بزانه‌ ژ 2015ێ په‌كه‌كێ چ مالوێرانییه‌ك ژ بۆ كوردان ئانییه‌

بزانه‌ ژ 2015ێ په‌كه‌كێ چ مالوێرانییه‌ك ژ بۆ كوردان ئانییه‌

 گرۆپا كریزا ناڤده‌وله‌تی ل ده‌ربارا شه‌رێ په‌كه‌كێ و تركیێ ئه‌شكه‌ره‌ كر، د 5 سالێن رابووری ده‌، پێتر ژ 4900 كه‌سان هاتنه‌ كوشتن، له‌شكرێن ترك، گه‌ریلا و هه‌مولاتیێن سڤیل، كوشتیێن په‌كه‌كێ 3 جار ژ یێن تركان پێترن.

گرۆپا كریزا ناڤده‌وله‌تی راپۆرەک ل دەربارێ شەرێ د ناڤبەرا ئارته‌شا ترکیێ و گەریلایێن په‌كه‌كێ دە بەلاڤ کر کو تێدە ھاتییە راگھاندن، ژ تیرمەھا 2015ان، 4906 کەس د ئەنجاما شەرێ ھەردو ئالییان دە ھاتنە کوشتن.

ل گۆر وێ راپۆرتێ د ده‌ما 5 سالان دە، 2943 گەریلایێن په‌كه‌كێ جانێ خوە ژ دەست دا نە و ھەر وھا 827 پۆلیس، 113 گوندپارێز ھاتنە کوشتن و ناسنامەیا 226 کەسان ژی دیار نینە.

د ڤێ راپۆرێ ده‌، ئه‌شكه‌ره‌ دبه‌ كو كوشتیێن په‌كه‌كێ 3 جار ژ یێن تركان پێترن، ئه‌ڤ ژی ب وێ واتایێ تێ كو هه‌ڤسه‌نگییا شه‌ر تو جاران د به‌رژه‌وه‌ندییا په‌كه‌كێ ده‌ نه‌بوویه‌، ژ به‌ر كو ژبلی زرارێن جانی یێن هه‌ری مه‌زن، ژ سالا 2015ان په‌كه‌كێ ب ده‌هان هه‌رێمێن كو ل ژێر كۆنترۆلا وێ ده‌ بوون ل باشوور و باكورێ ولات راده‌ستی تركیێ كرنه‌، هنه‌ك ژ وان هه‌رێمان په‌كه‌كێ ب ده‌هان سالان تێده‌ جی دگرت، لێ به‌لێ د چه‌ند ساعه‌تان ده‌ ژ بۆ تركیێ ب جی هشتن، وه‌كه‌ چیایێ شه‌كیف.

گرۆپا كریزا ناڤدەولەتی ھەژمارا کوشتییان بۆ سالانە دانیە و دیار کرییە، ل سالا 2015ان 687 کەس، ل سالا 2016ان 2242 کەس، ل سالا 2017ان 825 کەس، ل سالا 2018ان 607 کەس و د 5 مەھێن یەکەمێن ئیسال دە ژی 54 کەس، د شەرێ په‌كه‌كێ و ترکیێ دە ھاتنە کوشتن.

وەک کو د راپۆرێ دە ھاتییە ئاشکەرە کرن، ژ وێ ھەژمارا قوربانییان 4091 کەس ل باکورێ کوردستانێ، 464 کەس ل باشوورێ کوردستانێ «گەریلا و خەلکێ سڤیل» و 258 کەس ل باژارێن دن یێن ترکیێ بوونە.

ھەر ل گۆر راپۆرێ، ل باکورێ کوردستانێ ب 1106 کەسان پرانییا قوربانیێن وی شەری ل باژارێ شرنەخێ، 808 کەس ل جۆلەمێرگێ، 412 قوربانی ل مێردینێ و 636 کەس ژی ل ئامەدێ د ئەنجاما شەرێ ھەردو ئالییان دە بوونە قوربانی.

شەرێ د ناڤبەرا گەریلایێن پککێ و ترکیێ دە زێدەتر ژ 35 سالە بەردەوامە و ھەتا نھا د ئەنجاما وی شەری دە ب دەھان ھەزار کەسان جانێ خوە ژ دەست دانە کو پرانییا وان کورد بوونە.