د چارچۆڤەیا 31مین کۆنفەرانسا نەتەوەیێن یەکگرتی یا ل سەر گوھەرینا کەشووھەوایێ (COP31) دە، لووتکەیا رێبەرێن جیھانێ ل باژارێ ئانتالیایێ یێ ترکیەیێ ب بەشداریا زێدەتری 100 سەرۆک و سەرکردەیێن ناڤدەولەتی دەست پێ کر. نێچیرڤان بارزانی سه‌رۆكێ هه‌رێما كوردستانێ و هه‌روه‌ها شاندەکە پایەبلندا حکوومەتا ھەرێما کوردستانێ ژی ژ بۆ پێشکێشکرنا مەترسیێن ژینگەھی یێن ھەرێمێ د لووتکەیێ دە جھ دگرە.
لووتکەیا رێبەران کو د بن چاڤدێریا سەرۆککۆمارێ ترکیەیێ رەجەپ تاییپ ئەردۆگان دە برێڤە دچە، وەک گرینگترین و ھەستیاترین قۆناغا کۆنفەرانسێ تێ دیتن و دێ دو رۆژان دەوام بکە. د ڤێ لووتکەیێ دە بریاردەرێن سەرەکەیێن جیھانێ دجڤن دا کو ل سەر کێمکرنا باندۆرێن گوھەرینا ئاڤھەوایێ بگھیژن بریار و رێکەفتنێن چارەنووسساز.
ل گۆری ئاگاھیان، د لووتکەیا رێبەران دە 102 سەرۆک و سەرۆکدەولەتێن جیھانێ ل گەل نوونەرێن 196 وەلاتان و یەکیتیا ئەورۆپایێ ئامادە نە. ھەر وھا زێدەتری 300 وەزیر، ھەژمارەکە بەربچاڤ ژ بەرپرسێن بلندێن نەتەوەیێن یەکگرتی، بانکا جیھانی و ئاژانسا ناڤدەولەتییا وزەیێ بەشدار دبن.
د ڤێ چارچۆڤەیێ دە، شاندەکە پایەبلندا حکوومەتا ھەرێما کوردستانێ ژی ئامادەیە دا کو دیتن، پێشنیار و پرسگرێکێن گرێدایی گەفێن ژینگەھی و قەیرانا ئاڤێ یا ل ھەرێمێ رابەری جڤاکا ناڤدەولەتی بکە.
رۆژەڤا سەرەکەیا جڤینێ
د جڤینێن ڤان ھەر دو رۆژان دە، سەرکردەیێن جیھانێ دێ گرانی بدن سەر چەند مژارێن ستراتەژیک؛ د سەری دە:
– لەزکرنا پرۆسەیا ڤەگوھاستنا بەر ب وزەیا پاقژ ڤە.
– جیبجیکرنا پرۆژەیا “بەرماھیێن سفر”.
مسۆگەرکرنا ئەولەھیا خورەکێ و ئاڤاکرنا باژارێن ل ھەمبەر گوھەرینا کەشوھەوایێ خوەراگر.
– پێشخستنا پیشەسازیا کەسک، پاراستنا ژینگەھا دەریا و دەریایان، و ھەر وھا بھێزکرنا سەکتۆرا تەندورستیێ ل ھەمبەر مەترسیێن ژینگەھی.
ئەڤ جارا یەکەمە کو ترکیە مێڤانداریا کۆنفەرانسا گوھەرینا کەشوھەوایێ یا نەتەوەیێن یەکگرتی دکە. تێ چاڤەرێکرن کو تەڤاھیا کار و چالاکیێن کۆنفەرانسا COP31ێ ب گشتی 12 رۆژان بدۆمە.
