میلشیایێن گرێدایی سپایێ ده‌وله‌تا داگیركار یا تركیێ، ئیرۆ ئێریشی هنه‌ك مالێن هه‌رێما عه‌فرینێ یا رۆژئاڤا كوردستانێ كرن و زۆری ل ژنان كرنه.
نه‌رینگه‌ها سووریا یا مافێن مرۆڤان، ئیرۆ رۆژا یه‌كشه‌می 5-4-2020ێ ئه‌شكه‌ره كر كو میلیشیا و چه‌ته‌یێن گرۆپا ب ناڤێ «سۆلتان موراد» یا گرێدایی ده‌وله‌تا تركیێ، ئێریشی هنه‌ك مالێن هه‌رێما عه‌فرینێ كرنه و ترسه‌ك مه‌زن خستنه كۆلان و جادده‌یێن باژار.
چاڤكانیێن پێگه‌ها «داركا مازی» ل رۆژئاڤا كوردستانێ ل ڤێ ده‌ربارێ ده ده‌ست نیشان كرن كو چه‌ته‌یێن گرۆپا «سۆلتان موراد» د ئێریشا ئیرۆ ده، زۆری ل هنه‌ك ژنان كرنه ب تایبه‌ت ل وان مالێن كه‌تینه به‌ر ئێریشێ.
چه‌ته‌یێن گرۆپا «سۆلتان موراد» ژ بۆ كو ده‌ست ب سه‌ر وان مالا ده بگرن، ئه‌ڤ ئێریش پێكئانینه و ژ روونشتڤانێن وان مالا خوه‌ستن كو مالێن خوه چۆل بكن.
ل گۆر نه‌رینگه‌ها سووریا یا مافێن مرۆڤان، پاش وێ ئیریشێ هێزه‌كا دن یا ب ناڤێ پۆلیسێن له‌شكری كه‌تنه د ناڤا باژارێ عه‌فرینێ ده ژ بۆ رێگریكرنێ ل میلیشیایێن ئه‌ردۆگان، لێ به‌لێ ره‌وشه‌كه هه‌ری ب ترس هێژان ل جه‌م خه‌لكێ عه‌فرینێ هه‌یه.
