خوه‌پێشاندان ژ بۆ ئازادكرنا گه‌نجه‌كێ دهۆكێ ژ ده‌ست په‌كه‌كێ تێ كرن
ژ بۆ ئازاد كرنا خۆرته‌كێ پارێزگه‌ها دهۆكێ ژ ده‌ست پارتییا كاركه‌رێن كوردستانێ په‌كه‌كێ، ئیرۆ ل ناڤچه‌یا چه‌مانكێ خوه‌پێشاندان هات ئه‌نجام دایین، خوه‌پێشانده‌ران خوه‌ست، چاره‌نڤیسا وی خۆرتی وه‌ره ئه‌شكه‌ره كرن و په‌كه‌كه وی سه‌ربه‌ست ئازاد بكه.
چاڤكانیێن پێگه‌ها «داركا مازی» ل باشوورێ كوردستانێ ئه‌شكه‌ره كرن، ئیرۆ رۆژا سێشه‌می 5/5/2020ان ل ده‌مژمێر 12ی نیڤرۆژێ، ل ناڤچه‌یا چه‌مانكێ یا گرێدای پارێزگه‌ها دهۆكێ، مالباتا «جوتیار محسن حسێن» ئه‌و خۆرتێ به‌ریا 3 مه‌هان ژ ئالیێ په‌كه‌كێ ڤه هاتییه ره‌ڤاندن، ل گه‌ل هه‌ژماره‌كه زۆر یا خه‌لكێ ناڤچه‌یێ، خوه‌پێشاندان كرن، ژ بۆ كۆ چاره‌نڤیسا خۆرتێ وان وه‌ره ئه‌شكه‌ره كرن.
د خوه‌پێشاندانێ ده، 3 داخوه‌یانیێن هاتن خوه‌ندن یا یه‌كه‌م ژ ئالیێ ره‌مه‌زان سیاری، نوونه‌رێ مالباتا جۆتیار و تێده ئه‌ڤ كارێ په‌كه‌كێ ب دژواری شه‌رمه‌زار كر و گۆت كو ئه‌ڤ یه‌ك ت خزمه‌ته‌كێ ب یه‌كرێزیێ ناكه، هه‌موه‌خت خوه‌ست په‌كه‌كه هه‌ر زوو چاره‌نڤیسا خۆرتێ وان ئه‌شكه‌ره بكه و سه‌ربه‌ست ئازاد بكه.
داخویانییا دوویه‌مین ژ ئالیێ مه‌م ئه‌سكه‌نده‌ر، پارلمه‌نته‌رێ كوردستانێ یێ كۆمیتا مافێن مرۆڤان هات خوه‌ندن و تێده هات خوه‌ستن كو په‌كه‌كه ده‌ڤ ژ ڤان كاران به‌رده و جۆتیاری سه‌ربه‌ست ئازاد بكه، هه‌موه‌خت ژ په‌كه‌ك هات خوه‌ستن كو رێزێ ل سه‌روه‌رییا هه‌رێما باشوورێ كوردستانێ بگره و هه‌روه‌ها خه‌باتا خوه ژ بۆ باكورێ كوردستانێ ڤه‌گوهێزه.
رێخستنێن جڤاكا سڤیل داخوه‌یانییا وان ژ ئالیێ هێرش ئۆره‌ی هات خوه‌ندن و هه‌مان داخوازی تێده بوون.
تێ زانین كو «جۆتیار» كوڕێ مالباته‌ك ولاتپارێز یا باشوورێ كوردستانێ یه، باڤێ وی پێشمه‌رگه‌یه، ل 29/1/2020ان ژ ئالیێ 2 گه‌ریلایێن په‌كه‌كێ ڤه ل گوندێ بێبادێ یێ سینۆرێ پارێزگه‌ها دهۆكێ هاتبوو ره‌ڤاندن، ل 3 مه‌هێن ده‌رباس بوویی مالباتا وی گه‌له‌ك هه‌ول دانه په‌یوه‌ندیێ ب په‌كه‌كێ بكن، لێ به‌لێ په‌كه‌كێ ئه‌و هایدار كرنه كو له‌كۆلین ل گه‌ل ده هێژان ب داوی نه‌بوویه.
پێگه‌ها «داركا مازی» 3 رۆژان پاش ده‌سته‌سه‌ر كرنا «جۆتیار» ژ ئالیێ په‌كه‌كێ ڤه، چیرۆكا وی وه‌شاندبوو و تێده هه‌موو هۆرگلیێن خاپاندنا «جۆتیار» ژ ئالیێ په‌كه‌كێ ڤه هاتبوونه زه‌لال كرن، ئه‌ڤ ژی لینكا وێ چیرۆكێ یه.
ئه‌ڤ ژی ته‌كستا داخوه‌یانییا مالباتا جۆتیار محسنی یه
بۆ/ سەرۆکتیا هەرێما کوردستانێ
بۆ / ئەنجونەنا وەزیرێن ھەرێما کوردستانێ
بۆ / پارلمه‌نتۆیا کوردستانێ
بۆ / نوونه‌ر و کونسل و جڤاکا ناڤدەوله‌تی ل هەرێمێ و ب تایبەت رێخستنێن مافێ مرۆڤان و نه‌ته‌وه‌یێن یه‌كبوویی
بۆ / رێخستنێن جڤاكا سڤیل ب تایبەت بۆ كۆمیتا مافێ مرۆڤان ل پارلمه‌نتۆیا کوردستانێ
وەکه ھەموو خەلکێ ناڤچه‌یێ دزانه کو ل رۆژا 29/1/2020ان ههمولاتی «جۆتیار محسن حسێن» ل ناڤچه‌یا چەمانکێ ھاتییە دەستە سەر کرن ژ ئالیێ گرۆپەکا سەر ب په‌كه‌كێ ڤە و ھاتییە رەڤاندن، ئەڤ بۆ ده‌ما پێتری 3 مه‌هانه ئەڤ ههمولاتی بێ سەر و شینە، هه‌یا نها چارەنڤیسا وی نەھاتییە دیار کرن ژ ئالیێ په‌كه‌كێ ڤە، ئەم وەکه نوونه‌ر و خەلکێ ناڤچه‌یێ ب تایبەت گوندێ «سیارێ» ئەڤان جورە کاران ب دژواری شەرمه‌زار دکین، ئەڤە نە بۆ جارا یه‌كه‌مینه ئەڤ کار تێن ئه‌نجام دایین، داخوازێ ژ ئالیێن پێوەندیدار دکین و ب تایبەت پارتییا کارکەرێن کوردستانێ په‌كه‌كێ کەیسا ههمولاتی «جۆتیار محسن» وه‌ره دیار کرن، ئەڤ کارێ پارتییا کارکەرێن کوردستانێ په‌كه‌كێ ئەنجام دای دبه ئاستەنگی و بەربەست ژ بۆ یه‌كرێزییا ناڤ مالا کوردی و خەلکێ ناڤچه‌یێ ب گشتی جاره‌كه دن داخوازێ دکین كو ب جددی ل سەر بابەتا ههمولاتی «جۆتیار محسن» راوستن، هه‌گەر نە، ئه‌مێ هنه‌ك رێ چارەیێن دن بگرینه به‌ر.
ئازادی
ئازادی
ئازادی
بۆ ههمولاتی «جۆتیار محسن حسێن»
