کۆنگرەیا چارەما پارتییا ده‌مۆكراتیك یا گه‌لان هەدەپێ، ئیرۆ رۆژا یەکشەمی 23/2/2020ان برێڤە چوو و «پەرڤین بۆلدان و میتھەت سانجار» وەک ھەڤسەرۆکێن نوو یێن هەدەپێ ھاتن ھلبژارتن.
پەرڤین بولدان و میتھات سانجار کو ب یەک لیستەیێ کەتن دەنگدانێ، 836 دەنگ ب دەست خستن، د کۆنگرەیێ دە ژ 1018 ئه‌ندامێن به‌شدار 838 ئه‌ندامان دەنگێ خوە دا کو 2 دەنگ ژی پووچ بوون.
چارەمین کۆنگرەیا ئاسایی یا هەدەپێ ل سالۆنا سپۆرێ یا ئەنقەرەیێ برێڤە چوو، ژ ھەموو باژارێن باکورێ کوردستانێ و ترکیەیێ ھەزاران کەس بەشداری کۆنگرەیێ بوون.
ل گۆر بەرپرسێن هەدەپێ، تەڤی مێهڤانان، 30 ھەزار کەسان د جھێ کۆنگرەیێ دە ئامادە نە، ژ 4 بازنه‌یان 300 سەد کەس بۆ کۆنگرەیێ ھاتنە ڤەخوەندن.
کۆنگرە ب دروشما «ئەم بەر ب پاشەرۆژێ ڤە دمەشن» برێڤە دچە.
د دەنگدانێ دە کۆنسەیا پارتیێ، کۆنسەیا دیسپلینا ناڤەندێ، کۆنسەیا لھەڤکرنێ ژی ھاتن ھلبژارتن.
هەڤسەرۆکێن نوو یێن هەدەپێ کینە؟
میتھات سانجار هەڤسەرۆکێ نوو یێ هەدەپێ سالا 1963 ل ناڤچەیا نسێبینا سەر ب مێردینا باکورێ کوردستانێ ڤە ژ داییک بوویە.
میتھات سانجار د 3ێ نیسانا 2013ان دە یەک ژ وان 63 رەوشەنبیران بوو کو ژ ئالیێ ھکوومەتا ئاک پارتیێ ڤە ھاتبوو ئه‌شکەرە کرن ب مەبەستا برێڤەبرنا پرۆسەیا چارسەرکرنا پرسا کورد و نوونەرێ ھەرێما مارمارایێ بوو، ئەو زمانێن کوردی، ئالمانی، ئینگیلیزی، ئەرەبی و ترکی دزانە و زارۆکەک وی ھەیە.
پەرڤین بولدان 6ێ مژدارا 1967ان ل باژارێ جۆلەمێرگێ سا باکورێ کوردستانێ ژ داییک بوو، پشتی خوەندنا خوە یا ده‌ستپێكێ ل ئیدرێ بۆ ھەیامەکێ وەکە فەرمانبەر کار کر، پەرڤین بولدان ژ سالا 1995ان ڤە بۆ ھەیاما 4 سالان بەشداری چالاکیێن‘ دایکێن شەمیێ بوو ل بەر لیسەیا گالاتاسارایا ل ستەنبۆلێ، د وان سالان دە بۆ دو سەردەمان ئەنداما مەجلیسا پارتیێ یا ھه‌دەپێ بوو.
ھەڤسەرۆکا هەدەپێ پەرڤین بولدان سالا 2005ان د ناڤ 1000 ژنان دە جھ گرت کو ل سەر ئاستا جیھانێ ژ بۆ خەلاتا نۆبەلێ ھاتبوون بەربژێرکرن، پەرڤین بولدان رۆژا 11ێ شوباتا 2018ان، د سێیەمین کۆنگرەیا هەدەپێ دە ل گەل سەزای تەمەللی وەکە ھەڤسەرۆکا هەدەپێ ھاتبوو ھلبژارتن.
