دۆنالد ترامپ ب فەرمی گھیشتنا لھەڤکرنا داوی یا لگەل ئیرانێ راگھاند
سەرۆکێ ویلایەتێن یەکبوویی یێن ئامەریکایێ دۆنالد ترامپ ب فەرمی راگھاند کو پرۆسەیا لھەڤکرنا د ناڤبەرا واشنگتۆن و تەھرانێ دە ب سەرکەفتی ب داوی بوویە. ترامپ وەکی گاڤا یەکەما ڤێ پێنگاڤێ، فەرمان دا کو تەنگاڤا ھورمزێ بێیی چ باج یان ئاستەنگیان ب روویێ کەشتیێن ناڤنەتەوەیی دە وەرە ڤەکرن و دۆرپێچا دەریایی یا ل سەر ئیرانێ ب تەمامی وەرە راکرن.
سەرۆکێ ئامەریکایێ ئیرۆ (دوشەم، 15ێ خزیرانا 2026ێ) ل سەر حەسابا خوەیا فەرمی یا تۆرا جڤاکی “تروس سۆسیال” پیرۆزباھیا گھیشتنا لھەڤکرنا داوییا لگەل کۆمارا ئیسلامییا ئیرانێ کر. ترامپ ئەشکەرە کر کو وی دەستھلاتا تام دایە سازیێن پێوەندیدار دا کو ئابۆریا ھەرێمێ زندی بکن و بانگ ل کەشتیێن بازرگانی یێن جیھانێ کر کو دەست ب تەڤگەرێ بکن داکو پەترۆل ژ نوو ڤە بحەرکە. سەرۆکێ ئامەریکایێ ئەڤ گاڤ وەکی “لھەڤکرنەکە مەزن” ژ بۆ ئاشتی و ئارامیا ھەرێمێ پێناسە کر و دەستنیشان کر کو گەلەک سەرۆکان بەریا وی ھەول دابوون ڤێ ئاشتیێ بکن لێ ب سەر نەکەتبوون.
ترامپ دا زانین کو رۆژا ئینێ، پشتی ئیمزەکرنا فەرمییا پەیمانێ، دێ تەنگاڤا ھورمزێ ژ بۆ پاقژکرنا مینان راستەوخۆ وەرە ڤەکرن داکو تەڤگەرا ئەنەرژیێ یا ل سەرانسەری جیھانێ ڤەگەرە رەوشا خوەیا ئاسایی. ل گۆری داخویانیێ، راکرنا دۆرپێچا دەریایی یا ئامەریکایێ یا ل ناڤچەیێ دێ دەملدەست جێبەجێ بیت و ئەڤ یەک دێ روویێ بازرگانیا ناڤدەولەتی یا ل کەنداڤێ ب تەمامی بگوھەرە.
ژ ئالیێ دن ڤە، سەرۆکوەزیرێ پاکستانێ شەھباز شەریف ب داخویانیەکێ ل سەر تۆرا جڤاکییا “X”ێ ئەڤ لھەڤکرن پشتراست کر و راگھاند کو پشتی دانوستاندنێن دژوار، ھەر دو ئالی گھیشتنە ئەنجامێ. شەریف ئەشکەرە کر کو مەراسیما فەرمی یا ئیمزەکرنا ڤێ رێکەفتنا دیرۆکی یا د ناڤبەرا ئامەریکا و ئیرانێ دە، دێ رۆژا ئینێ (19ێ خزیرانا 2026ێ) ل وەلاتێ سویسرایێ ب ئامادەبوونا نوونەرێن ناڤنەتەوەیی وەرە لدارخستن.
