باله‌فرێن جه‌نگ یێن ده‌وله‌تا داگیركار یا تركیێ، ئێڤارا ئیرۆ گوندێ ده‌رگه‌لا مۆسا به‌گێ ل سینۆرێ پارێزگه‌ها دهۆكێ بۆردۆمان كر، پاش كو گه‌ریلایێن په‌كه‌كێ خوه نێزی گوندی كرین.
چاڤكانیێن پێگه‌ها «داركا مازی» ل باشوورێ كوردستانێ ئه‌شكه‌ره كرن، ئێڤارا ئیرۆ رۆژا دوشه‌می 18/5/2020ێ ل ده‌مژمێر 4:30، باله‌فرێن جه‌نگ یێن ده‌وله‌تا داگیركار یا تركیێ، مۆشه‌كه‌ك ئاڤێت گوندێ ب ناڤێ «ده‌رگه‌لا مۆسا به‌گێ» ل سینۆرێ ناڤچه‌یا كانی ماسێ ل ده‌ڤه‌را به‌رواری بالا.
هه‌روه‌ها ده‌ست نیشان كرن، باله‌فران ئه‌ڤ مۆشه‌ك ل نێزی گوندێ ناڤبووری دایه، وه‌ختا كو گه‌ریلایێن په‌كه‌كێ خوه نێزی گوندی كرین.
ب سه‌ده‌ما بۆردۆمانێ ترسه‌كه هه‌ری زێده ل جه‌م روونشتڤانێن گوندێ چێبوویه و وان دلگرانییا خوه ژ نێزیبوونا گه‌ریلایێن په‌كه‌كێ بۆ گوندێ خوه كرن و خوه‌ستن گه‌ریلا خوه ژ گوندێ وان دوور بكن ژ بۆ كو نه‌كه‌ڤن به‌ر ئێریشێن باله‌فران.
هه‌ر ئیرۆ رۆژا دوشه‌می، هات تەسبیت کرن کو ل ناڤا خاکا هەرێما باشوورێ کوردستانێ دە ل ناڤچەیا خواکورکی، 3 گەریلایێن پەکەکێ ب سەدەما بۆردۆمانا بالەفرێن جەنگ یێن دەولەتا ترکیێ جانێ خوە ژ دەست دان.
ئۆپەراسیۆنێن دەولەتا داگیرکار ب سه‌ده‌ما پەکەکێ، ل ناڤا خاکا باشوورێ کوردستانێ بوویە سەدەما دەرکەتنا زرارێن مەزن ژ بۆ گەلێ باشوور، تایبه‌ت پاش ته‌باخا سالا رابووری و ده‌ستپێكرنا ئۆپه‌راسیۆنا ب ناڤێ «په‌نجكێ» كو هه‌ژماره‌ك ژ وه‌لاتیێن سڤیل شه‌هید كه‌تنه.
گەلێ باشوور ژ بەر ڤێ یەکێ ژ هەبوونا پەکەکێ ل ناڤچەیێ نەرازینە و دخوازن پەکەکە نێزی گوندێن وان نەبه، لێ بەلێ پەکەکە ب تو ئاوا گوهدارییا گەل ناکە و بەردەوام دبە سەدەما دەرکەتنا پرسگرێکان ژ بۆ گەلێ باشوور.
