ئیرانێ پێشنیازەکە نوو پێشکێشی ئامەریکایێ کر: کیلیتا ڤەکرنا ھورمزێ د دەستێ ترامپ دەیە

ل گۆری نووچەیا مالپەرا ناسکری “ئاکسیۆس”، ئیرانێ ب ناڤبەینکاریا پاکستانێ پێشنیازەکە نوو ژ بۆ کێمکرنا گرژیێ پێشکێشی ویلایەتێن یەکبوویی یێن ئامەریکایێ کریە. ئارمانجا سەرەکەیا ڤێ پێشنیازێ بداویکرنا ئالۆزیا لەشکەری و دوبارە ڤەکرنا تەنگاڤا ھورمزێیە، کو ئەڤ دەمەکە درێژە وەکی خالا ھەری گەرما جیھانێ تێ شۆپاندن.

د ھوورگلیێن پێشنیازا تەھرانێ دە خالەکە بالکێش ھەیە: ئیران ئامادەیە داخوازێن خوەیێن دەربارێ دانوستاندنێن ئەتۆمی دە ژ بۆ قۆناغەکە دن پاش بخە. د بەردێلا ڤێ دە، ئیران داخواز دکە کو ئامەریکا سزایێن ل سەر بەندەرێن وێ راکە؛ ھەکە ئەڤ شەرت پێک وەرە، تەھران سۆز ددە کو تەنگاڤا ھورمزێ ب تەمامی ژ بۆ چوونووھاتنا دەریایی ڤەکە.

تێ پایین کو ئیرۆ 26ێ نیسانێ، سەرۆکێ ئامەریکایێ دۆنالد ترامپ ل “ئۆدەیا ئۆپەراسیۆنان” لگەل بەرپرسێن پایەبلندێن ئاساییشا نەتەوەیی و شێورمەندێن سیاسەتا دەرڤە بجڤە. مژارا بنگەھین یا ڤێ جڤینا چارەنووسساز، نرخاندنا ڤێ پێشنیازا نوویا ئیرانێ و دیارکرنا ستراتەژیا نوویا ئامەریکایێیە.

دۆنالد ترامپ د داخویانیەکێ دە ژ بۆ کانالا “فۆکس نیۆز” گەلەکی گەشبین ئاخڤی و دیار کر کو ئەو باوەر دکە شەرێ لگەل ئیرانێ بەر ب داویێ ڤە دچە. ترامپ گۆت: “ئەز باوەر دکم کو ئەڤ کریز دێ پر زوو بداوی ببە و ئەم دێ ب سەرکەفتی ژێ دەرکەڤن.” لێ بەلێ، ترامپ جارەکە دن خەتا خوەیا سۆر ب بیر خست و تەکەز کر کو ئەوێ ب چ ئاوایی رێ نادن ئیران ببە خوەدیێ چەکێ ئەتۆمی.

سەرۆکێ ئامەریکایێ ھەر وھا بال کشاند سەر سەرکردایەتیا ئیرانێ و دەستنیشان کر کو ھنەک ژ وان “ئاقلانە” تەڤدگەرن. ترامپ ب پەیامەکە ڤەکری بانگ ل تەھرانێ کر و گۆت: “ھەکە ئیران بخوازە باخڤە، دەریێ مە ڤەکرییە.” ئەڤ داخویانیێن ترامپ وەکی نیشانەیەکە نەرمبوونێ د دیپلۆماسیێ دە تێنە نرخاندن، ھەر چەند زەختێن ئابۆری و لەشکەری ھین ژی د ئاستا ھەری بلند دە نە.