ئێریشا دهولهتا تركیێ ل سهر باشوورێ كوردستانێ ب سهدهما پهكهكێ دهوام دكه، ئیرۆ ژی گوندهكی دن یێ سینۆرێ زاخۆ تێ ڤالا كرن، پاش كو ل شهڤا دهرباسبوویی كهتی بهر ئێریشهكه گران یا مۆشهكان.
چاڤكانیێن پێگهها «داركا مازی» ل باشوورێ كوردستانێ ئهشكهره كر، پاش كو دوهـ رۆژا ئینی گوندێ ب ناڤێ «ئهڤلههێ» گرێدای سینۆرێ ناڤچهیا باتیفێ ل سینۆری باژارێ زاخۆ كهتییه بهر ئێریشێن بالهفر و تۆپهاڤێژێن ئارتهشا تركیێ، سهرێ سبێ یا ئیرۆ رۆژا شهمی 11/7/2020ان، گوند ب تهڤاهی تێ ڤالا كرن.
ل گۆر ئاگاهیێن دهستێ مه، ب سهدهما نێز بوونا پهڤچوونێن ئارتهشا تركیێ و پهكهكێ، تهنێ 5 مالبات د گوندێ ئهڤلههێ ده مابوون و وان چاڤدێرییا رهز و باخێن خوه و حهیوانێن خوه دكر، لێ پاش كو دوهـ گوندێ وان كهتییه بهر ئێریشان، ئیرۆ ل ساعهت 8:00 سبێ، وان 5 مالباتان گوند ب جی هشتن و بهر ب گوندێ بانكێ ڤه چوون.
چاڤكانیێن پێگهها «داركا مازی» دیمهنێن ناڤا گوند شاندنه و خوهیا دبه كو مۆشهكێن دهولهتا تركیێ ب مالێن ههمولاتییان كهتنه و زرارێن پر مهزن ب مالێن وان خستنه.
ژ دهستپێكا ئێریشا تركیێ ل سهر باشوورێ كوردستانێ كو ل 15ی مهها رابووری بوو، ههیا نها نێزی 50 گوندێن باشوورێ كوردستانێ هاتنه ڤالا كرن، ههژمارهك ژێ ل سینۆرێ زاخۆ و باتیفێ نه، پهكهكه ژی ههر كو دچه حهرهكهتێن خوه تێخه ناڤا گوندان، ئهڤ ژی ب وێ واتایێ تێ كو پهكهكه دخوازه گوندێن باشوور وێران بكه و شێنیێن وان ئاواره و دهربهدهر بكه.
