باشوورێ كوردستانێ ده‌ریێن سینۆری ل گه‌ل ئیرانێ گرتن

هه‌رێما باشوورێ كوردستانێ ئێڤارا ئیرۆ رۆژا دوشه‌می، هه‌موو ده‌ریێن سینۆری یێن ل گه‌ل كۆمارا ئیسلامییا ئیرانێ داخستن، وه‌كه‌ ئاماده‌كارییه‌ك ژ بۆ رێگرتنێ ل به‌لاڤبوونا ڤایرۆسا كۆرۆنایێ.

ئیرۆ رۆژا دوشه‌می 24/2/2020ێ ب فه‌رمانا ئه‌نجوومه‌نا وه‌زیران یا هه‌رێما باشوورێ كوردستانێ، هه‌موو ده‌ریێن سینۆری یێن ل ناڤبه‌را باشوورێ كوردستانێ و كۆمارا ئیسلامییا ئیرانێ هاتن قه‌پات كرن، وه‌كه‌ رێیه‌كێ ژ بۆ رێگرتنێ ل به‌لاڤبوونا ڤایرۆسا كۆرۆنایێ COVID-19.

ل گۆر فه‌رمانا حكوومه‌تا باشوورێ كوردستانێ، ده‌ریێن سینۆری ل ده‌مژمێر 16:00 یا ئێڤارا ئیرۆ ب ده‌ما هه‌ولێرا پایته‌ختا هه‌رێما باشوور هاتنه‌ گرتن. 

هه‌ر د ڤێ ده‌ربارێ دا، سبه‌ رۆژا سێشه‌می 25/2/2020ێ ئه‌نجوومه‌نا وه‌زیران ب سه‌رۆكتییا مه‌سروور بارزانی سه‌رۆكێ حكوومه‌تێ دێ جڤینا خوه‌ یا ئاسایی گرێده‌ت و تێدا دێ به‌هسا رێكار و پلانێن حكوومه‌تێ یێن به‌رهنگاربوونا كۆرۆنایێ بكه‌ت.