ئه‌مه‌ریكا: 77% ژ په‌ڤچوونێن په‌كه‌كێ و تركیێ ل باشوورێ كوردستانێ نه‌

ئه‌مه‌ریكا: 77% ژ په‌ڤچوونێن په‌كه‌كێ و تركیێ ل باشوورێ كوردستانێ نه‌

ل گۆر ناڤەندا ACLED یا ئەمەریکی ل ڤان 5 مه‌هێن دەرباسبوویی دە، پەڤچوونێن د ناڤبەرا پەکەکێ و ئارتێشا ترکیێ دە، 77% ل ھەرێما باشوورێ کوردستانێ نه‌.

پاش پرۆتۆکۆلا 1982ان د ناڤبەرا پەکەکێ و په‌دکێ دا ھاتی ئیمزە کرن ھەیا ئیرۆ، په‌كه‌كێ ل ھەرێما کوردستانێ ب جهـ بوویه‌، شەر و پەڤچوونێن ئارتێشا ترک و پەکەکێ ب گرانی ل سەر خاکا باشوورێ کوردستانێ د قەومن، ب تایبەتی ژی شەر پاش 1990ێ ل ھەرێما باشوورێ کوردستانێ دژوار بوویه‌، ل سەر ڤی بابەتی حکوومەتا ھەرێما کوردستانێ گەلەک جاران داخویانی بەلاڤ کرن و داخواز ژ ھەردو ئالییان کر کو خاکا باشوور نەکن ناڤەندا شەر.

 ڤێ جارێ ژی ناڤەندا ALCED یا ئه‌مه‌ریكی كو سازییه‌كه‌ نه‌حكوومی یا تایبه‌ته‌ ب به‌لاڤ كرنا داتایێن شه‌ر و په‌ڤچوونان، راپۆره‌ك بەلاڤ کر، ل گۆر وێ ل ڤان 5 مه‌هێن دەرباسبوویی دە، شەرێ د ناڤبەرا ترکیێ و پەکەکێ دە 77%ێ ل ناڤا خاکا باشوورێ کوردستانێ چێبوویە.

هه‌روه‌ها تەنێ 23 بوویەر ل باکورێ کوردستانێ چێبوونە، شەرێ په‌كه‌كێ یێ گەریلاتیێ پاش شەرێ خەندەکان یێ سالا 2016ان ل باکورێ کوردستانێ پر کێم بوویە، یەکینەیێن گەریلا ل دێرسمێ و ئامەدێ گەلەک فەرماندارێن خوە د ڤان شەران دا بەرزە کرن، د ھنەک پەڤچوونان دە ژی گەریلا ب کۆمی ئیمھا بوونە.

ئەڤ دوو سالن پەکەکێ تەنێ ل ھەرێما سەرھەدێ کارییە چەند چالاکییان بکە، ل دژی ھێزا لەشکرییا ئاگری و بازیدێ ھنەک چالاکی چێبوونە، ژ بەر پەیوەندیێن باش یێن د ناڤبەرا پەکەکێ و دەولەتا ئیرانێ دە، وەرزێ بھار و پاییزێ یەک – دوو یەکینەیێن گەریلا ل سەر سینۆرێ سەرھەدێ چالاکی کرنە، دەرڤەیی ڤان چەند چالاکییان، ل ھەرێمێن دن چ چالاکی و پەڤچوون دەرنەکەتنە، په‌كه‌كه‌ رێخستنەکی ب شەر دکارە ئالیگرێن خوە ل سەر لنگا بگرە، ژبەر بنکەفتنا خوە یا باکورێ کوردستانێ دەرباس بکە، دخوازە شەرێ خوە بکێشە باشوورێ کوردستانێ.

رێڤەبەرێ پەکەکێ رزا ئالتۆن ل 4/5/2017ان ژ بۆ ئاژانسا فرات نیۆزێ داخویانییەک دابوو و گۆتبوو: «ل باشوورێ کوردستانێ دێ ببە جھێ شەرەکی پر دژوار»، پشتی ڤێ داخویانییێ پەکەکێ ژ یەکینەیێن خوە یێن رازایی خوەست کو د ناڤا باژارێن باشوورێ کوردستانێ دە چالاکییا بکن.

 ل سەر ڤێ پلانێ ل رۆژا 7/7/2019 ل ھەولێرێ چالاکی ل دژی خەباتکارێ کۆنسۆلخانەیا ترکی پێک ھات، ل خوارنگەھا «ھۆککابازێ» پەکەکێ 3 کەس کوشتن، دوو ژ ڤان کوشتییان خەلکێ باشوورێ کوردستانێ بوون، لێ ستراتەژییا پەکەکێ یا شەرێ باژارێن ھەرێما کوردستانێ سەرنەکەفت.

ل گۆر راپۆرا ACLED ێ ژی دیار دبە کو پەکەکێ شەر دەرباسی ناڤا خاکا باشوورێ کوردستانێ کرییە، ڤی شەری زرارەک مەزن گھاندییە ئابۆرییا ھەرێمێ و گەلەک گوند و شوونوارێن چاندنێ ھاتنە ڤالاکرن، ترکێن دژمن بێ ناڤبەر ھێرشێن ھەوایی ل سەر دەڤەرێن باشوور ل داردخن و راپۆر دبێژە پرانی سڤیل دبن ئارمانجا ڤان ئێریشێن ئاسیمانی.

وەکە ھەر جار رێڤەبەرێن ھکوومەتا ھەرێمێ داخوازی ژ پەکەکێ و ترکیێ دکن و دبێژن باشوور نه‌كن جھێ شەر، ڤان چەند سالێن داویێ ب دەھان خەلکێ سڤیل ل سەر گوندێن خوە ھاتن کوشتن.

ئه‌مه‌ریكا: 77% ژ په‌ڤچوونێن په‌كه‌كێ و تركیێ ل باشوورێ كوردستانێ نه‌