د كه‌یسا دالیایێ ده‌ باشوورێ كوردستانێ دره‌وێن په‌كه‌كێ ئه‌شكه‌ره‌ دكه‌

د كه‌یسا برازییا سالح موسلم ده‌ باشوورێ كوردستانێ دره‌وێن په‌كه‌كێ ئه‌شكه‌ره‌ دكه‌

حكوومه‌تا باشوورێ كوردستانێ: «دالیا تێكلیێن سۆزداریێ دگه‌ل شه‌رڤانه‌كی دن گرێدابوون، وێ ب كێفا دلێ خوه‌ رێخستن ب جی هشت و ره‌ڤیا تركیێ»

وه‌زاره‌تا كارێن ناڤخوه‌ ئا حكوومه‌تا باشوورێ كوردستانێ، ل ده‌ربارا كه‌یسا ته‌سلیم بوونا برازییا سالح موسلم ئێ هه‌ڤسه‌رۆكێ به‌رێ ئێ په‌یه‌دێ داخوه‌یانی دا و دبێژه‌: «كه‌چا هه‌وه‌ تێكلییه‌كه‌ سۆزداریێ دگه‌ل شه‌رڤانه‌كی دن هه‌بوو، وان ب هه‌ڤره‌ بریارا ب جی هشتنا په‌كه‌كێ دا و ره‌ڤیانه‌ تركیێ».

وه‌زاره‌تا كارێن ناڤخوه‌ ئا حكوومه‌تا باشوورێ كوردستانێ، ئیرۆ رۆژا دوشه‌می 20/7/2020ان، ل ده‌ربارا كه‌یسا ته‌سلیم بوونا «دالیا مه‌حموود موسلم» كو دبه‌ برازییا سالح موسلم هه‌ڤسه‌رۆكێ به‌رێ ئێ پارتییا یه‌كێتییا ده‌مۆكراتیك دا، د داخوه‌یانیێ ده‌، مه‌دیایا په‌كه‌كێ و ئالیگرێن وێ دره‌واندییه‌ و دبێژه‌، «كه‌چا هه‌وه‌ رێزێن رێخستنێ ب جی هشتنه‌ و ئه‌و ب كێفا دلێ خوه‌ ده‌رباسی تركیێ بوو و ته‌سلیم بوویه»‌.

دالیا تێكلییه‌كه‌ سۆزداری دگه‌ل تۆلهدان هه‌بوو

ل 15 ڤێ مه‌هێ ده‌وله‌تا تركیێ ئیلان كر كو «دالیا مه‌حموود موسلم» ئا برازییا سالح موسلم، پاش خه‌باتێن ئیقنا كرنێ ل مێرسینێ ته‌سلیم بوو، پشتره‌، مه‌دیا په‌كه‌كێ و په‌یه‌دێ داخوه‌یانی ژ زارێ سالح موسلم و باڤێ دالیا وه‌شاندن ب ئاوایه‌كی وها كو رێڤه‌برییا باشوورێ ولات كه‌چا وان ب زۆر ته‌سلیمی تركان كرییه‌، مه‌دیا په‌كه‌كێ نه‌ ته‌نێ ئه‌ڤ كر به‌لكو سیاسه‌تا خوه‌ ئا گه‌مار وه‌كه‌ هه‌ر جار دۆماند و گۆ كو زاته‌ن په‌ده‌كێ دالیا ته‌سلیمی میتێ كرییه‌.

د ڤێ ده‌ربارێ ده،‌ وه‌زاره‌تا كارێن ناڤخوه‌ ئا باشوورێ كوردستانێ راستییا كه‌یسێ ئیلان كر و ژبلی دره‌واندنا مه‌دیا په‌كه‌كێ و په‌یه‌دێ، ده‌ست نیشان كر كو برازییا سالح موسلم ئا ب ناڤێ «دالیا» ب كێفا خوه‌ رێزێن یه‌په‌گێ ب جی هشتنه‌، ژ به‌ر كو وێ تێكلییه‌كه‌ سۆزداریێ ب شه‌رڤانه‌كی ب ناڤێ «سه‌لام ره‌مه‌زان محه‌مه‌د» ب كۆد ناڤێ «تۆلهلدان» هه‌بوو، وان ب هه‌ڤره‌ رێزێن رێخستنێ ب جی هشتن.

گه‌ره‌كه‌ په‌كه‌كه‌ ژخوه‌ بپرسه‌ چما خه‌لك رێزێن وێ ب جی دهێله‌؟

هه‌روه‌ها ئه‌شكه‌ره‌ كر، سه‌لام ره‌مه‌زان ل رۆژا 9/7/2020ان ب ئاوایه‌كی قاچاغ ده‌رباسی تركیێ بوویه‌، پشتره‌ ل 14/7/2020ان دالیا ب هه‌مان ئاوایی و ل مێرسینێ خوه‌ ته‌سلیم كر، له‌وما پێوه‌ندییا حكوومه‌تا باشوورێ كوردستانێ ب وێ كه‌یسێ تونه‌یه‌.

د داخوه‌یانییا وه‌زاره‌تا كارێن ناڤخوه‌ ئا باشوورێ كوردستانێ ده‌ هاتییه‌: «گه‌ره‌كه‌ مه‌دیا په‌كه‌كێ ل جیێ وه‌شاندنا دره‌وان، ڤێ پرسێ ژ خوه‌ بكه‌، چما خه‌لك رێزێن رێخستنا وه‌ ب جی دهێله‌ و ئاماده‌نه‌ ب رێكێن قاچاغ خه‌ته‌ریێ بخن سه‌ر ژیانا خوه».