كاره‌ساتا 1ی شوباتێ و نیفاقا ئیسلاما سیاسی

كاره‌ساتا 1ی شوباتێ و نیفاقا ئیسلاما سیاسی

كورد تنێ د ته‌نگاڤییان دا ده‌ستێ هه‌ڤ دگرن

گه‌له‌ك جاران دهێته‌ گۆتن کو کورد ب تنێ د دەما دیلان و گۆڤەندان دا دەستێ هەڤ دگرن، به‌ره‌ڤاژی هه‌رده‌م د هەڤڕکی و شەرەکێ بێ پایان و قرێژ دا نە، هه‌رچه‌نده‌ دبیت هنده‌ك ژ ڤێ ئاخفتنێ راست بیت، لێ بەلێ چ جاران ئەڤ ئاخفتن ب تەمامی راست نینە، ژ بەر کو د دیرۆکێ دا دیار بوویە پرانیا جارێن کو کورد تێدا تووشی نەخۆشی و دەرده‌سه‌ریێ و بەلایان بووین دەستێ هەڤ گرتینە، نموونه‌ ژی ل سەر ڤێ یەکێ گه‌له‌كن کو ئەم د شێین ب ڤی رەنگی ئاماژێ پێ بدین، کۆچا ملیۆنی یا گەلێ باشوور بەر ب ترکیێ و ئیرانێ ل سالا 1991ێ كو گەلێ کورد ل رۆژهلات و باکورێ کوردستانێ هاریكارییه‌كا هەری زێدە ب برایێن خوە یێن باشوور کر پشتی كو ژ ئه‌گه‌رێ زولم و ستەما رژێما بەعس کۆچبەری ڤان دو پارچەیێن کوردستانێ بووین، وه‌ك چاوا ل كۆچێن ب ئه‌گه‌را هه‌وێن ره‌ش یێ ئه‌نفالێ ژی، كوردان ده‌ستێ هه‌ڤ گرتییه‌ و هاریكارییا هه‌ڤدو كرینه‌.

هه‌ر وها مه‌زنترین كه‌مپا ئاواره‌یێن گه‌لێ باكور كو ل ناڤچه‌یا ئه‌تریش یا باشوور هاتیه‌ دانان و پشتره‌ ژ بۆ مه‌خموورێ هاتیه‌ ڤه‌گوهاستن.

هەر دیسان د دەما تێکچوونا رەوشا سووریێ دا‌، گەلێ کورد ل رۆژئاڤایێ کوردستانێ بەرێ خوە دا باشوور و گەلێ باشوور هاریكارییه‌كا زێدە بۆ وان کر، نموونەیێن ب ڤی ئاوایی پر گەلەکن، لێ دبیت ئەڤه‌ دو دیارترین نموونە بن ژ روویێ وێ هاریكاری و دەست گرتنا کوردان بۆ هه‌ڤدو ژ ئالیێ جڤاکی ڤە.

ژ روویێ سیاسی ژی ڤه‌، هاریكارییا پێشمەرگەهان ب شەرڤانان ل کۆبانێ دیارترین نموونه‌یه‌ ل سەر ڤێ دەست گرتن و هەڤکارییا سیاسی د ناڤا کوردان دا، هه‌ر وها بزاڤێن باشوورێ كوردستانێ ژ بۆ به‌رپا كرنا ده‌ستهلاته‌كا فرلایه‌ن ل رۆژئاڤا كو هه‌موو حزب و ئالیێن وێ پارچه‌یا كوردستانێ تێدا به‌شدار ببن، لهه‌ڤهاتنێن هه‌ولێر و دهۆكێ ژی نموونه‌یێن زیندی یێن ڤێ هاریكاریێ نه‌.

تاوانا 1ی شوباتێ ل دژی گه‌لێ كوردستانێ كر

1ی شوباتا سالا 2004ێ ژی دیسان د بوویەرەکا تیرۆرستی دا، دوو تیرۆرستان هەڤدەم خۆ ل دو جهێن جودا یێن باژارێ هه‌ولێرێ یێ پایتەختا باشوورێ کوردستانێ ل دو بارەگەهێن سەرەکی یێن دو هێزێن سیاسی یێن کاریگەر تەقاند و هەژمارەکا هەری زێدە ژ کەسێن ئامادە بووی ل وێرێ شەهید كرن.

16 سالان به‌ری نها و ل ئێكی شوباتا سالا 2004ێ، تاوانەکا دل ب ئێش و پڕ خوین ب پیلانەکا قرێژ ژ ئالیێ تیرۆرستان ڤە ل دەرهەق گەلێ کورد ب گشتی هات ئەنجام دان و د ئێک دەم دا دو کریارێن تیرۆرستی یێن خوەکوژی ژ ئالیێ تیرۆرستێن گرێدای گرۆپا «شێخ زانای» كو ب گرۆپا «جیهاد» یا سه‌ر ب رێخستنا ئه‌نسارولئیسلام ڤه‌، ل ناڤا هەر دو بارەگایێن مەلبەندێ 3ێ یێ رێخستنا هەولێرێ یا یه‌كێتیا نشتیمانی یا کوردستانێ و لقا 2 یا پارتیا دەمۆکرات یا کوردستانێ ئەنجام دا، ئەڤ رۆژە کو رۆژا ئێكێ یا جەژنا پیرۆز یا قۆربانێ بوو، گرۆپێن تیرۆرستی یێن سەر ب ئیسلاما سیاسی ڤه‌، 101 کەس ژ گەلێ کورد کو پێکهاتبوون ژ سەرکردەیێن بلند یێن ڤی گەلی و خەلکێ ئاسایی کرن قوربانیێن هزرێن خوە یێن ژەنگ گرتی و قرێژی.

ئەڤ کریارا تیرۆریستی کو 16 سالان به‌ری نها ل باژارێ هه‌ولێرێ هاتییه‌ كرن، هەژمارەکا هەری زێدە ژ كادرێن ئاست به‌رز و سەرکردە یێن هەر دو پارتیێن سیاسیPDK  و YNKێ شەهید کرن، ئەڤ یەکه‌ شۆکەکا ب هێز بوو ژ بۆ گەلێ کورد ب تەڤاهی، ژ بەر کو کارەسات ل رۆژا یەکەم یا جەژنا قوربانی بوو، ل ڤی دەمی دا کو خەلک ل هەموو جیهانێ ب تایبەتی ل ولاتێن ئیسلامی مژوولی پیرۆزباهیێن جەژنێ و گەردەن ئازاکرنا هەڤدو بوون، لی بەلێ دوژمنێن گەلێ کورد تاوانەکا هەری مەزن ل دژی دو ژ پارتیێن هەری مەزن و خودان باندۆر ل کوردستانێ ئەنجام دا کو ل ڤێرێ پرسه‌كا‌ جەوهەری سه‌رهلدده‌ت:

– ئه‌رێ بۆچی ئەڤ هەردو پارتی یە هاتنه‌ ئارمانج کرن؟

– بۆچی پارتیێن دی ب تایبەتی پارتیێن ئیسلامی نەهاتن ئارمانج کرن؟ ژ خۆ ئەو ژی مژوولی پێشوازیکرنێ ل خەلکێ بوون؟

ئیسلاما سیاسی ژ كورداتیێ ڤالایه‌

یا کو مرۆڤێ كورد گه‌له‌ك پێ دلگران دبیت ئه‌وه‌ کو هێزێن ئیسلاما سیاسی ل جهێ کو هەرسال د سالڤەگەرا بیرئانینا شەهیدێن 1ێ شوباتێ دا باس ل ڤان شەهیدان بکه‌ن کو هەژمارەک ژ وان شەهیدان رۆلەکێ هەری کاریگەر ل سەر سیاسەتا کوردان ب تایبەتی ل باشوور هەبوو، دهێن و باس ل پیرۆز کرنا رۆژا جیهانی یا جلكێن ئیسلامی ژ بۆ ژنان دکه‌ن.

 ئەڤ هێزێن ئیسلاما سیاسی ب رادەیەکێ وەها ژ کوردایەتیێ ڤالا بووینە کو هەر تشت ل جه‌م وان پیرۆزە ب تنێ کورد و کوردستان نه‌بن، ئەڤ هێزێن ئیسلاما سیاسی كو نڤێژا ب غیاب ژ بۆ محه‌مه‌د مورسی یێ رێبه‌رێ ئێخوانێن مسری دكه‌ن، باس ل فەلستینێ و موسلمانێن چینێ و میانمارێ دكه‌ن و هه‌روها دوعاكرنا بانگخوازێن وان ژ بۆ چیچانییان و ب ده‌هان نموونه‌یێن دی، لێ ب چ ئاوایه‌كی ب پەیڤەکێ ژی باس ل شەهیدێن کوردستانێ ب گشتی و شەهیدێن ئێكی شوباتێ ناکه‌ن کو ئەڤ ژی جهێ گۆمانەکا مەزنە ژ بۆ هەر کوردەکی.

[gusta_social_sharing_box vc_id="social-sharing-box-11528929335d5b338097b69" buttons_size="small" alignment="center" sub_groups="labels" select_buttons="facebook, twitter, email, print, linkedin"]

پوستێن ھەمان بەش