دو كه‌سێن نێزی جه‌میل باییك و موراد قارایلان هه‌ڤسه‌رۆك و ئه‌ندامێ كونسه‌یا رێڤه‌به‌را ئا كۆما جڤاكێن كوردستانێ كه‌جه‌كێ، سه‌یوانا سیاسییا په‌كه‌كێ، كه‌تن ده‌ستێ ده‌وله‌تا تركیێ.
ل گۆر چاڤكانیێن پێگه‌ها داركا مازی ل باكورێ كوردستانێ، دو گه‌ریلایێن پارتییا كاركه‌رێن كوردستانێ ژ بازنه‌یا پاسه‌وانێن جه‌میل باییك هه‌ڤسه‌رۆكێ كه‌جه‌كێ و موراد قارایلان ئه‌ندامێ كونسه‌یا رێڤه‌به‌ر ئا كه‌جه‌كێ ل باژارێ وانێ یێ باكورێ كه‌تن ده‌ست هێزێن جه‌ندرمه و هه‌والگیرییا ده‌وله‌تا تركیێ.
هه‌ردو گه‌ریلایان كو یه‌ك ژ وان ژنه، ل سالا 1996ێ ته‌ڤلی په‌كه‌كێ بووینه و ل هه‌ر یه‌ك ژ ناڤچه‌یێن زاپێ، مه‌تینا و گاره‌ی، حه‌فته‌نین، خواكورك و قه‌ندیلی چالاكی كرینه، پاش وه‌كه پاسه‌وان د هێلا نێزی موراد قارایلان و پاش جه‌میل باییك دا ئه‌رك وه‌رگرتبوون.
چاڤكانیێن پێگه‌ها داركا مازی ته‌سبیت كرن كو هه‌ردو گه‌ریلا ژ سینۆرێ ئیرانێ ده‌رباسی تركیێ بووینه، پشتی كو رێزێن پارتییا كاركه‌رێن كوردستانێ ب جی هێلاین.
چاڤكانیێن داركا مازی ل وانێ به‌حسا وێ یه‌كێ كرنه كو یه‌ك ژ وان گه‌ریلایان هاته زیندان كرن، یه‌كێ دن هێژان ل بن له‌كۆلینانه و وان د ئیفادێن خوه ده به‌حسا رێخستنا په‌كه‌كێ كرنه كانێ ب تو ئاوایی كه‌چ و زارۆیێن ل ژێر ته‌مه‌نا 18 سالیێ ب فێل و سۆزێن جودا د خاپینن و دبنه ناڤا رێخستنێ.
د به‌شه‌كا دن یا ئیفادێن وان گه‌ریلایان ده هاتییه گۆتن كو ل هه‌ر یه‌ك ژ باشوور و باكورێ ولات، هه‌ولا خوه‌كوشتنێ د ناڤا رێزێن گه‌ریلایان ده زه‌حف تێ دیتن.
