ستراکچەرا گرۆپا ئایدۆلۆژی یا ئۆجالان و پەکەکێ وەک هەموو رێخستنێن چەپ و مارکسی ل سەر سەنتەرالیزما دەمۆکراسی هاتییە ئاڤا کرن، ژ بۆ ڤێ یەکێ ژی کۆنگرە، کۆنفەرانس و کۆمیتەیێن جودا یێن کاری دروست کرینە، لێ بەلێ گرینگیەکا وه‌ها دایە ئالیێ سەنترالیزمێ کو ئالیێ دەمۆکراسیێ د ناڤ دا هاتییە پشت گوهـ هاڤێتن، د ڤێ چارچۆڤێ دا رۆلا سەرۆک د سەر پارتیێ دا دبینن کو ب ڤی ئاوایی پەکەکە ژ پرەنسیپێن رێخستنەکا مارکسی هاڤێتیە دەر.
په‌كه‌كه ئاپۆی ل پێش كوردستانێ و كورداتیێ ددانیت
ب گشتی په‌كه‌كێ نەتەوە، نشتیمان و رێخستنا خوە ب هەبوونا سەرۆکی ڤە گرێدایە، بۆ میناک سلۆگانا «ئۆجالان – کوردستان» ژ ڤێ هزرا شاش و نەده‌مۆکراسی هاتییە وەرگرتن، هەر ئەڤە بوویە ئه‌گه‌ر کو پاش گرتنا ئۆجالان هەموو گرەڤێن ئالیگرێن پەکەکێ ب ڤان سلۆگانان بهێنه برێڤەبرن «بێ سەرۆک ژیان نابە»، «بژیت سەرۆک»، ئانکو ب ڤی ئاوایی پەکەکە ئۆجالان ل پێش کوردستانێ و کورداتیێ د دانە و هەموو ئالیگرێن خوە ژی ب ڤی ئاوایی پەروەردە دکەت، ب رەنگەکێ وه‌ها کو ئەڤ یەک ل جەم وان بوویە راستی و واقعەکێ بێ شک و گۆمان! پەکەکێ ب ڤان سلۆگانان کوردستان و کورداتی و هەر هەموو بهایێن ڤی نشتیمانی د کەساتیا ئۆجالان دا ب داوی ئینان و وەها ددەته دیار کرن کو بێ هەبوونا ئۆجالان کوردستانەک سەربخوە و ئازاد چ رامانک نابیت.
ئەڤ یەک تشتەکێ نوویە د دیرۆکا گەلێ کورد دا کو هەموو بهایان د یەک کەساتیێ دا ببینن و وه‌ها هزر بکه‌ن ئەڤ کەس ب تەنێ دکاریت کوردستانێ ئازاد بکەت و پێدڤییه هەر کەس ئیرادە و باوەرییا خوە رادەستی وی کەسی بکەت، لێ بەلێ د دیرۆکا جیهانێ دا ئەڤ یەک تشتەکێ نوو نینە، بەلکو به‌ری نها د ولاتەکێ مینا ئیرانێ ژی دا ل سەر دەما «رەزا شاهێ پەهلەوی» هەبوویە، سلۆگانا «خدا، شاهـ و میهن» ئانکو «خودا، شاهـ و نیشتیمان» ب وێ رامانێ کو پشتی حودێ، شاهـ ل نشتیمانی ب نرختر و پیرۆزترە، ل جەم پەکەکێ ژی ئەڤ یەک هاته تەسبیت کرن کو ئۆجالان ژ نیشتیمانی ب نرختر و پیرۆزترە.
چ کەس د پەکەکێ دا ناهێنه وەرگرتن هه‌تا خوە و ئیرادەیا خوە رادەستی ئۆجالان نەکەت
د پەکەکێ دا مینا هەموو پارتیێن دی یێن مینا وێ ئایدۆلۆژیک سەرۆک ب تەنێ بریارێ ددەت و هەمو كادر و ئەندامێن دی، چ ئەو ئەندامێن کو د کۆنگرەیان دا ژ بۆ سەرکرداتیێ دهێن هه‌لبژارتن و چ یێن دی، پێدڤییه بێ دودلی و پرسیار کرن فەرمانێن ئۆجالان جێبەجێ بکەن و چ کەسەکی ماف نینە ل همبەر بریارێن وی لاوازی و دودلیێ نیشان بدەت، ب رەنگەکێ وەها کو چ کەس د پەکەکێ دا ناهێت وەرگرتن تاکو ئەو کەس خوە و ئیرادەیا خوە رادەستی ئۆجالان نەکەت و کەساتیا خوە د ئۆجالان دا نەبینیت، ل سەر ڤێ یەکێ جەمیل باییک د پرتۆكا «دیرۆکەک ژ ئاگری» کو ل سەر دیرۆکا پەکەکێ هاتییە نڤیسین سەبارەت رۆلا سەرۆکاتیێ د ناڤا پەکەکێ دا دبێژیت: «سەرۆکاتیا مە ژ دەسپێکێ تیۆرییا شۆرشێ نڤیسییه و گرۆپ ژی دامەزراندییە و وی ب خوە ژی ئەڤ گرۆپ پەروەردە کرییە، هەیا نها ژی سەرکرداتی ب خوە سەرکێشیا رێخستنێ دکەت، دەما کو ئەمر و تەعلیمات بۆ مه دهاتن ئەو بەس بوون، دەم ل دەست مە کارێن خوە ئەنجام ددا، بێ کو چ گوفتۆگۆیەکێ ل سەر ئەنجام بده‌ین، ئەڤ یەک ژی ئالیەکێ پڕ گرنگە د پەکەکێ دا».
باوەریبوون ب سەرۆکاتیێ د ناڤا پەکەکێ دا دیاردەیەکا سروشتی نینە کو مرۆڤ بکاریت وەک رێخستنێن دی لێ بنێریت، سەرۆک د ناڤا پەکەکێ دا د سەر حزبێ دا یە هه‌تا وی رادەی کو دەما کەسەک وەک ئەندام د ناڤا پەکەکێ دا دهێته وەرگرتن، پێدڤییه یەکەم جار باوەری ب ئۆجالان هه‌بیت و ئۆجالان قەبوول بكه‌ت، هەروه‌ها وەک به‌ری نها مە ئاماژە پێ دای، پێدڤییه ئەو کەس خوە د جەستەیێ ئۆجالان دا ببینیت و وی د سەر نشتیمان و رێخستنێ دا ببینیت، ئانکو پێدڤییه ئۆجالان ل جەم وی کەسی ژ کوردستانێ پیرۆزتر بیت، ل دۆر ڤێ یەکێ جەمیل باییک دبێژیت: «د رێخستنێ دا سەرۆکاتی د هه‌نگاڤا یەکەم دا تێ قەبوول کرن، ل سەرۆکاتییا لینین بنێرن، هه‌تا سالا 1912ێ پاش سەرۆکاتییا لینین دهێته قەبوول کرن، راستە د گرۆپا بەلشەڤیک دا دهاته قەبوول کرن، لێ بەلێ د پارتییا کۆمۆنیستا رووسیا دا ئەڤ یەک نین، لێ بەلێ د دیرۆکا مە دا هەر ل رۆژا یەکەم هه‌تا نها سەرۆکاتی هاتییە قەبوول کرن».
ب بەرچاڤ وەرگرتنا ڤێ دیتنێ د چارچووڤێ ڤێ نەرینێ دا: « دەما تو هاتییه د ناڤا پارتیێ دا، دێ خوە و ئیرادەیا خوە تەسلیمی پارتیێ کەی و بێژی ئەز هاتیمە ئەرک و کار ل کۆدەرێ بیت و ئەز بچم کۆدەرێ، ئامادەمە ل گۆر بەرژەوەندیێن پارتیێ کار بکه‌م»، واتەیا کەسێ پارتی ئەڤەیه، ل دەرڤەی ڤێ یەکێ چ کەس ناهێت قەبوول کرن.
دبیت هەر ژبەر ڤێ شێوازێ تێهزرینێ بیت کو جەمیل باییک ل سالا 1996ێ بریار دای 7 گەریلا ب رەنگەکێ هەری هۆڤانە بهێن كوشتن، دەما ئەوان گەریلایان نەخواستی بچن وان جهێن ژ بۆ وان هاتینه دەست نیشان کرن كو ئەرکێ خوە جێبەجێ بکه‌ن و خواستی کو جهێ وان بهێته گوهەرین، لێ پشتی ئەڤ بابەت دگەهیته گوهێن جەمیل باییکی، باییك دبێژیت: «بەران بکه‌ن د شەلێن وان گەریلایان دا و وان پاڤێژن د رۆباری دا»، ئەڤ یەک میناکەک زیندییە ژ هەزاران میناکێن دی یێن وەکە ڤێ کو جەمیل باییک ب جوانێن کورد یێن ناڤا پارتیێ دا کرینه.
جەمیل باییک دیسان هەر د ڤێ پرتۆکێ دا دبێژیت: «د ناڤا پەکەکێ دا سەرۆک دکاریت گوهەرینان د بریارێن کۆنگری دا بکەت، خوە هه‌لبژارتنا ئەندامێن کۆمیتەیا ناڤەندی د کۆنگرەیان دا تشتەکێ شه‌کلی یە و هەر دەما سەرۆک بخوازیت دکاریت ئەندامێن د کۆنگره‌ی دا هاتینە هه‌لبژارتن ژ جهێ وان لادەت، یان ژی گوهەرینان د ناڤبەرا ئەندامێن هه‌لبژارتی یێن کۆنگره‌ی و کەسێن دی دا بکه‌ت، ژ بۆ ئیسبات کرنا ڤێ ئاخافتنا خوە ئەم دکارین ل ڤێ بریارا کۆنگره‌یا دویەمین یا پەکەکێ بنێرین: «کۆمیتەیا ناڤەندی یا هه‌لبژارتی، لێ بەلێ یا فەرمی نەبوو، تاکو ببیته کۆمیتەیەکا فەرمی پێدڤی بوو بۆ دەما ساالەکێ خه‌باتێ بكه‌ت و ب پراکتیکی خوە فەرز بکەت، دەستهلاتا ڤێ یەکێ ژی ب سەرۆکی هاته دان»، واتە ئەندامەتییا سەرۆکاتیێ ب تەنێ فەرمی بوو و یێن دی نەفەرمی بوون.
تشتێ ب ڤی رەنگی ب تەنێ د ناڤا پەکەکێ دا دهێته دیتن و د ناڤا چ پارتییەکا دی دا ناهێت دیتن، ژ بەر کو د پەکەکێ دا پرسا شۆرش و پارتی ل سەر هەموو تشتەکی دهێت دانان داکو پارتی و شۆرش نەکەڤن د خه‌ته‌رێ دا.
ب کورتی ئەم دکارین ڤێ یەکێ بەیان بكه‌ین کو ئۆرگانیزەکرنا پەکەکێ ل سەر رەنگێ دامەزراندنا مەکتەبا سیاسی «کۆنسەیا سەرکرداتیێ»، «کۆمیتەیا ناڤەندی» «سەرکرداتی» ل سەر کاغەزێ، ب وێ رامانێ ناهێت کو سەرۆک و ئەندامێن پەکەکێ باوەری ب وان ئۆرگان و بریاردانا ب کۆم هه‌بیت، بەلکو د پەکەکێ دا ب ڤی ئاوایی باوەری ب بریارا ب کۆم هەیە کو سەرۆک بریارێ ددەت و یێن دی جێبه‌جێ دکه‌ن.
