كه‌بوودوه‌ند: دالیا ژ بال حكوومه‌تا باشوور ڤه‌ نه‌هاتییه‌ ته‌سلیم كرن

محمد صديق كبودوند

«ل گۆر له‌كۆلینێن من، نووچه‌یا ته‌سلیم كرنا دالیا د ئه‌ساس ده‌ نه‌راسته‌ و ل سه‌ر وه‌شاندنا ڤێ شاشێتیێ عه‌فۆیێ دخوازم»

محه‌مه‌د سه‌دیق كه‌بوودوه‌ند، سه‌رۆكێ رێخستنا مافێن مرۆڤان ئا كوردستانێ RMMK د تویته‌كێ ده‌ راگهاند كو ئه‌نجامێن له‌كۆلینێن كو وی كرنه‌، ئه‌شكه‌ره‌ كرن كو نووچه‌یا ته‌سلیم كرنا كه‌چا رۆژئاڤایی ژ بال حكوومه‌تا باشوورێ كوردستانێ ب ده‌وله‌تا تركیێ نه‌راسته‌، هه‌موه‌خت كه‌بوودوه‌ند ل سه‌ر وان ئاگاهیێن ل ڤێ ده‌ربارێ ده‌ ژ بال وان ڤه‌ هاتنه‌ پارڤه‌ كرن، داخوازا عه‌فۆیێ كرییه‌.

پاش كو هه‌ژماره‌كه‌ پێگه‌هێن گرێدایی په‌كه‌كێ ب ئاوایه‌كێ ئارمانجدار و ژ بۆ تێكدانا ناڤ مالا كورد، ئاگاهی ل ده‌ربارا ته‌سلیم كرنا كه‌چا رۆژئاڤایی «دالیا مه‌حموود موسلم »كو دبه‌ برازییا سالح موسلم ئێ هه‌ڤسه‌رۆكێ به‌رێ ئێ په‌یه‌دێ ژ بال حكوومه‌تا باشوورێ كوردستانێ ڤه‌ پارڤه‌ كرن، محه‌مه‌د كه‌بوودوه‌ند سه‌رۆكێ رێخستنا مافێن مرۆڤان ئا كوردستانێ ئه‌ڤ نووچه‌ تویت كربوو، لێ به‌لێ كه‌بوودوه‌ند پشتره‌ د تویته‌كه‌ دن دا ژ بلی داخوازا عه‌فۆیێ وها نڤیساندییه‌:

«ل گۆر له‌كۆلینێن كو من كرنه‌، ئه‌شكه‌ره‌ بوو كو نووچه‌یا ته‌سلیم كرنا كه‌چا رۆژئاڤا ژ بال حكوومه‌تا باشوورێ كوردستانێ ب ده‌وله‌تا تركیێ د ئه‌ساس ده‌ دووره‌ ژ حه‌قیقه‌ت و راستیێ و وها نینه‌ وه‌كه‌ وان د تویتا خوه‌ یا به‌رێ ده‌ پارڤه‌ كری».

ته‌كستا تویتا محه‌مه‌د سه‌دیق كه‌بوودوه‌ند ئێ سه‌رۆكێ رێخستنا مافێن مرۆڤان ئا كوردستانێ:

داخوازا عه‌فۆیێ:

«ل گۆر له‌كۆلینێن ده‌ستپێكێ كو ل سه‌ر حه‌قیقه‌ت و دروستییا نووچه‌یا ته‌سلیم كرنا كه‌چا رۆژئاڤایی ب هێزێن تركیێ كو من كرنه‌، وها دیار دبه‌ كو ئه‌ڤ هه‌وال د ئه‌ساس ده‌ نه‌راسته‌ و ناڤه‌رۆكا وان ب وی ئاوایی نینه‌ وه‌كه‌ من د تویتا خوه‌ یا به‌رێ ده‌ پارڤه‌كری، له‌وما ل سه‌ر ڤێ شاشێتیێ داخوازا عه‌فۆیێ ژ وان كه‌سان دكم كو تویتا مه‌ لایك كرین».

محه‌مه‌د سه‌دیق كه‌بوودوه‌ند خه‌لكێ پارێزگه‌هییا سنه‌ ئا رۆژهلاتا كوردستانێ و دامه‌زرێنه‌رێ رێخستنا مافێن مرۆڤان ئا كوردستانێ RMMK یه‌، ب یه‌ك ژ چالاكڤانێن هه‌ری دیار ئێن مافێن مرۆڤان ل كوردستانێ تێ ناس كرن كو به‌رگری ژ مافێن تاكێ كورد و گه‌لێ كوردستانێ كرییه‌، ئه‌و بۆ ده‌ما 10 سالان ژ بال ره‌ژیما ئیرانێ ڤه‌ هاتییه‌ زیندان كرن.

كه‌بوودوه‌ند پاش ئازادبوونا وی جار دن ده‌ست ئاڤێت خه‌باتا خوه‌ ئا به‌رگریێ ژ تاكێ كورد، محه‌مه‌د سه‌دیق كه‌بوودوه‌ند و رێخستنا وی ئا مافێن مرۆڤان ل رۆژهلاتا كوردستانێ ب كه‌س و رێخستنه‌كه‌ نێزی په‌كه‌كێ تێن ناس كرن.

تێ زانین وه‌زاره‌تا كارێن ناڤخوه‌ ئا حكوومه‌تا باشوورێ كوردستانێ ئیرۆ رۆژا دوشه‌می داخوه‌یانی ل ده‌ربارا ته‌سلیم بوونا كه‌چا رۆژئاڤایی «دالیا» ب كۆد ناڤێ «ڤیان شه‌رڤان» دایه‌ كو د ناڤا رێزێن یه‌په‌ژێ ده‌ بوو.

د داخوه‌یانیێ ده‌ حكوومه‌تا باشوور به‌رسڤا مه‌دیا په‌كه‌كێ دایه‌ و تێده‌ ئه‌شكه‌ره‌ كر كو «دالیا» ب كێفا دلێ خوه‌ ته‌سلیم بوویه‌، ئه‌وێ تێكلیێن سۆزداریێ ل گه‌ل شه‌رڤانه‌كی دن گرێدا بوون، له‌وما ب هه‌ڤره‌ ره‌ڤیانه‌ تركیێ، هه‌موه‌خت داخواز ژ مه‌دیا په‌كه‌كێ كر كو ل شوونا به‌لاڤ كرنا دره‌وان گه‌ره‌كه‌ ژ خوه‌ بپرسن چما گه‌ل رێزێن رێخستنا هه‌وه‌ ب جی دهێله؟‌.