تۆپهاڤێژێن ده‌وله‌تا داگیركار یا تركیێ ل باشوورێ كوردستانێ، ئێریشێن سه‌ر په‌كه‌كێ ل ده‌ما 3 رۆژێن رابووری زێده كرنه، ب ئاوایه‌كی كو زرارێن مه‌زن گهانه ناڤچه‌یا كانی ماسێ.
چاڤكانیێن پێگه‌ها «داركا مازی» ل باشوورێ كوردستانێ ئه‌شكه‌ره كرن، د 3 رۆژێن رابووری ده، ئێریشێ تۆپهاڤێژێن ده‌وله‌تا داگیركار یا تركیێ، ل خه‌تا ناڤچه‌یا كانی ماسێ یا سینۆری ل سه‌ر حه‌ره‌كه‌تێن په‌كه‌كێ زێده‌بوونه، لێ به‌لێ زرارا ڤان ئێریشان ته‌نێ ب گه‌لێ ناڤچه‌یێ كه‌تنه.
د به‌رده‌وامییا ئالۆزییان ده، ئیرۆ رۆژا پێنجشه‌می 14/5/2020ان، گەریلایێن په‌كه‌كێ ل سینۆرێ باژارۆکێ کانی ماسێ ئێریشی بنکەیەکە له‌شكری یا ترکیێ کرن و د ناڤبەرا ھەردو ئالییان دە شەر دەرکەت.
ژ بەر شەرێ ناڤبەرا گەریلایێن په‌كه‌كێ و ھێزێن ترکیێ دە، زرار گھیشت خەتا ڤەگوھاستنا ئەلەکتریکا نشتمانییا 33 كه‌ی ڤی یا د ناڤبەرا ئامێدی و کانی ماسێ دە و ئەڤ خەتا ئەلەکتریکێ ھات قوت کرن.
ل رۆژێن رابووری تۆپخانه‌یێن ده‌وله‌تا داگیركار یا تركیێ چه‌ندین جاران حه‌ره‌كه‌تێن په‌كه‌كێ ل ناڤچه‌یا به‌رواری بالا هه‌ده‌ف كرنه، ل شه‌ڤا رابووری ژی هنه‌ك گوللـه تۆپ ب نێزی گوندێ كێسته كه‌تنه و د ئه‌نجامێ ده زرارێن ماددی گھیشتن ھەژمارەک مالباتێن ل وی گوندی.
خه‌لكێ ناڤچه‌یا كانی ماسێ، ئامێدی و به‌رواری بالا، گازن ژ نێزی بوونا په‌كه‌كێ ژ بۆ گوندێن خوه هه‌نه و دخوازن په‌كه‌كه شه‌رێ خوه ل گه‌ل ده‌وله‌تا تركیێ ژ ناڤچه‌یێن وان دوور بكه.
ژ ته‌باخا سالا رابووری و پاش ده‌ست پێ كرنا ئۆپه‌راسیۆنا ب ناڤێ په‌نجكێ ل دژی پارتییا كاركه‌رێن كوردستانێ، په‌كه‌كه ژ بۆ كو خوه ژ ئێریشێن ده‌وله‌تا تركیێ بپارێزه، حه‌ره‌كه‌تێن خوه خستنه ناڤا گوندان ده، ب ڤێ چه‌ندێ ته‌نێ خه‌لكێ ناڤچه‌یێ دكه‌ڤه به‌ر ئێریشێن ده‌وله‌تا تركیێ و ژ وێ ده‌مێ پێتر ژ 20 هه‌مولاتیێن سڤیل شه‌هید كه‌تنه.
