نڤیسکاره‌كا پەکەکێ سفکاتیێ ب پێشمەرگەی دکەت

نڤیسکاره‌كا پەکەکێ سفکاتیێ ب پێشمەرگەی دکەت

دلزار دیلۆکێ ل 25ی گۆلانێ د مالپەرا ANF یا سەرب پەکەکێ ڤە، گۆتارەک بەلاڤ کرییه‌، وێ نڤیسینا خوە ب ناڤێ «ھەستێن پێشمەرگه‌یان چ دبێژن» بەلاڤ کرییە، وێ تێدا ب زمانەکی ئایدۆلۆژیک و تەڤلیھەڤ سڤکاتی ب پێشمەرگەی و حكوومه‌تا ھەرێما کوردستانێ کرییە.

د ناڤەرۆکا نڤیسینێ دا دیار دبیت کو نڤیسكار ژ راستییا سیاسەت، ژیان و دیرۆکێ بێ ئاگەهە، تەنێ د پەنجەرکا حزبا خوە دا شیایە ل دنیایێ بنێریت، ل سەر حكوومه‌تا ھەرێما کوردستانێ گەلەک ب بێ منه‌تی ڤان گۆتنان دکەت: «رێڤەبەرییا ھەرێما کوردستانێ نەشێت ژیانا ھەرێمێ و ئازادییا وێ سیستەم و گارانتی بکەت، بەرەڤاژی گه‌فێ ل ژیانێ دکەت، جڤاکبوونێ دکوژیت، پارچە دکەت و د نەزەرا دنیایێ دا کوردان لاواز و بێ ئیعتیبار دکەت».

د سەد سالا 20ێ دا د ناڤا سیستەما جیھانێ دا، ب ناڤێ کوردان تەنێ حکوومەتا ھەرێمێ وەک سیستەمەک فەرمی و دانپیدایی جھێ خوە دگریت، ھەموو جیھان ب شانازی باس ل ھەرێما کوردستانێ دکەت، دیار دبیت ئەڤ نڤیسكارە ل بن سیبەرا پارتییا خوە مریدیێ دکەت، ژ ولاتپاریزی و زانستێ سیاسەتێ دوورە و ژ بەر خوە ڤە د ئاخڤیت.

نڤیسەر، داکو ھەرێما کوردستانێ رەش بکەت کەفتییە د ناڤا لێگەرەکا بێ واتا دا، ب ڤەگوهاستن ژ زارێ پێشمەرگەیەکێ دبێژیت: «ئەز ژ ھەموو کریارێن خوە پووشمانم».

دبیت کو ئەڤ گۆتن ژ ئالیێ پێشمەرگەیه‌کی ڤە ھاتبیتە کرن، ئەڤە نەتشتەکێ گەلەک سەیرە ژی، لێ د ناڤا سەدان ھەزار پێشمەرگه‌یان دا، کەسەک یان ژی چەند کەس گۆتنێن ب ڤی رەنگی بکەن نە تشتەکێ گەلەک سەیرە، پێشمەرگە ژ سالێن 1800ێ حەتا نھا ژبۆ رزگارییا نەتەوه‌یا کورد فیداکاریێ دکەن، ل سەر ھەموو قەھرەمانیێن کورد مۆهرا پێشمەرگه‌یێن کوردستانێ ھەیە، د ناڤا ڤان 200 سالێن دەربازبوویی دا، ب سەدان هەزار کورد بووینە پێشمەرگە و ب دەھان ھەزار ژی شەھید بووینە، کەسێن کو دخوازن ل دەرڤەیی ڤێ راستیێ ژیانا خوە بەردەوام بکەن ژی گەلەکن، لێ یا ھەری داوی د شەرێ د داعشێ دا ژی مە دیت كو پێشمەرگه‌یێن تەمەن 70 و 80 سالی د بەرۆکێن شەر دا بوون، ئەڤە راستییا چاندا ڤێ تەخا دلسۆزێن ولاتی یە، د سەر 2000 پێشمەرگه‌یان دا جانێ خوە گۆری ئاخا وەلات کر، ئەفسانە و قەھرەمانیێن گەلەک مەزن دەرکەتن، ھەمان پێشمەرگە وه‌ختا پێدڤی بكه‌ت، ھەموو رەخنەیان ل فەرماندارێ خوە دگرن، بێ ترس و بێ فکار.

پێشمەرگە دشێت بێژیت ئەز پووشمانم، دشێت ژ ناڤا سیستەما پێشمەرگاتیێ ژی دەربکەڤیت، ئەڤە تشتەکێ پر نۆرمال و سروشتی یە، لێ د ناڤا پەکەکێ دا کەس نەشێت باسی پووشمانیێ بكه‌ت و ژ ناڤا پەکەکی دەرکەتنێ ژی بکەت، ئەڤ مافە وەک خیانەتێ دھێتە دیتن، هه‌تا مرنێ بێدلی ژی بیت، پێدڤییه‌ د ناڤا پەکەکێ دا بمینیت.

دلزار دیلۆک دبێژیت: «ب راتبەکێ ئەڤ پێشمەرگە ئاڤێتنە کونجیکەکێ»، گەلۆ پەکەکە چ دکەت دەڤ ژ راتبی بەردە، پەکەکە کەسێن ب دەھان سالا خزمەت کری ژی وەکو خائین ب ناڤ دکەت و دکوژیت، ب سەدان گەریلایێن دێرین ب ناڤێ  خیانەتێ ھاتن کوشتن، دلزار دیلۆک و یێن وەک وێ گێسنی د چاڤێ خوە را نابینن باس ل دەرزییا د چاڤێ خەلکی دا دکەن.

وی هه‌موو ژیانا خوە بۆ کوردستانێ تەرخان کربوو، ئەوی ژی هنده‌ك رەخنە ل پەکەکێ گرتن، پاش ب ئەمرێ «کارایلان و باییک» ئەو و رەوشەنا كچا وی یا 3 سالی ھاتن کوشتن

گەر ھوون پیچەک ب شەرەف بن ل سەر وان کەسێن کو په‌كه‌كێ ب ناڤێ رەڤێ کوشتن بنڤیسن، میناک کوشتنا ھارۆنێ سەرمەزن «بارزان دوورە» بنڤیسن، ئەو کورێ عالمەکێ مەزن یێ کوردستانێ مەلا عەبدولرەحمان دوورە بوو، ب سالان چیا ب چیا ل دژی دوژمنی شەر کربوو، ھارۆن تەنێ گۆتبوو: «من باوەری ب ڤێ ستراتەژییا نوو نینە» لێ د بن ناڤێ رەڤێ ل ھەرێما خنێرە پەکەکی ئەو کوشت، گەر ھوون بخوازن بنڤیسن ل سەر شۆرشا سمبێلزەر ئانکو شرنەخ «ئۆسمان بالیچ» بنڤیسن، هەوە چەوا ئەو و کچا وی «رەوشەن» یا تەمەن 3 سالی کوشتن، مالباتا شۆرەش تەڤلیبوونێن دەستپێکێ ل ھەرێما بۆتانێ دانە پەکەکێ، گوندێ دەشتا لالا و مالباتا وی پێشییا ھەموو بۆتانێ دەر ل سەر پەکەکێ ڤەکر بوو، شۆرەش ھەموو ژیانا خوە ژ بۆ کوردستانێ تەرخان کر، ئەوی ژی چەند رەخنەیێن د جھێ خوە دا ل پەکەکێ گرتن و ب ئەمرێ «موراد کارایلان و جەمیل باییک» ڤە ئەو و رەوشەنا بچووک ھاتن کوشتن،  گەر تە دلۆپەکا وژدانێ ژی ھەبیت تو دێ ل سەر رەوشەنا بچووک نڤیسی، ھەر رۆژ ب دەھان گەریلا ژ ناڤا رێخستنا پەکەکی دەردکەڤن ھەرە گوھدارییا چیرۆکێن وان بکە و بنڤیسە.

گەر تو دخوازی بنڤیسی ئەو ناسرێ مەزن «فاروک بۆزکۆرت» یێ کو ل 1982ێ تەڤلی پەکەکی بووی و 20 سالان ل چیا شەر کری، فەرماندارێ  ناڤچەیا زاگرۆسێ و ئامەدێ، ئەندامێ مەکتەب سیاسییا پەکەکێ چەوا ب فەرمانا کۆنسەیا سەرۆکاتیێ ھاتە کوشتن بنڤیسە.

ناسر دگۆت: «ئەڤ ئارمانجا پەکەکێ نە دبەرژەوەندییا کوردان دایە و تەکۆشینا نەتەوەیی ب ڤی رەنگی ناهێتە ئەنجام دان»، لێ ئەو سیستەما وە یا دەمۆکراتیک، ئیکۆلۆژک، ئازادییا ژنێ و جڤاکا ئازاد ئەڤ رەخنە قەبوول نەکرن و ناسر کوشت، ستەما وە یا بێ رێز، بێ ماف، بێ سەبر یا تاکەکەس پاراستنێ، یەک دەنگی و یەک کەسی ئەم باش فەھم دکەین.

ھوون و ترک «دەوێ ئێک ماستی» نە

 د ناڤا پەکەکێ دا نە ب تەنێ دلزار دیلۆک پرانی قەلەمشوورێن وان مەژیکێ خوە ب ئیکۆلۆژ، ژینەکۆلۆژی و ب ھەموولۆژییا ڤە تەڤلیھەڤ کرنە، مرۆڤ دشێت بێژیت ئەڤە «بەرمایکێن شێری نە د ناڤا چاپەمەنییا پەکەکێ دا، ئەو کەسێن ل سالێن 1990ێ د ناڤا راگھاندنێ دا ولاتپارێز، کوردستانی و نەتەوپەروەر ژ ئالییەکێ ڤه‌ دوژمنی و ژ ئالیێ دی ژی پەکەکێ ھەموو پێکڤە ژ ناڤ برن، یێن وەکە گووربەتەڵی «زەینەپ» ئەرسۆز، حسێن دەنیز، نازم بابائۆگلو و کەمال قلچ ئانکو ئەڤ نفشە ھاتن قڕ کرن، مەیدانا راگەھاندنێ ژبۆ ڤان بێ ئەسلا ما، ئەڤ بێ ئەسلە د گەل ھەڤ د ناڤا پێشبرکییەکێ دانە کانێ دێ کی زێدەتر ل دژی رێڤەبەرییا ھەرێمێ، ل دژی دەستکەفتێن باشوور، ل دژی بارزانی و ل دژی پێشمەرگەی نڤیسان نڤیسیت.

خوە وەسا دبینن کو، وان تنێ فام ل ڤێ جیهانێ کریە کەسێن دەرڤەیی وان ھەموو جاھل، پاشڤەمایی و بێ پەروەردە نە، تشتێ ڤانە ھندە بێ منه‌ت دکەت ئەڤ تێگەھا پەکەکێ یە، پێویستە ئەم دیرۆکا وان نیشا ھەموو کەسان بدین، ئەو دیرۆکا وان یا تاری بینین بیرا وان، ئەم وەکە نەتەوپەرەستێن کورد پێویستە بێژین پەکەکێ ئێدی ل جھێ خوە دا راوەستە، مەجالێ رۆژەڤێن درەو ئاڤاکرنێ نەدەینە وان، ئێدی کورد نە وەکو 10-15 سالێن بەری نوکە چاڤ گرتینە، بلا ب ئیستغلالا خوینا جوانان و رۆندکێن دایکێن کوردان ئەم نەھێینە خاپاندن، ئەو دخوازن جڤاکا کوردی ژ کوردایەتی دوور بێخن، ئەم رێ نادینە وان کەسان سڤکاتیێ ب حکوومەتا ھەرێمێ، پێشمەرگەی و دۆزا مە یا دەولەت بوونێ، بكه‌ن.