سەرۆکێ میتێ: چەکدانین ته‌نێ نه‌ چارەیه‌، دڤێ یاسایێن نوو ژ بۆ په‌كه‌كێ بێن دەرخستن

سەرۆکێ میتێ ئیبراھیم کالن ل سەر پێڤاژۆیا چارەسەریێ گۆت، پرسگرێک تەنێ ب چەکدانینێ چارەسەر نابە، دڤێ ژ بۆ په‌كه‌كێ یاسایێن نوو بێن دەرخستن.

سەرۆکێ سازیا ئیستخباراتا نەتەوەیی یا ترکیەیێ (میت) ئیبراھیم کالن، ل ئەنقەرەیێ بەشداری کۆنفەرانسا “لێگەرینا پەیمانەکە نوو یا جڤاکی یا ھەرێمی ل رۆژھلاتا ناڤین” بوو.

کالن د کۆنفەرانسێ دە پرسگرێکا کوردان، پێڤاژۆیا نوو، چەکدانینا په‌كه‌كێ، روودانێن ل سووریەیێ و ئەگەرا شەرەکی ل ھەرێمێ نرخاندن.

کالن دیار کر کو چارەسەری نە تەنێ ب چەکدانینێ یە، ب دەمۆکراتیکبوونەکە کوور پێکانە، هه‌روه‌ها گۆت: دڤێ ھەم چەکدانین و ھەم ژی رەفۆرم ھەبن، لێ بەلێ ئەڤ یەک (چەکدانین) ب سەرێ خوە پرسگرێکێ چارەسەر ناکە.

کالن دا زانین، دەما چەک ھەبن ئان ژی وەکی ئاموورەکە گەفێ ل سەر ماسەیێ بن، ئەنتەگراسیۆنا دەمۆکراتیک پێک نایێ و گۆت: پرسگرێک تەنێ ب سینۆرێن ترکیەیێ ڤە نە گرێدایییە، پێویستیا کوردێن ل وەلاتێن دن ژی ب دەمۆکراتیکبوون و ئەنتەگراسیۆنێ ھەیە.

سه‌رۆكێ میتێ دیار كر، پشتی کو ئه‌و قۆناخێن چەکدانینێ تەمام بکن، پشترە ئەوێ ئەرێکرنا ئەنجومەنا ئاساییشا نشتمانی وەرگرن و یاسایێن نوو ژ بۆ وان ئەندامێن په‌كه‌كێ دەرخینن.