شاندیێ تایبەتێ دۆنالد ترامپ ب نامەیەکا توند گھیشت بەغدایێ
شاندیێ تایبەتێ سەرۆکێ ئامەریکایێ دۆنالد ترامپ ژ بۆ کارووبارێن رۆژھلاتا ناڤین تۆم باڕاک، د چارچۆڤەیا سەردانەکە فەرمی دە گھیشت پایتەختا ئیراقێ باژارێ بەغدایێ. تێ چاڤەرێکرن کو باڕاک پەیامەکە گرینگ و نامەیەکە تایبەتا ترامپ یا دەربارێ بێچەککرنا گرووپێن چەکدار و سینۆردارکرنا ھەژمۆنا ئیرانێ دە بگھینە رایەدارێن پایەبلندێن حکوومەتا فەدەرال.
تۆم باڕاک ئیرۆ (دوشەمبێ، 15ێ خزیرانا 2026ێ) د دەستپێکا ھەڤدیتنێن خوە دە راستەوخۆ لگەل سەرۆکوەزیرێ ئیراقێ عەلی زەیدی جڤیا. ل گۆری زانیاریێن کو ژ چاڤکانیێن دیپلۆماتیک ھاتنە ب دەست خستن، باڕاک نامەیەکا تایبەت یا ترامپ رادەستی زەیدی کریە کو تێ دە داخوازەکا زەلال و ھشک ھەیە؛ ل گۆری نامەیێ، دڤێت سیستەما ئیراقێ د دەمەکێ دیارکری دە ھەموو گرووپێن چەکدار کۆنترۆل بکە و چەکان ب تەمامی ژ دەستێ وان بگرە.
ئەڤ فشارا دیپلۆماتیکا واشنگتۆنێ د دەمەکێ دەیە کو گرووپێن مینا کەتاییب حزبوللاھ، نوجەبا و سەیید ئەل-شوھەدا ب ئەشکەرە راگھاندنە کو ئەو ئامادە نینن چەکێن خوە دەینن و فەرمانێن فەرمی یێن سەرۆکوەزیریێ بینن جھ. ئەڤ ھەلوەستا گرووپێن چەکدار بوویە سەدەما بێباوەریێ ل جەم رێڤەبەریا ترامپ، ژ بەر کو فکارێن مەزن ھەنە کو ئەڤ پێکھاتە پشتی تەڤلیبوونا ناڤ سازیێن حکوومەتێ ژی، د رەوشێن ئاوارتە دە دیسا چەکان ل دژی بەرژەوەندیێن ئامەریکایێ یێن ل ھەرێمێ ب کار بینن.
د ڤێ چارچۆڤەیێ دە، تۆم باڕاک د ھەڤدیتنا خوەیا لگەل زەیدی دە تەکەز کر کو ب چ ئاوایی نایێ قەبوولکرن چەک ل دەرڤەیی کۆنترۆلا سازیێن فەرمی یێن دەولەتێ و سەروەریا یاسایێ بمینن. ھەروھا د جڤینێ دە مژارا بداویکرنا باندۆرا سیاسی و سەربازی یا ئیرانێ یا ل سەر بریارێن بەغدایێ و چەند دۆسیەیێن گرنگێن ئابۆری و ئەنەرژیێ ل سەر مێزا گۆتووبێژان جیھ گرتن.
ل گۆری بەرنامەیا سەردانێ، تۆم باڕاک پشتی بداویکرنا ھەڤدیتنێن خوەیێن ل بەغدایێ، دێ سبە بەرێ خوە بدە پایتەختا ھەرێما کوردستانێ باژارێ ھەولێرێ. بریارە شاندیێ ئامەریکایێ ل ھەولێرێ لگەل سەرۆکێ ھەرێما کوردستانێ، سەرۆکوەزیرێ ھەرێما کوردستانێ و سەرکردەیێن ئالیێن سیاسی یێن کوردستانێ بجڤە داکو گوھارتنێن ھەری داوی یێن جیۆپۆلیتیک یێن ھەرێمێ و گەشەپێدانا پەیوەندیێن ھەولێر-واشنگتۆنێ گۆتوبێژ بکە.
