ل ترکیێ، باکورێ کوردستانێ و یوونانستانێ کارەساتا شەواتێ: زێدەتری 200 دەڤەر د ناڤ ئاگری دە مان
د سێ رۆژێن داوی دە ل ترکیێ و باکورێ کوردستانێ د ئەنجاما دەرکەتنا 218 شەواتێن دارستان و زەڤیان دە رەوشەکا گرنگ دەرکەت ھۆلێ. ھەڤدەم ل گراڤا گریتێ یا یوونانستانێ ژی ئاگرەکی مەزن گھیشت ناڤەندێن گەشتیاریێ و زیانەکا مەزن ل پەی خوە ھشت.
وەزیرێ چاندنی و دارستانان یێ ترکیەیێ ئیبراھیم یوماکل دەربارێ رەوشا داوی یا شەواتان دە داخویانیەک دا و راگھاند کو تیمێن ڤەمراندنێ کارینە 213 شەواتان کۆنترۆل بکن، لێ ل 5 دەڤەرێن جودا خەباتێن ڤەمراندنێ ب ئاوایەکی بێناڤبەر بەردەوام دکن. رایەداران دەستنیشان کر کو ژ بەر بایێ توند و گەرماھیا زێدە، تیم د تەکۆشینا ل دژی ئاگری دە لگەل زەحمەتیێن مەزن روو ب روو دمینن و مەترسییە ب تایبەتی ل ناڤچەیێن ئایدن، سوسورلوک، ئانتالیا و گولنارێ و ھەر کو دچە زێدەتر دبە.
ل ئالیێ دن، ل گراڤا گریتێ یا یوونانستانێ کو د ناڤا دەریایا سپی دەیە، ئاگرەکی مەزن کو ژ دارستانان دەست پێ کربوو د دەمەکە کورت دە گھیشت ھەرێمێن گەشتیاریێ. ژ بەر بەلاڤبوونا ب لەز یا ئاگر و مەترسیا ل سەر ژیانا وەلاتیان، رایەدارێن یوونانی ب سەدان وەلاتی و گەشتیار ژ ھەرێمێ ڤەگوھاستن جھێن ئەولە.
ل گۆری زانیاریێن یەکەمێن کو ژ ھەرێمێ ھاتنە وەرگرتن، ھۆتێلەکا مەزن یا گەشتیاریێ و گەلەک خانیێن ل دەردۆرێ د ناڤ ئاگری دە مانە و ب تەمامی شەوتینە. تێ راگھاندن کو خەباتێن تیمان یێن ژ بۆ کۆنترۆلکرنا ئاگری ل ھەر دو وەلاتان ژی بەردەوام دکن.
