گەنەرال مەزلووم و ئەزموونا پەکەکێ دگەل رۆژئاڤا
مەدیایا پەکەکێ دخوازە چ بکە؟
رۆژئاڤاێی کوردستانێ قوربانیێن پڕ مەزن دان لێ هەیا نها ژی پاشەرۆژا وێ هێژان ژی نەدیارە، هێژان خه‌ته‌ر ل سه‌ر رەوشا وێ هه‌یه.
ڤێ دەرێ رۆژهلاتا ناڤینە، لیدەرێن وەکە «قەزافی» ل ژێر لنگان هاتن کوشتن و وەلاتێ وی هات ژ ناڤ برن و ئەگەر ڤێ یه‌كێ ئەم نەبینن و ئەم بێژن ئەمێ بەرخوەدانێ بکن و ب سەرکەڤن ئەڤ تشتەک شاشە، بەرخوەدان تشکەک مەزنە، لێ بەلێ بەرخوەدان ب تەنێ تێرا سەرکەتنێ ناکە، ژ بۆ کو مرۆڤ ژ تونەیی یێ سەرکەتنێ قازانج بک، پێویستی ب تشتێن زێدەتر هەیە: گەرەکە مرۆڤ راستگۆ بە تو دێ بکاری سەرکەتنێ چێبکی، یان تو نکاری سەرکەتنێ چێبکی، ل همبەر دوژمن ئەڤ یەک گەرەکە ب دروستی بهێت تەسبیت کرن، یێ کو تو نکاری ب بەرخوەدانا خوە وی بن بێخی ژی بەری کو تو بکەڤی شەر د گەل دا، گەرەکە تو خوە ژێ دۆر بێخی، یانی پێویستی ب سیاسەتەکە ب ڤی تەرزی هەیە، بەرەڤاژی گەر وەکە پەکەکێ کو هەر سال، سالا سەرکەتنێ ئیلان دکە و بانگەوازییا بەرخوەدانێ دکە و ب وێ کەلەجانێ خوە ژ گەل رە ددە نیشاندان و دەردکەڤە مەیدانێ د رۆژهلاتا ناڤین ده، ئێنجام وێ ببی پارتییەک کو ل چیایان هەردەم د تەنگاڤیان دە بی و دوور بی ژ سیاسەتا سەردەم و ناڤدەولەتی.
شیرۆڤەکرنەکە وها کو مرۆڤ رۆلەکە پڕ مەزن بدە مەزلووم کۆبانی و ببێژە ڤی کەسی خوە ژ پەکەکێ دۆرخستییە ئەڤ یەک وێ شیرۆڤەیەک شاش بە
وەها خوەیا دکە کو ب سالایە د ناڤا رێڤەبەرییا رۆژئاڤا دە، ئەڤ یەک خوەیا بوویە کو سیاسەت و رێڤەبرن ل سەر تەرزێ کادرۆیێن پەکەکێ، ب تایبەتی کادرۆیێن گرۆپا دامەزرینەر ئا پەکەکێ «گرۆپا ئەنقەرێ» سەرکەتنێ نائینە، دیار بوویە نە ب شیرۆڤەکرنا وان یا سیاسی و رێڤەبرنا وان یا پراکتیکی رۆژئاڤا نایێ برێڤەبرن و وان باش فێم کرییە ب ئەدەبیاتا کەلەجانی ولات نایێ برێڤەبرن، دخوازن پۆلتیکایەک بنگەهین و راست و دروست وەرە بکارئانین، گرۆپەک وها هەیە کو ب تەنێ ب سلۆگانان و کەلەجان و بەرخوەدانا شکلی رازی نابە، بەلکو دخوازن سەرکەتنەک مسۆگەر ب دەست بینن، ل سەر ڤێ یەکێ شەخسیەتا کو پێتر ژ هەر کەسی دەردکەڤە پێش مەدیایێ کەسەکی وەکە گەنەرال مەزلووم کۆبانی «مەزلووم عەبدی» یە کو ئەو ب ناڤ و دەنگ بوویە.
مەزلووم کۆبانی رۆلەکە بنگەهین د دەرخستنا ئەنەکەسێ و پارتیێن نەگریدایی ب پەکەکێ ڤە ژ رۆژئاڤا هەبوویە
شیرۆڤەکرنەکە وها کو مرۆڤ رۆلەکە پڕ مەزن بدە مەزلووم کۆبانی و ببێژە ڤی کەسی خوە ژ پەکەکێ دۆرخستییە ئەڤ یەک وێ شیرۆڤەیەک شاش بە، ژ بەر کو مەزلووم کۆبانی ب سالان د رێڤەبه‌رییا پەکەکێ دە جی گرتییە و د ناڤا پەکەکێ دە ب ئاوایەکی پراکتیکی و پێکئانینا کار و سیاسەتا پەکەکێ خوە پێشخستییە، د سالێن دەستپێکی یێن پیڤاژۆیا رۆژئاڤا دە، ل سالێن 2011-2014ان، مەزلووم کۆبانی رۆلەکە سەرەکی و بنگەهین د دەرخستنا ئەنەکەسێ و ئەو پارتیێن نەگریدایی ب پەکەکێ ڤە ل رۆژئاڤا هەبوویە، یانی مەزلووم ئەبدی «شاهین جیلۆ» نەفریشتەیەکە، وی ژی نانێ پەکەکێ خوارییە، و هەر کەس ڤێ یەکێ دزانە.
رەغمێ ڤان کاران هەموویان ئەو خەتا پەکەکێ یا ئیدۆلۆژیک و ئەو سیاسەتا جەمیل باییک و دەردۆرێن وی کو کوردان مەهکوومی سیاسەتا رۆژهلاتا ناڤین و ئیرانێ دکە دهێتە باوەر کرن کو مەزلووم کۆبانی و دەردۆرێن وی دێ بکارن ڤێ خەتێ دەرباس بکەن و ژ ئالیێ گەلەک هێز و ئالییان ڤە جەسارەت و هێز پێ تێ دایین.
د ناڤبەرا مەزلووم ئەبدی و رێڤەبەریا باشوور دە ژ دەرڤەی سیاسەتێ ژی پەیوەندییەک براتی و وەفاداریێ ژی هەیە
پێشییا هەر تشتی ب پێشەنگییا ئه‌مەریکایێ، ئەو هێزێن کوالیسیۆنی کو ئەمەریکا پێشەنگییا وێ دکە، ئەم نابێژین کو پڕ ژێ باوەر دکن لێ کار و خەباتەکا وان ئا پڕ زێدە هەیە کو ئەڤ کارە وەرە ئەنجام دایین، ئەو دخوازن مەزلووم ئەبدی ژ دەرڤەی ئایدۆلۆژی و سیاسەتا پەکەکێ بدەنە پێش، د ناڤ هێزێن کوردی دە ژی هەم وەک هزبی هەم وەک شەخسی ب مەزلووم کۆبانی ب باوەرن و هەم ژی ئالیکارییا وی دکن، ئەو دەستگرتنا پەکەکێ یا هشک کو دبێژە «ئەز نەبم وێ تو تشتەک نەیێ پێکئانین»، ل شوونا وێ ئالیێ مەزلووم ئەبدی یێ کو هنەکێ سەکناندنا وی یا کوردستانی و هنەکی سەکناندنا وی یا نێزی راستیێ هەیە، د ناڤا کوردان دە سەمپاتی و حەژێکرنەک پەیدا کرییە، دیارە د ناڤا ڤان کەس و ئالییان دە رێڤەبەرییا باشوورێ کوردستانێ ژی جی دگرە، د ناڤبەرا مەزلووم ئەبدی و رێڤەبەریا باشوور دە ژ دەرڤەی سیاسەتێ ژی پەیوەندییەک براتی و وەفاداریێ ژی هەیە، رەغمێ کو دناڤبەرا وان دە جوداهی و فەرقی هەنە ژی لی د ئالیێ هەستان دە نیزی هەڤن، ژ خوە تشتێ کو د ناڤا پەکەکێ دە تونە ئەڤ هەستە بوو، د ناڤا پەکەکێ و پارتیێن دن ئێن نێزی وێ دە تو هەست و سۆزەک ژ بۆ بەرژەوەندیێن کوردی نەمابوو، ژ بەر ڤێ یەکێ ژی د ناڤبەرا مەزلووم و هکوومەتا باشوور پەیوەندی گەرمتر خوە یا دکن.
چاپەمەنییا پەکەکێ ئەنەکەسە تەهدید کرییە یان ژی رۆژئاڤا تەهدید کرییە؟
ئەو کارێزماتیکا شەخسیەتا مەزلووم ئەبدی، پشتی کو رۆژئاڤا وەکە ناسنامه‌یا خوە یا رەسەن دیتی هنەک دەور و بەران پڕ دلگران و نەئارام دکە، بەرپرسیارێ مەدیایا پەکەکێ «فەردا چەتین» ل رۆژا 9 نیسانێ ل سەر هەسابا خوە یا تویتەرێ ژ بۆ رۆژئاڤا تشتەک نڤیساندییە کو ئەو نڤیساندنا وی نڤیسی بابەتەک پڕ گرینگە، هەر کەسێ وەها هزر دکر کو ئەڤ نڤیسینا فەردا چەتین نڤیسی ب تەنێ ئەنەکەسە هەدەف کرییە، وها نینه، ئەڤ دیتنێن فەردا چەتین وەکە گەف دهێن خوەیا کرن، لێ یێن دگەل ئەنەکەسێ هەڤدیتنێ دکن و لهەڤ دکن کادرۆیێن رۆژئاڤانە، ئەو گەف ژ بۆ سیاسەت و سازی و دەزگەهێن وێ نەژی، ئەو ژ بۆ مەزلووم ئەبدی ب خوە ژی کو رێڤەبەرێ ڤێ لهەڤهاتنێ بوویە گەفەکە.
فەردا چەتین دبێژە: فرەنسا و ئه‌مەریکا د ناڤبەرا کوردان دە یەکیتیێ دخوازن، ئەگەر رژدییا وان هەبە ژی ئەو نکارن ڤێ یەکێ ب گرۆپەکە وەکە ئەنەکەسێ پێکبینە، لێ سەر مێزێ نە ب تەنێ ئەمەریکا و فرەنسا و ئەنەکەسە هەنە، پەیەدە ژی هەنە و ئەڤانە هەموو ژی کادرۆیێن قەدیم ئێن د ناڤا پەکەکی دە بوون، چما ئەو ل سەر وێ مێزێ نە، تشتێ فەردا چەتین ژێ پڕ ئاجز ئەڤە، دبێژە گەرەکە پەکەکە ل سەر مێزێ بە، ژ خوە پەکەکە ب خوە ژی ڤێ یەکی هەز ناکە کو ناڤێ پەکەکێ نە د ناڤ دە یە و نە ل سەر مێزێ یە، هه‌گەر هەڤدیتنەک هەبە ژی و لهەڤهاتنەک هەبە ژی ل سەر مێزێ گەرەکە وەکە هەڤدیتنێن ئۆسلۆ یێ مستەفا کاراسۆ هەبە، یان ژی کەسەکێ کو رێڤەبەرێ پەکەکێ یێ دامەزرینەر بە هەبە، یانژی یێ کو وەکە مەئموور ژ ئالیێ رێڤەبەریێ دە هاتیە شاندن ژ بۆ رۆژئاڤا وەکە «سەبری ئۆک» هەبە، لێ هوون هەر کەسێ رەخنە دکن و دبیژن بلا دکان بچووک ژی بە، لێ بلا یا من بە، یا ژ وێ خه‌رابتر هوون دکن یاکو فەردا چەتین دبێژە ئەڤە یان تۆ یا منی یان تۆ یا ئاخا ساری، مادەم چ پارتیێن دن نینە ئەو دەم ئەڤ یه‌کێتی ژی چێنابە، یانی ب راستە راست دبێژە گەر پەکەکە نەبە چ رامانەک ژ بۆ یەکێتیا د ناڤبەرا کوردان دە نینە.
فەردا چەتین نە ب ناڤێ شەخسەکی سادە ئاخافتییە، ئەو کەسەکی گرینگە د ناڤا پەکەکێ دە، ئەو د بەرپرساتییەک گرینگ دایە، ئەو کۆردیناتۆر و رێڤەبەرێ گشت سازی و مەدیایێن سەر ب پەکەکێ ڤە یە، هەر چەند کو رێڤەبەرییا پەکەکێ یا ژوور وی برێڤە دبە ژی، لێ ئەو ب خوە ژی گەلەک رێڤەبه‌ران ب رێڤە دبە، نڤیساندن و داخوەیانییا فەردا چەتین ئەینی داخویانی یا مستەفا کاراسۆ یە، پەکەکە وەک پێشی نها وەک لهەڤهاتنا سالا 2011ان یا هەولێری و ئەو لهەڤهاتنا 2014ان یا دهۆکێ، دخوازە ئیدارەییا وێ ل دەستێ خوە بگرە و دەمی پێ قازانج بکە و ژ بۆ خوە وەکە پرەکێ بکار بینە ژ بۆ گهیشتن ب هنەک بەرژەوەندییان، دخوازە پیڤاژۆیێ ب ڤی رەنگی ب دەست بگرە و دەما کارێ وی پێ خلاس ژی بوو دێ بخوازە دیسان ڤی کاری تێک بدە، ڤێ جارێ دێ رەنگێ ڤی کاری پڕ وەرە گوهەرتن و دێ پتر قوربانییان ژ رۆژئاڤا رە پەیدا بکە.
هشیاری ژ ئالیێ عەبدوللا ئۆجالان ڤە ژی هات، ئەڤ هشیارییە ژ بۆ ڤێ یەکێ بوو کو رێڤەبەرییا رۆژئاڤا خوە ژ مەرکەزییەت و برێڤەبرنا پارتیتی یا هشک دوور نەخە و ژ بۆ کو گەلی رۆژئاڤا ناسنامەیەک جەوهەری و سەربخوە ژ خوە رە پەیدا نەکە هشیارییا ئەولی ژ ئالیێ عەبدوللا ئۆجالان ڤە هات.
کوردستانا رۆژئاڤا و لهەڤهاتنا پەیەدێ و ئەنەکەسێ د چاپەمەنییا پەکەکێ دە ب چاڤەک خەتەر تێ دیتن
عەبدوللا ئۆجالان پشتی 21 سالان ل رۆژا 27 نیسانێ د وێ هەڤدیتنا کو ب تەلەفۆنێ هاتی ئەنجام دایین، د وان ئاخافتنان دە هەم د ناڤەرۆکا نڤیسینێ دە و هەم ژی د ئاخافتنا مهەمەد ئۆجالن دە، ئاخافتنێن کو ئۆجالان دەربارا رۆژئاڤا کری، پڕ بالکێشن، تشتێ هەری بالکێش ئەو گۆتن و نرخاندنن كو ئۆجالان ل سەر رۆژئاڤا کری. ئۆجالان دبێژە هنەک کەس د ناڤا هێزێن مە دە هەنە کو ب چاڤەک خراب ل من دنێرن، دکارن وەها ل من بنێرن لی رۆژەک دێ وەرە هەرکەسەک دێ بزانە ئەڤ پێنجی سالە ئەز چ دکم، ل ڤێ دەرێ هەر تشتێ ژ دەست مە و هەڤالان رە بێ کرن ئەم دکین، گەر هندەک کەس هەبن ب چاڤەک خه‌راب ل من بنێرن ئەو د رێیەکە شاش ده نە و ئەو د ناڤا ئیخانەتێ ده نە و ئەڤ رەوش ژی ب ڤی ئاوا نایێ قه‌بوول کرن.
ئەڤ گۆتنێن ئۆجالان وەکە وێ یەکی یە کو د بن عەبای رە نیشان بدەی و ئەو گۆتنا وی کو دبیژە گەر دەلیڤە چێببە ئەزێ بەرسڤ بدم، ئەڤ گۆتنە تێ وێ واتەیێ کو دێ پڕ دەلیڤە هەبن ئەز وێ بەرسڤێ بدم.
ب کورتایی کوردستانا رۆژئاڤا و لهەڤهاتنا پەیەدێ و ئەنەکەسێ د چاپەمەنییا پەکەکێ دە ب چاڤەک خەتەر تێ دیتن، نیەتا پەکەکێ وها خوەیا دکە کو ناهێلە رۆژئاڤا ژ گەلێ رۆژئاڤا رە بمینە، نها ئەڤ مژار بلا ل دەرا هانێ بمینە، گەلۆ رۆژئاڤایی دکارن ب ناسنامەیا خوە یا جەوهەری و هەرێمی خوە ل سەر لنگێن خوە راگرن؟.
