پێشمه‌رگه‌ ڤێ هه‌نگاڤا گرینگ دخوازه‌

وه‌زاره‌تا پێشمه‌رگه‌ ئیرۆ داخواز ژ حكوومه‌تا فه‌ده‌رالا ئیراقێ كر، سه‌ر و مالێ هه‌مولاتییان ل خه‌تا ته‌ماسێ بپارێزه‌، ئه‌ڤ داخوازی هه‌موه‌ختا ئێریشا داعشێ ل سه‌ر گونده‌كێ كاكه‌ییان تێ كو تێده‌ 7 كه‌س هاتنه‌ كوشتن.

ته‌رۆریستێن داعشێ ل دره‌نگیێن شه‌ڤا ده‌رباسبوویی، ئێریشی گونده‌كێ كاكه‌ییان یێ گرێدای خانه‌قینێ كر، 7 كه‌س هاتنه‌ كوشتن، 5 هه‌مولاتیێن سڤیل و 2 له‌شكرێن ئارته‌شا ئیراقێ.

ل ڤێ ده‌ربارێ ده‌، وه‌زاره‌تا پێشمه‌رگه‌ ئیرۆ رۆژا یه‌كشه‌می داخوه‌یانی به‌لاڤ كر و تێده‌ داخواز ژ حكوومه‌تا فه‌ده‌رالا ئیراقێ كر، جانێ هه‌مولاتییان ل ناڤچه‌یێن كو به‌رپرسیارییا پاراستنا وان ژ ئه‌ركا ئارته‌شا ئیراقێ یه،‌ ب پارێزه‌.

د به‌شه‌كێ داخوه‌یانیێ ده‌ هاتییه‌: «ئه‌م داخوازێ ژ هێزێن ئیراقی دكین كو بێ جوداهییا ئۆلی، نه‌ته‌وه‌یی، جان و سه‌لامه‌تییا هه‌مولاتیێن سینۆرێ وان ناڤچه‌یان بپارێزه‌ كو ل خه‌تا ته‌ماسێ نه‌، ل ده‌ما رابووری مه‌ چه‌ندین جاران هۆشداری ژ نه‌بوونا هێزێن پێشمه‌رگه‌ ل وان ناڤچه‌یان دانه‌ و هه‌روها وێ ڤالاهییا ئه‌وله‌كاریێ كو نێڤبه‌را پێشمه‌رگه‌ و ئارته‌شا ئیراقێ ده‌ هه‌یه‌».

وه‌زاره‌تا پێشمه‌رگه‌ ل هه‌مان ده‌مێ داخواز ژ حكوومه‌تا ئیراقێ كر كو هه‌رزوو كۆمیتا بلند یا وه‌زاره‌تا به‌ره‌ڤانییا ئیراقێ و وه‌زاره‌تا پێشمه‌رگه‌ وه‌ره‌ كارا كرن، ژ بۆ كو رێ ل به‌ر تالان كرنا ناڤچه‌یێن كوردی و ته‌عریب كرنا گوندێن وان و كوشتنا وان وه‌ره‌ گرتن.