سەرۆکێ باشوورێ کوردستانێ ئالیكاری شاندن رۆژئاڤا

سەرۆکێ ھەرێما باشوورێ کوردستانێ ئالیكارییا رۆژئاڤا دكه‌ت

سەرۆکێ ھەرێما باشوورێ کوردستانێ، دو تاقیگەھێن دن شاندن رۆژئاڤایێ کوردستانێ، ب وێ یەکێ هەژمارا تاقیگەهێن ژ ئالیێ سەرۆکاتییا هەرێما کوردستانێ کو ژ بۆ رۆژئاڤایا ولات شاندنە گهان 6 تاقیگەهان، ژ بەر کو بەری نھا ژی 4 تاقیگەھ شاندبوون.

ل گۆر زانیاریێن پێگەها «دارکا مازی» سەرۆکێ ھەرێما باشوورێ کوردستانێ نێچیرڤان بارزانی 2 تاقیگەھێن دن یێن PCR شاندن، ئەڤ ھەردو تاقیگەھ ل گەل ھەموو ئاموور و کەلوپەلێن دن یێن پزیشکی یێن پێرە، ئیرۆ رۆژا شه‌می 23/5/2020ان ب رێیا دەریێ سینۆریێ پێشابوور- سێمالکا ژ باشوورێ کوردستانێ ڤە دەرباسی ئالیێ رۆژئاڤایێ کوردستانێ تێن کرن.

ل گۆرەی زانیاریان ئەو تاقیگەھ پێشیێ ل قامشلۆیێ تێن دانین و پاشێ ل گۆر پێدڤیێ ل دەڤەران تێن بەلاڤ کرن.

شاندنا ڤان تاقیگەهان ژ ئالیێ سەرۆکێ هەرێـما باشوورێ کوردستانێ د دەمەکێ دە یە  کو زێدەترین تووشبوویێن ب کۆرۆنایێ ل سووریێ ھاتنە تۆمار کرن، گھشتنا وان تاقیگەھان کو ژ بۆ نەخوەشیێن دن ژی تێن بکارئانین، گەلەک گرینگە.

نێچیرڤان بارزانی بەری نھا ل سەر داخوازا فەرماندارێ گشتیێ ھێزێن سووریەیا دەمۆکراتیک هەسەدێ، 4 تاقیگەھێن تایبەت تەڤی ھەموو ئاموور و کەلوپەلێن پێویست ژ رۆژئاڤایێ کوردستانێ رە شاندبوون.

دەربارێ وان ئالیکاریێن کو بۆ رۆژئاڤا ھاتنە شاندن، نێچیرڤان بارزانی ل 21 نیسانا 2020ان د کۆنفەرانسەکە رۆژنامەڤانی دە گۆتبوو: «ئەو ئالیکاریێن ژ بۆ رۆژئاڤایێ کوردستانێ ھاتنە شاندن، ب تەمامی ئالیکاریێن مرۆڤی نە، نە سیاسی.«

سەرۆکێ ھەرێما کوردستانێ دیار کربوو، د دەمەکێ دە کو ڤیرۆسا کۆرۆنایێ ل ھەموو جیھانێ و ل ناڤچەیێ ژی بەلاڤ بوویە، ل تەڤاھییا رۆژئاڤایێ کوردستانێ تاقیگەھەکە تەنێ ژی تونەبوو، د دەمەکێ دە کو چەندین کامپێن پەنابەران لێ ھەنە.

پوستێن ھەمان بەش