شاکر فەرمان بۆنجق و مستەفا سەلیمی!
د دەما رابووری دە بابەتا هەری گەرم کو د ناڤا راگهاندنێ ب گشتی دە و تۆرێن جڤاکی ب تایبەتی دە هاتی باس کرن، بابەتا رادەستکرنا مستەفا سەلیمی، زیندانیێ سیاسی یێ رۆژهلاتێ کوردستانێ بوو ژ ئالیێ یه‌كێتییا نشتیمانی ڤه بۆ دەستێ رەژێما ئیرانێ، ژ بۆ پەچنینا ڤێ راستیێ هەر زوو وەکە هەرجار مەدیایێن سەر ب پەکەکێ و یەنەکێ ڤە کەتن خەباتی ژ بۆ کو ڤێ یەکێ ب درەو دەرخن، هەرچەند کر و نەکر لێ ئەڤ یەک ژ بۆ وان نەچوو سەر، له‌ورا نەچار مان بابەتەک دن د ناڤا سۆشیال مەدیایێ دە گەرم بكن ئەو ژی بابەتێ کەسەکی ب ناڤێ “شاکر فەرمان بۆنجق” کو ژ ئالیێ هێزێن سەر ب خەلیفە حەفتەر یێ سەرۆکێ هێزێن نیشتیمانی یێن لیبیایێ ڤە هاتیە گرتن و وەکە پێشمەرگەیەکی هێزێن رۆژ یێن رۆژئاڤا کوردستانێ د دن نیشان دان، هەلبەت ئەڤ یەک ژی ژ بۆ پەچنینا خیانەتا رادەستکرنا مستەفا سەلیمی یە، ژ بەر کو هەر کەس دزانە پێشمەرگەیێن رۆژ ب چ ئاوا نەهاتنە شاندن ژ بۆ لیبیایێ.
یا سەیر د بابەتێ «شاکر فەرمان بۆنجق» دە ئەڤە کو ب چ ئاوا پەیڤدارێ هێزێن لیبیایێ بەلگەیەک یان ژی ئیعتیرافا کەسێ ناڤبووری یان ژی ناسنامەیەکێ کو ئیسبات بکە ئەو پێشمەرگەیێ هێزا رۆژە بەرچاڤ نەکرییە بەلکو ب تەنێ گۆتییە تركیێ ئه‌و ب كار ئانییه و شاندییه لیبیایێ.
ل ڤێ ده‌ربارێ ده، مه‌دیایا پارتییا كاركه‌رێن كوردستانێ و یه‌كێتییا نشتیمانییا كوردستانێ كه‌تن ناڤا هه‌ولێن مه‌زن ده ژ بۆ كو ناڤێ پێشمه‌رگه‌یێ رۆژ نه‌شرین بكن و وێنه‌یه‌كێ وها نیشا گه‌ل بدن كو پێشمه‌رگه‌یێ رۆژ هێز شاندنه لیبیایێ ژ بۆ كو ل گه‌ل میلیشیا و چه‌ته‌یێن ده‌وله‌تا داگیركار یا تركیێ شه‌ری ل دژی هێزێن خه‌لیفه حه‌فته‌ر بكن، لێ به‌لێ هه‌ر د زوو ده ئه‌ڤ هه‌ولێن وان راستی شكه‌ستنێ هاتن.
فه‌رماندارییا له‌شكرێ رۆژ: شاكر ب ت ئاوایه‌ك پێشمه‌رگه نه‌بوویه و ت تێكلییا مه پێره نینه
وه‌كه به‌رسڤ ژ بۆ ڤان هه‌ولێن چه‌واشه‌كاری یێن مه‌دیایا ئاراسته كری یا په‌كه‌كێ و یه‌نه‌كێ، پێشمه‌رگه‌یێ رۆژ هه‌ر د زوو ده راگهاندنه‌ك وه‌شاند و تێده گۆتییه كو هه‌ژماره‌كه پورتال و پێگه‌هـ و تورێن جڤاکی نووچه‌یا دەستەسەر کرنا «شاکر فرمان بونجق» ژ ئالیێ دەستهلادارێن لیبیایێ ڤە وه‌شاندنه کو ئەڤی کەسێ شەر ژ بۆ هێزێن کرێ گرتی یێن ده‌وله‌تا داگیركار یا ترکیێ کرییە.
هه‌روه‌ها فه‌رماندارێتییا پێشمه‌رگه‌یێ رۆژ ده‌ست نیشان كر كو هنه‌ك ژڤان مالپەران ئەڤ کەس ب بال هێزێن «لەشکرێ رۆژ» ڤە برنە، وەكه بزاڤه‌كه قرێژ و دەرفەتەک ژبۆ شکاندنا ناڤێ پیرۆزێ ڤێ هێزێ، لەورا مە ب فەر زانی هەموو ئالییان هایداری ڤێ زه‌لال كرنێ بكین:
ته‌كستا زه‌لال كرنا فه‌رماندارێتییا پێشمه‌رگه‌یێ رۆژ
کەسێ ناڤبووری ب ت ئاوا و تەرزەکی پێشمەرگە نەبوویه د ناڤا هێزێن مە ده، بەلکو نه ژ دوور و نه ژ نێزیك ت تێكلییه‌ك د نێڤبەرا وی وهێزێن مە ده نینە.
ناڤبووری ل گه‌ل ده‌ستپێكرنا شه‌رێ ناڤخوه یێ سووریێ ل گه‌ل مالباتا خوه و ب ده‌هان هه‌زار كه‌سان ژ گه‌لێ سووریێ ب ئه‌ره‌ب، كورد و كرستیان ڤه، په‌نابه‌ری باشوورێ كوردستانێ ببوو، پشتره چوویه ولاتێ تركیێ و ل ور بجی بوویه.
تێ زانی هێزا «لەشکرێ روژ» کو ب هێزەکه کوردستانی تێ ناس كرن، ژ بۆ بەرگری کرنێ ژ گەل و خاكا کوردستانا پیرۆز ل بەرانبەر هەر دوژمن ته‌رۆره‌كێ هاتییه ئاڤاكرن و ل بەراهییا هه‌موویان ته‌رۆریستێن رێکخستنا دائیشێ، د هەمان دەمێ ده پاراستنا ئارامی و ئه‌وله‌هییا کوردستانێ ب ئەرکا خوه زانی یە، له‌وما ئه‌ڤ هێز بوویه جیێ رێزگرتنا هه‌ر گەلەکێ جیهانی.
فه‌رماندارێتییا پێشمه‌رگه‌یێ رۆژ د زه‌لال كرنا خوه ده دبێژه: «ئەم وەکه گه‌لێ کورد رێزه‌كا هه‌ری تایبەت ل گەلێ لیبی دگرین و هەولێن قرێژ یێن وان ئالییان شه‌رمه‌زار دكین كو دخوازن ناڤێ پێشمه‌رگه‌یێ رۆژ نه‌شرین بكن و گرێدای هنه‌ك ئالییان بكن كو مه ت تێكلییه‌ك پێڤه نینه.
ئارته‌شا لیبیایێ: تركیێ ل به‌رانبه‌ر په‌ره‌یان شاكر شاندییه
ل ڤێ ده‌ربارێ ده، لیوا ئه‌حمه‌د مسماری به‌رده‌ڤكێ فه‌رماندارێتییا گشتی یا هێزێن لیبیایێ ئه‌شكه‌ره كر كو شاكر یه‌ك ژ كرێگرتیێن تركیێ یه و ئیستخباراتا تركیێ ل به‌رانبه‌ر په‌ره‌یان ئه‌و بكار ئانییه و شاندییه لیبیایێ.
هه‌روه‌ها ده‌ست نیشان كر، ژ بۆ وان جیێ هێبه‌تیێ یه كو كورده ل پال ته‌رۆریستان ڤه شه‌ر بكن، ژ به‌ر كو ئه‌و گه‌لێ كورد وه‌كه جه‌نگاوه‌رێن ئازادیێ دبینن.
یا راست ئه‌گه‌ر بابه‌تا كو «شاكر» وه‌كه كورد ژی هاتبه حه‌ساب كرن، مه‌دیایا په‌كه‌كێ و یه‌كێتیێ سه‌ركه‌تن نه‌ئانییه، ژ به‌ر كو كوردێن خه‌راب د ناڤا دائشێ ژی ده هه‌بوون و شه‌ر ل پال ته‌رۆریستان ل دژی گه‌لێ خوه كرن، لێ به‌لێ پێشمه‌رگه‌یێ رۆژ و پێشمه‌رگه‌یێ كوردستانێ هه‌موو یه‌ك ب یه‌ك كوشتن، له‌وما ئارمانجا سه‌ره‌كه یا مه‌دیایا په‌كه‌كێ و یه‌كێتیێ ب تایبه‌ت یا ل ژێر سیبه‌را لاهۆر جه‌نگی وه‌شانێ دكن، ته‌نێ په‌چنینا شه‌رمه‌زارییا راده‌ست كرنا مسته‌فا سه‌لیمی یه ب ره‌ژیما ب ئیرانێ.
گه‌لێ كورد پێشمه‌رگه‌یێ رۆژ ب خوه‌دیێ «داستانا خوه‌نه‌چه‌مینن» دزانه
گه‌لێ كوردستانێ پێشمه‌رگه‌یێ رۆژ ب سه‌مبۆلا پاراستنا كوردستانێ ژ داگیركار و خائینان دبینه، كانێ چاوا ل شه‌رێ سحێلا و مه‌حموودیێ ل ئۆكتۆبه‌را 2017ان به‌رسینگا وان هێزان گرت كو ل سایا سه‌رێ لاهۆر جه‌نگی و گرۆپا كالفان ب سه‌ر كوردستانێ ده گرتی و داستانا خوه نه‌چه‌مینن تۆمار كر، نها ژی پێشمه‌رگه‌یێ رۆژ ئاماده‌یه هه‌موو هه‌ولێن وان یێن قرێژ ژ ناڤ ببه‌ت، گه‌لێ كوردستانێ ژی ڤێ هه‌ولا نه‌شرینكرنا ناڤێ پێشمه‌رگه‌ی ب روو ره‌شی ژ بۆ خوه‌دیێن ڤێ هه‌ولێ دبینه.
