راستیا مەشا خەلکێ بنارێ قەندیلێ ژ بۆ زینی وەرتێ  و درەوێن پەکەکێ

راستیا مەشا خەلکێ بنارێ قەندیلێ ژ بۆ زینی وەرتێ  و درەوێن پەکەکێ

پشتی ئالۆزبوونا رەوشا قادا زینی وەرتێ ب سەدەما بۆمبەبارانا دەولەتا داگیرکار ئا ترکیێ و گەفێن سەرکردێن پارتیا کارکەرێن کوردستانێ ب تایبەتی پشتی داخویانیا دۆران کالکان کو ب یەک ژ سەرکرەدیێن گرۆپا ئەنقەرێ تێ ناسکرن، ژ بۆ دەست پێکرنا شەرێ براکوژی ل ڤێ قادێ خەلکێ مەشەک ژ بۆ زینێ وەرتێ دەست پی کر، لێ وەکە هەرجار مەدیایا پەکەکێ ئەڤ خەبەر د بەرژەوەندیا خوە دە بەلاڤکر و راگهاند «مەش ژ بۆ دژاتی کرنا هەبوونا پێشمەرگەیان ژ ئالیێ خەلکێ وەرتێ هاتیە لدارخستن» پەکەکێ ب مانشێتێن مەزن د رۆپەلێن خوە یێن راگهاندنێ دە نڤیساند « گەل ژ پێشمەرگەیان رە دبێژن ئەم وە ل ڤڕ ناخوازین» لێ بەلێ 24 سائەت دەرباز نەبوون و راستیا ڤێ درەوێ ژی هات ئیسبات کرن.

راستە هنەک کەسان ل وەرتێ مەشەک ئەنجامدایە لێ بەلێ ئەڤ مەش ب ت ئاوا ژ بۆ دژاتیکرنا هەبوونا پێشمەرگەیان نەبوویە وەکە د راگهاندنا پەکەکێ دە دهێت باس کرن، یا راست کەسێن مەش ئەنجام دای ژی هەموو نە خەلکێ وەرتێ بوون بەلکو هەژمارەک ژ خەلکێ ناڤچەیا راپەرین و گوندێن دەردوورا وێ بوون د گەل ٧ هەیا ٨ کەسێن خەلکێ وەرتێ و ب ت ئاوا ڤان کەسان داخوازا نەمانا پێشمەرگەیان نەکر بەلکو داخواز کر ناڤچە نەبە جیێ شەر و پێکدادانێن سەربازی، وان داخواز ژ پەکەکێ و پێشمەرگەیان هەردویان کر ناڤچەیێ بجی بهێلن.

موسلح زرار، ناڤچەدارێ وەرتێ ژ بۆ پێگەها «دارکا مازی» داخویانی دا و راگهاند «کەسێن مەش پێک ئانی هەموو نە خەلکێ وەرتێ نە بەلکو ئەڤ کەسانە ل ناڤچەیا راپەرین و گوندێن دەردوورا وێ هاتینە و ب تەنێ هەژمارەک هندک کو دناڤبەرا ٧ هەیا ٨ کەسان ب تەنێ خەلکێ وەرتێ دگەل دە بوونە و ب ت ئاوا ئەڤ کەسە نەچوونە سەر پێشمەرگەیان وەکە د مەدیایێن پەکەکێ دە تێ باس کرن».

مەشێن ب ڤی ئاوا دبە ل هەر جیەکێ دنێ تشتەک نۆرمال بە لێ یا ڤێ مەشێ نە نۆرمال و خەتەر دکە ئەڤە کو پارتیا کارکەرێن کوردستانی وەکە هەر جار دەست ب بەلاڤکرنا پرۆپاگەندا و درەوان کر ل سەر ڤێ مژارێ و ئەڤ مەشە وەکە مەشەک ژ بۆ دژاتیکرنا پارتیا دەمۆکرات ئا کوردستانی دا نیشاندان و مەش ب مولکێ خوە زانی.

پشتی کو خەلکێ مەشەک دەست پی کری هەر زوو پەکەکێ وەکە هەرجار هنەک وێنەیێن ئۆجالانێ رێبەرێ پەکەکێ کو نها د زندانا ئیمرالیێ دەیە دانە دەست زارۆیێن بچووک تاکو هنەک وێنەیان بگرن و د مەدیایێن خوە و سۆسیال مەدیایێن خوە دە وەها ب گەل بدن زانین کو گەل ل دژی هەبوونا پەدەکێ و دگەل هەبوونا پەکەکێ دەنە، لێ بەلێ ئەڤ پرۆپاگندا وان ئەڤجا چ ب زانین بە یان ژی ب نەزانین بە، هەر ژ ئالیێ وان ب خوە ڤە هات درەواندن.

ئاژانسا ANHA یا پەکەکێ د راپۆرەکێ دە کو وێنەیەکێ مەشێ تێدە دانیبوو راگهاند کو خەلکێ بنارا قەندیلی ل دژی هەبوونا پێشمەرگەهان مەشەک ل دار خست لێ بەلێ پاشان ڤیدیۆیەک مۆنتاژ کری ژی بەلاڤ کر کو تێدە ب زەلالی دیار دبە کەساتی و ری سپیێن بنارێ قەندیلێ داخواز دکن بارەگایێن پەکەکێ ب خوە ل وێ قادێ نەمینن.

د پارچە ڤیدیۆیا هاتی بەلاڤکرن دە دیارە کو خەلک دخوازە دگەل پێشمەرگەیان بجڤە و فەرماندارەک پێشمەرگەیان ژ خەلکێ رە دبێژە فەرمۆن کەسەک یان دو یان ژی هوون چەند کەس دخوازن وەرن و ئەمێ ب هەڤرە ل سەر هەر تشتی بپەیڤن، پشتی فەرماندارێ بەرپرس ژ پێشمەرگەیان تێ و دگەل ری سپی و ماقوولێن ناڤچەیێ روودنێ ب حەنەکان دەست ب نیقاشێ دکن.

پیرەکالەک کو نایێ زانین موختارە یان ژی کەسەک دنە وەکە نوونەرێ خەلکێ ب فەرماندارێ پێشمەرگەیان رە دبێژە: مە رابردوویەک نەخوەش ژ شەرێ براکوژی هەیە، مە ئەوقاس تبلێن هەڤ شکاندینە کو ب راستی ئەم وەکە هەم ولاتیێن ناڤچەیی هەست ب بەرپرساتیێ دکین، و داخوازی ژ وە دکین هوون هەر دو ئالی «پێشمەرگە و گەریلا» لهەڤهاتنەکێ ل سەر بکن و ڤێ ناڤچەیێ ب جی بهێلن و مە دلگران نەکن و هوون ب خوە ژی برایێن هەڤن تبلێن هەڤ نەشکێنن، ئەڤ داخوازا مەیە، «بەرسڤا فەرماندارێ پێشمەرگەیان هاتیە قوت کرن»، ئەم وەکە هەم ولاتی هاتینە جەم وە و داخواز دکین هەر دو ئالی ناڤچەیێ نەکن ناڤچەیەک سەربازی، ل ڤێ ناڤچەیێ نە نەفت هەیە، نە غاز هەیە نە ژی جیەکە سینۆری یە، نە ژی ت خەتەرەیەک ل سەر ناڤچەیێ هەیە، ئەز ل ڤڕ ژ دایک بوومە، هەر رۆژ وەسائیتێن بارهلگر ل ڤێ ناڤچەیێ بێ پرسگرێک دەرباز دبن، چ خەتەرەیەک ل ڤێ ناڤچەیێ هەیە کو هوون دو ئالی بهێن ڤێ ناڤچەیی و پرسگرێکان هەم ژبۆ خوە هەم ژ بۆ مە دروست بکن، ئەم وەکە هەم ولاتی هاتیە و دخوازین هکوومەتا هەرێمێ داخوازا مە قەبوول بکە و ناڤچەیێ بجی بهێلن، نها ئەمێ بچێن ڤێ داخوازێ ژ پەکەکێ ژی بکین، ئەمێ ب پەکەکێ رە ژی ببێژین ئەڤ ناڤچە ناڤچەیا خوەدیکرنا تەرش و تەوالە، ناڤچەیا سەیرانێن خەلکێ یە، ناڤچەیا کەنگر و و گیایێن بهاری یە.