سه‌ركرداتیا په‌ده‌كێ ل گه‌ل وێ نه‌رینێ یه كو ئیراق نه‌به مه‌یدانا یه‌كلاكرنا پرسگرێكێن هه‌رێمێ و پێویسته هه‌ول ژ بۆ ڤێ پرسێ وه‌ره‌ن خورت كرن.
ئه‌نجوومه‌نا سه‌ركرداتیا په‌ده‌كێ د مژاره‌كه دن ده به‌هسا پرۆژه‌یا ریفۆرمێ كر و پشتگری ل وان هه‌نگاڤان كر كو كابینه‌یا نه‌هه‌ما هكوومه‌تا باشوورێ كوردستانێ ئاڤێتن.
د مژارا چاره‌مین یا نیقاشێ ده، ئه‌نجوومه‌نا سه‌ركرداتیا په‌ده‌كێ بریارا دا كۆنگره‌یا 14مین یا پارتیێ د ئیسال 2020ان ده وه‌ره ل دارخستن، ل دارخستنا كۆنگره‌ی ژی ب پێویستی ب ناڤ كر ژ بۆ كو ته‌ڤ ئۆرگانێن پارتیێ خوه ل گه‌ل ره‌وشێ و گوهه‌رینێن بله‌ز یێن ناڤخوه و ناڤچه‌یێ بگونجین و هه‌موه‌خت ده‌ستهلاتێن پێویست ب پۆلیتبیرۆیا خوه دا كو هه‌نگاڤ و رێكارێن ل دارخستنا كۆنگره‌ی ده‌ست پێ بكه.
