سەرۆککۆمارێ ترکیەیێ رەجەب تەییب ئەردۆگان و سەرۆکێ وەلاتێن یەکبوویی یێن ئامەریکایێ دۆنالد ترامپ، د پەیوەندیەکا تەلەفۆنی دە پەیوەندیێن دوئالی، ئالۆزیێن د ناڤبەرا واشنتۆن و تەھرانێ دە و شەرێ ناڤبەرا رووسیا و ئوکراینایێ گوفتووگۆ کرن.
ل گۆری داخویانیا سەرۆکاتیا پەیوەندیانا سەرۆککۆماریا ترکیەیێ، ئەڤ گوفتووگۆ دوھی شەمبیێ (7ێ مژدارا 2026ێ) ھات ئەنجامدان. د پەیوەندیێ دە مژارێن ھەرێمی و ناڤنەتەوەیی ب بەرفرەھی ھاتن نرخاندن.
د دەما پێوەندیێ دە، سەرۆککۆمارێ ترکیەیێ ئەردۆگان دەستنیشان کر کو ھەڤکاریا د ناڤبەرا ئەنقەرە و واشنتۆنێ دە دێ ل سەر بنگەھا پێشڤەچوونێ بەردەوام بکە و تەکەز کر کو د قۆناغا نوو دە ژ بۆ خورتکرنا ڤان پەیوەندیان گاڤێن نوو بێن ئاڤێتن.
دەربارێ ئالۆزیێن ل رۆژھلاتا ناڤین دە، ئەردۆگان بال کشاند سەر گرینگیا ئاشتی و ئارامیا ھەرێمێ و دیار کر کو دڤێت ئالۆزیێن د ناڤبەرا تەھران و واشنتۆنێ دە ب رێیا دیپلۆماسیێ بێن چارەسەرکرن و ترکیە دێ ژ بۆ ڤێ یەکێ کەدێ بدە.
د داویا ئاخافتنێ دە، سەرۆککۆمارێ ترکیەیێ ھێڤیا خوە ئانی زمان کو ھەولدانێن دیپلۆماتیکێن ژ بۆ بداویانینا شەرێ ل ئوکراینایێ ئەنجامێن ئەرێنی ب دەست بخن و دەستنیشان کر کو دڤێت دیالۆگا لگەل ھەر دو ئالیان بێ ناڤبەر بەردەوام بکە.
