رزگار كێسته‌یی و حه‌سه‌ن شه‌ریف چا‌وا عه‌گیدێ سه‌رفه‌رماندارێ په‌كه‌كێ رزگار كر؟

ژ بیره‌وه‌ریێن شۆڕش و به‌رخوه‌دانێ

ژ په‌رتووکا «ل ژێر سیبه‌را چیا» به‌رگێ ئێکێ

د ڤێ مژارێ ده‌ كو ژ ئالیێ پێشمه‌رگه‌ و هۆزانڤانێ باشوورێ وه‌لات «رزگار كێسته‌یی» هاتییه‌ نڤیساندن، به‌حسا سه‌رده‌ما شۆرش و به‌رخوه‌دانێ دكه‌، هه‌روها كانێ ب ت ئاوا رزگار كێسته‌یی ل گه‌ل هۆرنه‌رمه‌ندێ باشوورێ كوردستانێ حه‌سه‌ن شه‌ریف، ل سالا 1984ێ ((عه‌گیدێ سه‌رفاماندارێ په‌كه‌كێ1)) كو ب ماهسووم کۆرکماز تێ ناس كرن و هه‌ڤرێیێن وی، ژ هه‌ولا كوشتنێ و مرنه‌كا مسۆگه‌ر رزگار كرنه‌.

سال 1984 بوو، وی ده‌می هێشتا ب دروستی هێلا ل ناڤبه‌را ده‌ڤه‌رێن رزگار کری (یێن ل بن کۆنترۆلا شۆڕشێ) و ده‌ڤه‌رێن بن کۆنترۆلا دوژمنی نه‌هاتبوونه‌ دیار کرن، هه‌رچه‌نده‌ هنده‌ک ده‌ڤه‌ر ب دروستی که‌فتبوونه‌ بن کۆنترۆلا شۆڕشێ و دوژمن هیچ نه‌ دگه‌هه‌شتێ، لێ ل هنده‌ک ده‌ڤه‌ران ژی، جار جار دوژمنی ب هێرشێن ئه‌ردی و ئه‌سمانی و تۆپبارانێ خوه‌ دگه‌هاندێ و هاتنوچوونا تومبێلا ژی ژ بۆ ڤان ده‌ڤه‌رێن ڕزگار کری هه‌رچه‌نده‌ یا کێم بوو لێ هه‌ر هه‌بوو.

رزگار كێسته‌یی د نڤیسا خوه‌ دا دبێژه‌: «حه‌سه‌ن شه‌ریف هه‌رچه‌نده‌ ل وی ده‌می یێ بچووک ژی بوو، لێ ئه‌و ب دزیڤه‌ ل گه‌ل هنده‌ک هه‌ڤالێن خوه‌ یێن موزیکڤان، ژ دهۆکێ هاتبوون و خوه‌ گه‌هاندبوونه‌ ناڤ شۆڕشێ و پشتی پشکداری د ئاهه‌نگا بیره‌وه‌رییا شۆڕشا گولانێ یا وێ سالێ دا کری، ل باره‌گایێ لقا ئێک یا پارتی دیمۆکراتی کوردستان و که‌رتێ به‌هدینان یێ پارتییا کۆمۆنیستا ئیراقی ل زێوا شکان، ل سه‌ر رووبارێ زێی ل باکوورێ ئامێدیێ، هه‌رچه‌نده‌ وی دڤیا هه‌ر هینگێ بمینیته‌ ل ناڤ شۆڕشێ و نه‌زڤڕیته‌ڤه‌ دهۆکێ، لێ پاش بزاڤه‌کا مه‌زن، مه‌ ئه‌و ڕازیکر کو جاره‌کا دی بزڤڕیته‌ڤه‌ دهۆکێ و به‌رده‌وامیێ ب خواندنا خوه‌ بده‌ت، ژ به‌رکو ئه‌و هێشتا یێ بچووکه‌ و پێدڤییه‌ بخوینیت، پشتی دووڤچوونه‌کا باش، مه زانی کو دوژمنی های ژ هاتنا وی یا ناڤ شۆڕشێ نینه‌، له‌وما مه‌ بڕیار دا وی بزڤڕینینه‌ڤه‌ دهۆکێ،‌ بۆ زانین 4 سالان پشتی هینگێ، ل سالا 1987ێ ئه‌و ب ئێکجاری هاته‌ ناڤ شۆڕشێ و بوو پێشمه‌رگه»‌.

رزگار كێسته‌یی وها به‌رده‌وام دكه‌: «ئه‌ز و ئه‌و ژ باره‌گایێ لقێ ل سه‌ر زیێ، ب ڕێ که‌فتین و د ناڤ ده‌ڤه‌را به‌رواری بالا ڕا (ل به‌ر مه‌تینی)، پشتی شه‌ڤه‌ک و رۆژه‌کێن ڕێ، مه‌ خۆ گه‌هانده‌ گوندێ کانی به‌لاڤێ، ئێدی ژ کانی به‌لاڤێ بۆ بامه‌ڕنێ – سه‌رسنکێ و دهۆکێ ڕێیا تۆمبێلێ هه‌بوو، هنده‌ک تۆمبێلێن کێم ژ دهۆکێ دهاتن، تایبه‌ت تا کو گوندێ دهێ، هه‌روه‌ها هنده‌ک تراکتۆرێن وان گۆندان ژی هه‌بوون، ل ناڤبه‌را وان گوندان و تا بامه‌ڕنێ ژی هاتنووچوون دکر، هه‌رچه‌نده‌ هه‌موو جاران تراکتۆر ب ده‌ست مرۆڤی نه‌ دکه‌فتن، کو مرۆڤ لێ سیار ببیت، لێ وێ جارێ مه‌ شانس هه‌بوو، هه‌ر ل گوندێ کانی به‌لاڤێ ته‌راکتۆره‌ک ب ده‌ست مه‌ که‌فت و ئه‌م لێ سیار بووین و به‌ره‌ڤ گوندێ دهێ ب ڕێ که‌فتین».

رزگار كێسته‌یی ئاماژه‌ دكه‌: «پشتی ئه‌م نێزیکی گوندێ که‌لاشخۆ بووین، مه‌ دیت کو 6 چه‌کدار ل سه‌ر ڕێ ڕاوه‌ستاینه‌، ب کار و کۆکێ وان مه‌ زانی کو نه‌پێشمه‌رگێن باشوورێ کوردستانێ نه‌، ل وی ده‌می پارتییا ڕزگارییا نه‌ته‌وه‌ییا کوردستان (کۆک) یا باکورێ کوردستانێ هێزه‌کا باش یا پێشمه‌رگه‌ی هه‌بوو، کو هه‌م دچوونه‌ باکور بۆ چالاکیێن خوه‌ و هه‌م ژی ل باشوور بزاڤ و باره‌گایێن وان هه‌بوون، په‌كه‌كه‌ ژی تازه‌ ئه‌و ساله‌ک بوو هنده‌ک گرۆپێن وان یێن گه‌له‌ک کێم ژ سووریێ و لبنانی هاتبوونه‌ ده‌ف مه‌، لێ گه‌له‌ک د بێ سه‌ر و به‌ر بوون و پڕانییا چه‌ک و جلک و خوارنا وان و هاریکارییا هاتنوچوونێ ژی مه‌ ددایێ».

په‌كه‌كێ بێ ئه‌گه‌ر و ژ خافله‌تیڤه‌، شه‌ڤه‌کێ ده‌ما کو پێشمه‌رگێن کۆمۆنیستان د خه‌و دا بوون، ئه‌و دابوونه‌ به‌ر شێلکا گوللـه‌یان و چه‌ند پێشمه‌رگێن وان شه‌هید و بریندار کربوون

رزگار كێسته‌یی وها دبێژه‌: «ڕاستی مه‌ ژی گۆمان بر کو ئه‌ڤ چه‌کدارێن هه‌نێ یێن ئێک ژ وان هێزێن باکوره‌، ئه‌م گه‌هه‌شتینه‌ راستێ و وان داخواز ژ مه‌ کر کو ئه‌م وان ل گه‌ل خوه‌ سیار بکه‌ین، مه‌ ژی ب خۆشحالی ڤه‌ سیار کرن و بخێر هاتنا وان کر، ژ به‌ر کو ئه‌و کوردێن پاڕچه‌یه‌کا دی بوون و مێڤانێن مه‌ بوون، مه‌ ب ئه‌رکێ خۆ دزانی کو خزمه‌ت و هاریکاریا وان بکه‌ین».

پشتی هه‌ر 6 ل تراکتۆرێ سیاربووین، ده‌ست ب ئاخفتنێ کر و پاشی ئێک ژ وان ده‌ست دا به‌ریكا چاکیتێ خوه‌، هنده‌ک رۆزێتێن کو وێنێ (ده‌لیل دۆغان)2، کو ل وی ده‌می سه‌مبۆلا له‌شکه‌ری یا په‌كه‌كێ بوو، ل سه‌ر بوو، دانه‌ مه‌ و من ژی ئێک ژ وان ب به‌ر سینگا خوه‌ ڤه‌کر، ئه‌م گه‌هه‌شتینه‌ گه‌لیێ دهێ، من دیت نێزیکی 40 تا 50 پێشمه‌رگێن پارتییا کۆمۆنیستا ئیراقێ یێ ل گه‌لی و ناڤ گوندی ل سه‌ر وێ جادێ، ده‌مێ من ئه‌و دیتین، تازه‌ من هه‌ست ب مه‌ترسیێ کر، چونکی به‌ری هینگێ ل هه‌فته‌نینێ3، هه‌ر چه‌نده‌ پارتییا کۆمۆنیستی په‌كه‌كه‌ د ناڤ باره‌گایێ خۆ دا ڤه‌حه‌واندبوون، لێ دیسان ژی په‌كه‌كێ بێ ئه‌گه‌ر و ژ خافله‌تیڤه‌، شه‌ڤه‌کێ ده‌ما کو پێشمه‌رگێن کۆمۆنیستان د خه‌و دا بوون، ئه‌و دابوونه‌ به‌ر شێلکا گوللـه‌یان و چه‌ند پێشمه‌رگێن وان شه‌هید و بریندار کربوون، له‌وما من هه‌ست کر کو نها دێ شه‌ره‌کی مه‌زن قه‌ومیت و گه‌له‌ک زه‌حمه‌ته‌ ئه‌ز ڤان شه‌ش چه‌کدارێن په‌كه‌كێ ژ ده‌ستێ پێشمه‌رگێن کۆمۆنیستا ڕزگار بکه‌م، من ڤیا به‌ری هه‌ر تشته‌کی حه‌سه‌ن شه‌ریفی ژ وێرێ دوور بێخم، چونکی هێشتا یێ بچووکه‌، ئه‌گه‌ر تشته‌ک چێببیت دا ئه‌و نه‌که‌ڤیته‌ ناڤ، بیرا من باش ناهێت من حه‌سه‌ن ڤرێکره‌ ماله‌کێ، یان سپارته‌ شۆفێرێ تومبێله‌کێ، لێ دزانم کو من ئه‌و ژ وێ گێله‌شۆکێ دوور ئێخست، بێی کو ئه‌و هه‌ست ب تشته‌کی بکه‌ت، باوه‌ر دکه‌م ئه‌و چوو دهۆکێ ژی و هه‌ر نه‌زانی کانێ چ د ناڤبه‌را من و هه‌ردو هێزان دا چێببوو.

وه‌ختا وان 6 چه‌كدارێن په‌كه‌كێ پێشمه‌رگه‌یێن كۆمۆنیستان دیتین، ژ رزگار كێسته‌یی خوه‌ستن وان نه‌هێله‌ بتنێ

رزگار كێسته‌یی سه‌رهاتییا به‌رده‌وام دكه‌: «گاڤا چه‌کدارێن په‌كه‌كێ ئه‌ڤ هێزه‌ دیتین گه‌له‌ک ترسیان و ژ من پرسین ئه‌ڤه‌ کینه‌؟ من گۆتێ: پێشمه‌رگێن پارتییا کۆمۆنیستن، وان داخواز ژ من کر کو ئه‌ز وان نه‌هێلمه‌ بتنێ، ژبه‌ر کو کۆمۆنیست ناهێلن ئه‌و هۆسا ب ساناهی و بێ زیان ده‌رباز ببن، من ژی سۆز دایێ کو نه‌هێلم چ زیان بگه‌هیته‌ وان». ئه‌و بخۆ قۆناغا من یا دوماهیێ دهێ بوو و بڕیار نه‌بوو ئه‌ز ژ وێرێ وێڤه‌تر بچم و وان ژی ب ڕێ ڤه‌ گۆتبوومه‌ کو وان دڤێت بچن بۆ گۆفکێ (نێزیکی باتووفا) و ده‌ربازی ده‌ڤه‌را زاخۆ ببن وبچن بۆ گه‌لیێ هارینا، ل چیایێ سپی کو باره‌گایێ (ل.ن. زاخۆ یا پارتی) لێ بوو، له‌وما ئێدی من ژی ل ده‌ف خۆ بڕیار دا کو ئه‌ز ل گه‌ل وان بمینم و ژ تراکتۆرێ په‌یانه‌بم، چونکی هه‌ما ئه‌ز په‌یا بووم، ئه‌و دێ بنه‌ ئارمانجه‌کا ب ساناهی بۆ پێشمه‌رگێن کۆمۆنیستا، دڤی ده‌می دا به‌رپرسه‌کی پێشمه‌رگێن کۆمۆنیستان کو که‌سه‌کی عه‌ره‌ب بوو، لێ ناڤێ وی ل بیرا من نه‌مایه‌، ل گه‌ل 4 پێشمه‌رگێن دی هاتنه‌ پێشیا مه‌ و سلاڤ کرنه‌ من و داخواز ژ من کرن کو ئه‌و حه‌ز دکه‌ن ئه‌ز په‌یاببم، دا بابه‌ته‌کی ل گه‌ل من گفتوگۆ بکه‌ن، لێ من زانی وان دڤێت من ژ چه‌کدارێن په‌كه‌كێ دووربێخن، له‌وما من گۆتێ: ببوورن ئه‌زێ بله‌زم، دڤێت زوو ده‌رباز ببم، پشتی وان زانی کو ئه‌ز هه‌ر په‌یا نابم گۆتنه‌ من: ئه‌ڤه‌ کینه‌ ل گه‌ل ته‌؟ من گۆتێ: چ مایێ وه‌ تێناچیت، ئه‌ڤه‌ هه‌ڤالێن منن و ئێمانه‌تێ منن، پاشی وان گۆتنه‌ من: ئه‌ڤه‌ په‌كه‌كه‌ نه‌ و به‌ری چه‌ند رۆژه‌کان وان هه‌ڤالێن مه‌ یێن شه‌هید کرین، ڤێجا ئه‌م حه‌ز دکه‌ین تۆ ژ ناڤ وان ده‌رکه‌ڤی و مایێ خوه‌ د مه‌ و وان نه‌که‌ی، کارێ مه‌یێ ب ڤانا هه‌ی، من ژی گه‌له‌ک ب دژواری گۆتێ: هندی ئه‌زێ ساخ بم که‌سه‌ک ژ وه‌ نه‌شێت نێزیکی ڤان ببیت و ئه‌گه‌ر نه‌مام ساخ ژی هوون و ئه‌و پێکڤه‌ دزانن و باش ژی بزانن بچووکترین ده‌ستدرێژی ل سه‌ر ڤانا ده‌ستدرێژییه‌ ل سه‌ر مه‌، وان گه‌له‌ک کر و گۆت و گۆتنه ‌من: هه‌ڤالو ئه‌م و هووین پێکڤه‌ یێن د به‌ره‌یه‌کی دا (به‌ره‌یێ جود) و ل گۆره‌ی بنه‌مایێن به‌ره‌ی چ هێزا ده‌ستدرێژیێ بکه‌ته‌ سه‌ر کێ ژ مه‌ دڤێت هێزا دی به‌ره‌ڤانیێ ژێ بکه‌ت و ئه‌ڤه‌ تۆ دروست به‌رۆڤاژی بنه‌مایێن به‌ره‌ی کار دکه‌ی، هێزه‌کا بیانی یا هاتی هه‌ڤالێن مه‌ یێن شه‌هید کرین، نه‌به‌س تۆ به‌ڕه‌ڤانیێ ژ مه‌ ناکه‌ی، لێ تۆ یێ کوژه‌رێن پێشمه‌رگێن مه‌ دپارێزی، من گۆتێ: درێژکرن پێ نه‌ڤێت و خۆ ژ ره‌خێن مه‌ بده‌نه‌ پاش و من گۆته‌ شۆفێرێ تراکتۆرێ: هه‌ڕه‌ و ئه‌م که‌فتینه‌ ڕێ و وان ژی ژ دوورڤه‌ هه‌ر ته‌ماشه‌ی مه‌ دکر».

وه‌ختا خه‌ته‌ر نه‌مایی، چه‌كدارێن په‌كه‌كێ ژ نوو گۆتن، پێشمه‌رگه‌یێن كۆمۆنیست ترسنۆكن، گه‌ر ببا شه‌ر ژی مه‌ دكار وان بشكێنن

رزگار كێسته‌یی دبێژه‌: «گاڤا ئه‌م ل چه‌پا رۆژهه‌لاتێ دهێ زڤڕین، تازه‌ خوین هاته‌ له‌شێ هه‌ر 6 چه‌کدارێن په‌كه‌كێ و شیان باخڤن، پێشیێ ب سه‌رێ لێڤا وان سپاسییا من کرن و پاشی ژی ده‌ست هاڤێتنه‌ ناڤ دخوه‌دانێ و گۆتن: کۆمۆنیست ترسنۆ‌کن و نه‌وێرنه‌ مه‌ و ئه‌گه‌ر ببا شه‌ڕ مه‌ دکاری وان بشکێنین، من ژی گۆتێ: ته‌مام ماده‌م هوون هۆسا مێرچاکن، پیدڤی ناکه‌ت ئه‌ز ل گه‌ل وه‌ بێم و ئه‌زێ ل ڤێرێ په‌یا ببم و بزڤڕمه‌ڤه‌ و هوون ژی به‌رده‌وام بن ل سه‌ر ڕێیا خوه‌، ئیدی بوو زاڕ زارا وان و گۆتن: نا هه‌ڤال تۆ دێ چه‌وا مه‌ بهێلی، ئه‌م ئێمانه‌تێ ته‌نه‌ و ئه‌م ڕێ نزانن، من ژی گۆتێ: باشه‌ لێ بیده‌نگ بن، تا کو من گه‌هاندینه‌ گوندێ گۆفکێ و ل وێرێ من ئه‌و سپارتنه‌ به‌رپرسێ به‌رگری مللی و من گۆتێ: ئه‌ڤه‌ ئێمانه‌تێ وه‌نه‌ و چه‌ند که‌سه‌کێن بنه‌جی بده‌نه‌ ل گه‌ل تا کو دگه‌هنه‌ گه‌لیێ هارینا باره‌گایێ لژنا زاخۆ و ئه‌ز ژی زڤڕیمه‌ڤه»‌.

مه‌ عه‌گیدێ سه‌رفه‌رماندارێ په‌كه‌كێ ژ مرنه‌کا مسۆگه‌ر رزگار کر، بێی کو ئه‌م وی بناسین

رزگار كێسته‌یی ڤێ سه‌رهاتییا راست به‌رده‌وام دكه‌ و دبێژه‌: «چه‌ند ساله‌ک ده‌ربازبوون پشتی ئه‌نفالێن ڕه‌ش ئه‌م ل که‌مپا ئامه‌دێ ل باکوورێ کوردستانێ بووینه‌ په‌نابه‌ر، ئێدی مه‌ دۆست و هه‌ڤال ل ناڤ باژێری په‌یدا کربوون و تێکه‌لییا مه‌ و وان گه‌له‌ک زێده‌ببوو، رۆژه‌کێ ئه‌ز و حه‌سه‌ن شه‌ریف ل مالا هه‌ڤاله‌کی ئامه‌دی بووین، وی ژی کاسێته‌کا ڤیدیۆیێ دانابوو سه‌ر، ل سه‌ر ژیانا سه‌رفه‌رماندارێ له‌شکه‌ریێ په‌كه‌كێ عه‌گیدی، هنده‌ک ڤیدیۆ و وێنێن وی یێن جۆر ب جۆر ژی نیشان ددان، حه‌سه‌نی ژی گۆته‌ من: باش ته‌ماشه‌ بکه‌، کا ته‌ ئه‌ڤ مرۆڤه‌ به‌ری نوکه‌ نه‌دیتیه‌؟ ده‌ما من ب وی چاڤی لێ نێڕی من زانی نه‌ یێ غه‌ریبه‌، لێ من نه‌زانی من ل کیرێ دیتیه‌، ده‌ما حه‌سه‌نی گۆتییه‌ من: بیرا ته‌ ل وان 6 چه‌کدارێن په‌كه‌كێ دهێت یێن مه‌ ژ کانی به‌لاڤێ ل گه‌ل خوه‌ سیار کرین؟ ئێکسه‌ر هاته‌ پێش چاڤێن من، کو که‌سێ رۆزێتێن ده‌لیل دۆغانی داینه‌ مه‌ و به‌رپرسێ وی گرۆپی، ئه‌ڤ عه‌گیده‌ بوو، ئاها وه‌ها مه‌ عه‌گیدێ سه‌رفه‌رماندارێ په‌كه‌كێ ژ مرنه‌کا مسۆگه‌ر رزگار کر، بێی کو ئه‌م وی بناسین».

پێشمه‌رگه‌ی سه‌رفه‌رماندارێ په‌كه‌كێ ژ مرنه‌كا مسۆگه‌ر رزگار كر، لێ مخابن په‌كه‌كێ كۆمه‌كا كادر و رۆشه‌نبیرێن پێشمه‌رگه‌ وه‌ختا كو خوه‌ستین ده‌ربازی باشوور ببن ژ بۆ خه‌باتا ل دژی ره‌ژیمێ، ب ئاوایه‌كی هۆڤانه‌ شه‌هید كرن

وژدانا من ژی گه‌له‌کا ئارامه‌، کو من وێ رۆژێ نه‌هێلایی خوینا جه‌نگاوه‌ره‌کێ کورد و هه‌ڤالێن وی بده‌ستێ هێزه‌کا دی یا شۆڕشگێر بێته‌ ڕشتن

رزگار ل داویێ دبێژه‌: «لێ مخابن په‌كه‌كێ ئه‌ڤه‌ تێنه‌دیت و گه‌له‌ک نانکۆر ده‌رکه‌فتن و ئێکسه‌ر پشتی ئه‌نفالێن ڕه‌ش و ل نه‌ورۆزا سالا 1989 کۆمه‌کا کادرێن مه‌ یێن رۆشنبیر و بژاره‌ (ئدریس جه‌رجیس (احمد کادر)4، سه‌عدوللا‌ ئاڤده‌ل5، محه‌مه‌د حه‌مدی6، نزار محه‌مه‌د سلێمان7، خالد وه‌رمێلی8 و نه‌زمی وه‌رمێلی9)، ده‌ما کو دڤیان ڤه‌گه‌ڕنه‌ ده‌ڤه‌رێ و خه‌باتێ ل دژی به‌عسییان ده‌ست پێ بکه‌نه ‌ڤه‌، په‌كه‌كێ ل سه‌ر داخواز و ب هه‌ڤکارییا ئه‌منا به‌عسییان، ب ئاوایه‌كێ غه‌دار و خیانه‌تکاری ل گوندێ شیڤ ڕه‌زانا ل سه‌ر سینۆرێ باکور و باشوور ئه‌و گرتن و ب شێوه‌یه‌کی هۆڤانه‌ شه‌هید کرن. لێ وژدانا من ژی گه‌له‌کا ئارامه‌، کو من وێ رۆژێ نه‌هێلایی خوینا جه‌نگاوه‌ره‌کێ کورد و هه‌ڤالێن وی بده‌ستێ هێزه‌کا دی یا شۆڕشگێر بێته‌ ڕشتن، هه‌ر چه‌نده‌ پشتی وێ ڕوودانێ ب 2 سالان عه‌گید ژی، ب شێوه‌یه‌کی جهێ گۆمانێ، ب ده‌ستێ زێره‌ڤانه‌کی خوه‌ ل هه‌رێما بۆتانێ هاته‌ شه‌هید کرن».

 (1) ماهسووم کۆرکماز (عه‌گید) ل سالا 1956ێ ل سلیڤانا سه‌ر ب ئامه‌دێ ل باکورێ کوردستانێ هاتییه‌ دنیایێ. سه‌رله‌شکه‌رێ چه‌کدارێن په‌كه‌كێ بوو، ل رۆژا 28/3/1986 ل هه‌رێما شه‌رنه‌خێ ژ ئالیێ زێره‌ڤانه‌کی وی بخوه‌ ڤه‌ هاته‌ کوشتن.
(2) ده‌لیل دۆغان ل سالا 1957ێ ل گوندێ تامانا سه‌ر ب خارپێتێ ڤه‌ ل باکورێ کوردستانێ هاتییه‌ دنیایێ، ئێک ژ کادرێن ده‌ستپێکێ یێن په‌كه‌كێ بوو، ل سالا 1981ێ هه‌ر ل نێزیکی گوندێ تامانێ هاته‌ کوشتن.
(3) هه‌فته‌نین، گه‌لیه‌که‌ دکه‌ڤیته‌ باکورێ گوندێ که‌شانا ده‌ڤه‌را باتیفێ، ل نێزیکی سینۆرێ باکورێ کوردستانێ و زۆمێن گوندێ ناڤبرینه‌، هه‌ر ژ ده‌ستپێکا شۆڕشا گولانێ، وه‌ک بنگه‌هێن پێشمه‌رگه‌ی هاتییه‌ بکارئینان، پشتی ئه‌نفالێن 1988 و تا نها ژی به‌رده‌وام چه‌کدارێن په‌كه‌كێ ئه‌و ده‌ر وه‌ک بنگه‌هه‌کی خوه‌ یێ سه‌ره‌کی، ل باشورێ کوردستانێ، بکارئینایه‌.
(4) ئدریس جه‌رجیس ئیبراهیم، ناسیار ب (ئه‌حمه‌د کادر)، ل سالا 1953ێ ل گوندێ به‌ربیرا ژووری ل ده‌ڤه‌را شێخان هاتییه‌ دنیایێ، ل 1974-1975 بوویه‌ پێشمه‌رگه‌، ل 26/5/1976 جاره‌کا دی په‌یوه‌ندی ب رێخستنێن پارتی کریه ‌ڤه، پشتی شکه‌ستنا 1975ێ به‌رده‌وامی دایه‌ خواندنا خوه‌ ل مووسلێ، تا کو گه‌هه‌شتییه‌ قۆناغا سێیێ ل کۆلیژا زانستی پشکا ماتماتیکێ ل زانکۆیا مووسلێ، پاشی ئه‌منا به‌عسییان فه‌رمانا گرتنا وی دایه‌، لێ ئه‌و شیا ل رۆژا 10/12/1979ێ خوه‌ بگه‌هینته‌ ناڤ شۆڕشێ و ئه‌و بوویه‌ پێشمه‌رگه‌ و پاشی ژی کادر، ل 1984 بوویه‌ کارگێڕێ لژنا ناڤچا دهۆکێ و پاشی چه‌ند به‌رپرساتیێن دی وه‌رگرتینه‌، ل ئه‌نفالێن 1988ێ مایه‌ ل سه‌ر سنۆرێ باکور و باشوورێ کوردستانێ ل ده‌ڤه‌را چه‌لێ، ژ بۆ به‌رده‌وامی دان ب ئه‌رکێ پێشمه‌رگاتیێ، ل رۆژا 29/3/1989 ل نێزیکی گوندێ شیڤڕه‌زانێ ژ ئالیێ چه‌کدارێن په‌كه‌كێ ڤه‌ ل گه‌ل 5 هه‌ڤالێن خوه‌، ب غه‌در هاتنه‌ شه‌هید کرن، ناڤبری که‌سه‌کی رۆشنبیر بوو و هه‌رده‌م بزاڤ دکر زانینێ د ناڤ هه‌ڤالێن خوه‌ دا به‌لاڤ بکه‌ت.
(5) سه‌عدوللا ئاڤده‌ل سه‌عدۆ، ل سالا 1954ێ ل گوندێ غلبیشێ ل ده‌ڤه‌را بامه‌ڕنێ هاتییه‌ دنیایێ، ل سالێن 1970ێ یان ئێک ژ کادرێن چالاکێن ئێکه‌تییا قوتابیێن کوردستانێ بوویه، ل 21 شوباتا 1980ێ بوویه‌ پێشمه‌رگه‌ و پاشی بوویه‌ کادرێ بێته‌لێ و پاشی ژی بوویه‌ کارگێڕێ لژنا ناڤچا زاخۆ، هه‌لبه‌ستڤانه‌کی زیره‌ک بوو، 2 دیوانێن وی یێن هه‌لبه‌ستان ب ناڤێ (خوین و ئازادی – سه‌مفۆنیا خه‌ون و خه‌یالان) چاپ بووینه‌، ل رۆژا 29/3/1989ێ ل گه‌ل 5 هه‌ڤالێن خوه‌ یێن کادر و پێشمه‌رگه‌، ب شێوه‌یه‌کی بێبه‌ختی ژ ئالیێ چه‌کدارێن په‌كه‌كێ ڤه‌ ل نێزیکی گوندێ شیڤڕه‌زانا ل سه‌ر سینۆرێ باکور و باشوور هاته‌ شه‌هید کرن.
(6) محه‌مه‌د حه‌مدی ل سالا 1949ێ ل گوندێ وه‌رمێلێ ل ده‌ڤه‌را بامه‌رنێ هاتییه‌ دنیایێ، ل 1967-1975ێ پێشمه‌رگه‌ بوویه‌، ل ده‌ستپێکا شۆڕشا گولانێ بوویه ‌ڤه‌ پێشمه‌رگه‌ و کادرێ له‌شکه‌ری کو پاشی بوو به‌رپرسێ ڕێکخراوه‌کا پێشمه‌رگه‌ی، تا کو 1988ێ، ل ده‌مێ ئه‌نفالان خوه‌ ل چیایێن سه‌ر سنۆرێ باکور و باشوورێ کوردستانێ ڕاگرت، ل گه‌ل کۆمه‌کا هه‌ڤالان، ژ بۆ کو به‌رده‌وامیێ بده‌نه‌ خه‌باتێ، لێ ل رۆژا 29/3/1988 ل گوندێ شیڤڕه‌زانا سه‌ر سینۆری، ژ ئالیێ چه‌کدارێن په‌كه‌كێ ڤه‌، ل گه‌ل 5 هه‌ڤالێن خوه‌ تێنه‌ شه‌هید کرن.
(7) نزار محه‌مه‌د سلێمان، ل سالا 1966ێ ل گوندێ خرابیا، ل ده‌ڤه‌را زاویته‌ هاتییه‌ دنیایێ، 1979ێ بوویه‌ ئه‌ندامێ ڕێخستنێن نهێنی یێن پارتی ل ناڤ دهۆکێ، 29/8/1982ێ بوویه‌ پێشمه‌رگه‌ و پاشی بوویه‌ کادر، ل رۆژا 29/3/1989ێ ل گوندێ شیڤڕه‌زانێ ژ ئالیێ چه‌کدارێن په‌كه‌كێ ڤه‌، ل گه‌ل 5 هه‌ڤالێن خوه‌ تێنه‌ شه‌هید کرن.
(8) خالد ئاده‌م حسێن، ل سالا 1966ێ ل گوندێ وه‌رمێلێ ل ده‌ڤه‌را بامه‌رنێ هاتیه‌ دنیایێ، 1988 بوویه‌ پێشمه‌رگه‌، ل رۆژا 29/3/1989ێ ل گوندێ شیڤڕه‌زانێ ژ ئالیێ چه‌کدارێن په‌كه‌كێ ڤه‌، ل گه‌ل 5 هه‌ڤالێن خوه‌ تێنه‌ شه‌هید کرن.
(9) نه‌زمی ئه‌حمه‌د چۆلی، ل سالا 1969ێ ل گوندێ وه‌رمێلێ ل ده‌ڤه‌را بامه‌رنێ هاتییه‌ دنیایێ، 1986ێ بوویه‌ پێشمه‌رگه، ل رۆژا 29/3/1989 ل گوندێ شیڤڕه‌زانێ ژ ئالیێ چه‌کدارێن په‌كه‌كێ ڤه‌، ل گه‌ل 5 هه‌ڤالێن خوه‌ تێنه‌ شه‌هید کرن.

ئه‌ڤ مژار و وێنه‌ بێ ده‌ستووری ژ ئه‌كاونتا فه‌یسبووكێ یا پێشمه‌رگه‌ و هه‌لبه‌ستڤان رزگار كێسته‌یی هاتنه‌ وه‌رگرتن

پوستێن ھەمان بەش