هه‌په‌گه دیسان یاریێ ب خوینا شه‌هیدان دكه‌ت
هێزێن پاراستنا گه‌ل هه‌په‌گه، بالێ له‌شكری یێ په‌كه‌كێ داخوه‌یانی ل ده‌ربارا ئێریشا تركیێ به‌لاڤ كر و تێده گۆتییه كو ئه‌ڤ ئێریش ل دژی گه‌لێ سڤیل پێكهاتییه و خوه بێ گونه‌هـ نیشان دده.
هه‌په‌گێ ئیرۆ رۆژا دوشه‌می 15/6/2020ان ل ده‌ربارا ئێریشا شه‌ڤا ده‌رباسبوویی یا ده‌وله‌تا داگیركه‌را ترك، داخوه‌یانی به‌لاڤ كر و تێده گۆتییه كو ئه‌ڤ ئێریش ل سه‌ر ناڤچه‌یێن گه‌لێ سڤیل پێكهاتنه و نه ل سه‌ر جیێن په‌كه‌كێ بوویه، هه‌موه‌خت د داخوه‌یانیێ ده خوه بێ گونه‌هـ نیشان دده و دبێژه: «تو لڤینه‌كه په‌كه‌كێ ل وان ناڤچه‌یان نینه كو كه‌تنه به‌ر ئیریشێن باله‌فران».
هه‌په‌گه د هه‌مان داخوه‌یانی ده دبێژه: «كامپا مه‌خموورێ كو گه‌لێ سڤیل تێده یه، ژ ئالیێ باله‌فران كه‌تییه به‌ر ئێریشان».
هه‌ر ل ڤێ ده‌ربارێ ده، ئاژانسا ANFێ یا په‌كه‌كێ ده‌ست نیشان كرییه كو حكوومه‌تا باشوورێ كوردستانێ و نه‌ته‌وه‌یێن یه‌كبوویی ژ كامپا مه‌خموورێ به‌رپرسه، خوه كڕ كرنه و تو داخوه‌یانی ل ده‌ربارا ئێریشێ نه‌دانه.
ئه‌ڤ یه‌ك ل ده‌مه‌كێ یه، كو كامپا مه‌خموورێ ب ته‌مامی ل ژێر سه‌رپه‌رشتییا په‌كه‌كێ و حكوومه‌تا ئیراقا فه‌ده‌رال ده یه و تو ده‌ستهلاته‌كه حكوومه‌تا باشوورێ ولات ل سه‌ر نینه.
د به‌شه‌كا دن یا داخوه‌یانییا هه‌په‌گێ ده هاتییه كو ده‌وله‌تا تركیێ ب ڤێ ئێریشێ گه‌لێ ئێزدی یێ شه‌نگالێ هه‌ده‌ف گرتییه كو ل دژی ته‌رۆرا داعشێ شه‌ر كرنه.
یا راست هه‌په‌گه دخوازه ب ڤێ یه‌كێ وها بێژه: «ئه‌م ل شه‌نگالێ نینن، ئه‌م نه ئه‌ون كو مه گه‌لێ ئێزدی خاپاندییه و سه‌دان جوانێن وان ره‌ڤاندنه، ئه‌م نه ئه‌ون كو چه‌ندین هێزێن گرێدای خوه وه‌كه یه‌به‌شێ ل شه‌نگالێ چێكرنه، ئه‌م نه‌ئه‌ون كو ب سه‌ده‌ما باره‌گه‌هێن مه یێن ل شه‌نگالێ ب ده‌هان جاران باله‌فران گه‌لێ سڤیلێ ئێزدی هه‌ده‌ف گرتییه».
ل داوییا داخوه‌یانییا خوه هه‌په‌گه ب خوه ئاخافتنا خوه دره‌واندییه و دبێژه: «باله‌فرێن شەر ناڤچه‌یێن سیدا و شەھید روستەمێن زاپێ، وەرخەلێ یا ھەرێما ئاڤاشینێ، سننێ یا ھەرێما خاکورکێ و ناڤچه‌یا شەھیدان و زەرگەلێ یێن ھەرێما قەندیلێ بۆمبە کرنه، ئه‌ڤ ناڤچه ل گه‌ل كامپا مه‌خموورێ و شه‌نگالێ ژی هه‌ر كه‌س دزانه كو په‌كه‌كه تێده یه، لێ به‌لێ وێ ل ده‌ستپێكا داخوه‌یانییا خوه گۆتییه كو تو لڤینه‌كه مه ل وان ناڤچه‌یان نینه كو كه‌تنه به‌ر ئێریشان.
