تركیێ گونده‌كێ ده‌ڤه‌را «نێروه ‌- رێكان» بۆردۆمان كر

باله‌فرێن جه‌نگ یێن ده‌وله‌تا داگیركار یا تركیێ، جاره‌كا دن ده‌ستدرێژی ل سه‌ر ناڤچه‌یێن باشوورێ كوردستانێ كرن، ب تایبه‌ت ل ئاقار وگوندێن سینۆرێ پارێزگه‌ها دهۆكێ.

چاڤكانیێن پێگه‌ها «داركا مازی» ل باشوورێ كوردستانێ ئیرۆ ئه‌شكه‌ره‌ كرن كو شڤێدی باله‌فرێن جه‌نگ یێن ده‌وله‌تا داگیركار یا تركیێ، ناڤچه‌یا ب ناڤێ «ده‌ریێ بێسه‌پێ» ئانكو ل ئاقارێ گوندێ «بێسه‌پێ»‌ ل ده‌ڤه‌را نێروه‌ رێكان بۆردۆمان كر.

هه‌روه‌ها دیار كرن، ئه‌ڤ ئێرش ل ده‌مژمێر 0:12 شه‌ڤ چێبوویه‌ و ئه‌گه‌ر ژ بۆ لڤینێن گه‌ریلایێن په‌كه‌كێ ل ناڤچه‌یێ ڤه‌دگه‌ریت و باله‌فران 3 مۆشه‌ك ل ئاقارێ گوندێ «بێسه‌پێ» دانه‌.

تێ زانین ل حه‌فتییا رابووری ژی، باله‌فرێن ده‌وله‌تا تركیێ ده‌ڤه‌را دۆسكیان بۆردۆمان كربوو، وه‌ختا كو مۆشه‌كه‌ك ل ئاقارێ گوندێ «گوند كۆسه‌» دای.

پاش ته‌باخا سالا 2019ێ په‌كه‌كێ لڤینێن خوه‌ ڤه‌گوهاستنه‌ ناڤا گوندان و ئه‌ڤ یه‌كه‌ بوویه‌ جهێ نه‌رازیبوونا خه‌لكێ ده‌ڤه‌رێ و ئه‌و دخوازن په‌كه‌كه‌ ژ گوندێن وان دوور بكه‌ڤیت ژ بۆ كۆ نه‌بنه‌ ئارمانجا هێرشێن تركیێ.